HESEKIELE 44

₁A goma le nna ka tsela e yago kgorong ya Ntlokgethwa ya ka ntle e lebilego bohlabela, ye e bego e tswaletšwe. ₂Morena a bolela le nna a re: Kgoro ye e tlo dula e tswaletšwe; e ka se ke ya bulwa; go ka se ke gwa tsena motho ka yona, ka gobane Morena Modimo wa Isiraele o tsene ka yona; e tlo dula e tswaletšwe. ₃Kgoši yona, ka gobane e le kgoši, yona e tlo dula kgorong yeo, ge e ja bogobe pele ga Morena; a e tsene ka tsela ya mathudi a kgorong yeo, e be e tšwe ka yona tsela yeo.

₄A tloga le nna ka tsela e yago kgorong ya leboa, mo Ntlo e lebilego gona. Ge ke lebelela ka bona letago la Morena le tletše Ntlo ya Morena; nna ka khunama ka lotšha. ₅Morena a bolela le nna a re: Ngwana motho! Ela hloko o lebeleše o bone ka mahlo, o theetše tše ke tlogo go botša tšona tša mekgwa ka moka ya Ntlo ya Morena le tša melao ya yona ka moka. O šetše matseno ka moka le matšo ka moka a Ntlokgethwa.

₆O botše dinganga tšeo tša moloko wa Isiraele, o re: Morena Mong wa bohle o re: Makgapha a lena ba moloko wa Isiraele ke a mantši ka kudu; go hwetše. ₇Ka gobane le dumetše ge Ntlongkgethwa ya ka go tsena batho ba mohuta o šele, ba dipelo tše di sa bollago, le ba mebele e sa bollago; ba tla fa Ngwakong wa ka ba o goboša mola le tliša dijo tšaka le makhura le madi, la senya kgwerano ya ka, la boeletša mabohlola a lena ka moka. ₈Lena la lesa go dira mediro e mekgethwa ya ka, la bea ba mohuta o šele, ba le direla mediro ya ka Ntlongkgethwa ya ka.

₉Morena Mong wa bohle o re: Go se ke gwa ba le motho wa mohuta o šele, wa pelo e sa bollago, le wa mmele o sa bollago, e a kago tsena Ntlongkgethwa ya ka; ke ra bona batho ba šele ba ba go tswakana le lena Baisiraele.

₁₀Ge e le Balefi ba go ntahla mola Baisiraele ba go ntlhanogela ba latela medimo ya bona, bona ba tlo rwala molato wa bona. ₁₁Ke bona ba go ntlhankela Ntlong e kgethwa ya ka, e le baletamejako ya Ntlo, le ba go dira mediro ya Ntlong, e le ba go hlaba dihlabelo le didimo tša setšhaba, ba go ema pele ga batho le go ba direla. ₁₂Ke lefetša tša ge ba direla batho ka go hlankela medimo ya bona, ba kgopiša ba moloko wa Isiraele ba ba diriša dibe. Ke lefetša tšona tšeo ge ke ena ke re: Ba tlo rwala molato wa bona! O realo Morena Mong wa bohle. ₁₃Ba se ke ba mpatamela ba ntlhankela e le baperisita; ba se ke ba batamela tše di kgethwa tša ka ka moka le Sekgethwakgethweng. A ba rwale nyatšego ya bona le makgapha a bona a ba a dirilego. ₁₄Nna ke ba bea balotodi ba Ntlo, le badiri ba mediro ya yona.

₁₅Ba go mpatamela ke baperisita ba Balefi ba moloko wa Tsadoko, ba ba šeditšego mediro ya Sekgethwa sa ka mola Baisiraele ba ntlhanogela. Bona bao a ba mpatamele ba ntlhankele, mme ba eme pele ga ka ba ntlišetše madi le makhura. O realo Morena Mong wa bohle. ₁₆Bona a ba tsene Sekgethweng sa ka; bona a ba tle dijong tša ka ba ntlhankele, ba lotole mediro ya ka. ₁₇Mohla ba tsenago ka dikgoro tša lapa la ka la ka gare, ba tsene ba apere diaparo tša leokodi; ba se ke ba tla ba apere tša boya bja dinku ge ba tla go nthlankela dikgorong tša lapa la ka gare mo Ntlong. ₁₈Dihlogong tša bona ba rwale dikefa tša leokodi, ba tšware dithema tša leokodi, ba se ke ba apara tše di bitšago mphufutšo. ₁₉Ge ba tšwela lapeng la ka ntle la setšhaba, ba apole diaparo tše ba bego ba di apere ba sa dira; ba di tlogele mo diphapošing tša Ntlokgethwa, ba tšwe ba apere tše dingwe, gore ba se tlele batho le diila ka diaparo.

₂₀Dihlogo tša bona di se ke tša dutulwa, le gona ba se ke ba lesa meriri ya ba e metelele; ba kute meriri ka mo go swanetšego. ₂₁Baperisita ba se ke ba nwa sedila mohla ba tsenago lapeng la ka gare. ₂₂Moperisita a se ke a tšea mosadi wa mohlologadi, le ge e le e a hladilwego, ya ba mosadi wa gagwe; a a tšee kgarebe ya moloko wa Isiraele; ge e le mohlologadi, gona e be mohlologadi wa moperisita.

₂₃Ba rute setšhaba sa ka go hlaola se sekgethwa go se e sego se sekgethwa, le sa tšhila go se e sego tšhila. ₂₄Ge go na le kgang, a go ahlole bona; ba ahlole ka go ya ka moahlolelo wa ka le ka molao wa ka; ba lotole mekgwa ya ka menyanyeng ya ka ka moka, ba kgethe disabatha tša ka.

₂₅Ba se ke ba tsena mo go lego mohu, ba se tlo tšhilafala. Ge go hwile tatagwe le ge e le mmagwe, goba morwa wa gagwe, goba morwedi wa gagwe, goba ngwanabo le ge e le kgaetšedi e sešogo ya tšewa, ka bona bao a ka itšhilafatša. ₂₆E tlo re ge a feditše go thakgafatšwa, a tsebo balelwa matšatši a šupago. ₂₇Mohla a tsenago Sekgethweng lapeng la ka gare go dira mediro ya gona, gona a tliše sedimo sa gagwe sa seboelanyi. O realo Morena Mong wa bohle.

₂₈Bohwa bja bona, bjona ke nna. Le se ke la ba nea naga ya bohwa mo go Isiraele. Bohwa bja bona ke nna. ₂₉A ba je dibego le dileboga le dilefa, le tše di gafilwego moka mo go Isiraele; ke tšona tša bona. ₃₀Le dithakangwaga, le tša maitšibulo a mehutahuta, le diekaro tša mehutahuta, le tša didimo tša mehutahuta; ke tša bona. Le ba neele dibego tša maupi a pele a lena, gore le iše ditšhegofatšo malapeng a lena. ₃₁Dinama tša se se hwilego ka nnoši, le ya se se bolailwego ke sebata, e ka ba nonyana le ge e le phoofolo, baperisita ba se ke ba di ja.