HESEKIELE 42

₁A nkiša lapeng le ka ntle la thoko ya leboa phapošing tše di bataganego le lapa la moagong wa thoko ya leboa. ₂Ka mo pele botelele bja wona e be e le meelo e lekgolo; mojako o le ka thoko ya leboa; bophara e le meelo e masome a mahlano. ₃Lapa la ka gare, le e bego e le la meelo e masome a mabedi, le le bataganego le lebato la lapa la ntle le be le dikologilwe ke mathudi a a hlatlaganego gararo. ₄Mo mejakong ya diphapoši tša gona go be go le lebato la go itshepelela la bophara bja meelo e lesome, le na le madutudu wa moelo o tee. Mejako ya gona e be e lebile thoko ya leboa. ₅Diphapoši tša ka godimo di be di pitlagane, di fetwa ke tša tlase le tša gare; di be di fokotšwa ke mathudi a gona. ₆Ka gobane di be di hlatlagane e le tše tharo, di se na dikokwane bjale ka tšela tša malapeng a mangwe. Ke tšona di hlokišitšego diphapoši tša gare le tša godimo sebaka. ₇Ge e le morako wa ka ntle, o šikago le diphapoši o lebile lapeng la ka ntle botelele bja wona e be e le meelo e masome a mahlano. ₈Le diphapoši tše di lokologanego di bapetše le wona di lebile lapeng la ka ntle, e be e le meelo e masome a mahlano, molokoloko wola o lebanego le Ntlokgethwa e be e le meelo e lekgolo. ₉Mojako wa go tsena o be o le ka tlase ga diphapoši tšeo tša ka thoko ya bohlabela, ge motho a tsena gona a etšwa lapeng la ka ntle.

₁₀Le ka mathoko a lapa le go be go gona le diphapoši mo morakong, di lebile mo lapeng le moagong wa ka ntle. ₁₁Di be di na le lebato la go itshepelela, di swana le diphapoši tšela tše dingwe di lebilego thoko ya leboa ka botelele le ka bophara le ka mejako le ka mamati le ka moagelo. ₁₂Le yona mejako ya diphapoši e be e le bjalo, e lebile borwa. Mo tsela ya mathudi e felago, go be go na le mojako o išago lapeng o lebile bohlabela, mo go tsenwago ka gona.

₁₃A mpotša a re: Diphapoši tša ka thoko ya leboa, le tša ka thoko ya borwa, tše di dikologilego lapa leo, ke diphapoši tše kgethwa, mo baperisita ba ba batamelago Morena ba jelago tše kgethwakgethwa gona. Ke mo go bolokwago tše kgethwakgethwa, le dibego, le dineo, le didimo, le dilefa; ka gobane ke felo gokgethwa. ₁₄Baperisita ge ba tsena, ka gobane ge ba tšwa Ntlongkgethwa ga ba dumelelwe go fo tšwela lapeng la ka ntle. Diaparo tša mediro ya bona ba di apola mo; ba di boloka mo; gomme ba apare diaparo tše dingwe, ba tsebo tšwela mo go lego batho ba bangwe.

₁₅Ya re ge a feditše go ela meago ya ka gare, a ntšhetša ntle ka tsela ya kgoro e lebilego bohlabela. Bjale a ela lehlakore leo ka moka. ₁₆Lehlakore leo la thoko ya bohlabela a le ela ka lehlaka lela; botelele ka moka ya ba dihlaka tše makgolo a mahlano. ₁₇A ela thoko ya leboa ka lehlaka leo, botelele ka moka ya ba dihlaka tše makgolo a mahlano. ₁₈A ela thoko ya borwa ka lehlaka; botelele ka moka ya ba dihlaka tše makgolo a mahlano. ₁₉A boa a ela thoko ya bodikela ka lehlaka, ya ba dihlaka tše makgolo a mahlano. ₂₀A ela thoko tše nne ka mokgwa woo. Felo mo go agilwego Ntlokgethwa go be go dikologilwe ke morako wo o bego o elwa ka dihlaka tše makgolo a mahlano thoko tšohle, morako e be e le wa go aroganya felo gokgethwa le tše di ilago.