Go fenywa ga manaba le go boa ga mathopja
1Bjale wene ngwana motho! Porofetela Gogo o re: Morena Mong wa bohle o re; Ke nna e! Ke lwa nago, wena Gogo, wena mmuši e mogolo wa Meseke le Tubala! 2Ke tlo go gomiša ke go goga ke go rotoša kua magomong a leboa, ke go tliša dithabeng tša Isiraele. 3Ke tlo itia bora bja gago bja tšwa seatleng sa gago sa la ntsogošo, ka itia le mesebe ya gago ya tšwa seatleng sa gago sa le letona, ya wela fase. 4Dithabeng tša Isiraele ke mo o tlogo wa, o na le dira tša gago ka moka, le ditšhaba tše di nago nago; ke tlogo gafa wa ba mojo wa manong, le wa maaka ka moka, le wa dibata tša naga. 5O tlo wa o le gare ga molala, ka gobane go boletše nna. O realo Morena Mong wa bohle. 6Magogo le ba ba agilego dihlakehlakeng ba iketlile, ke tlo ba betša ka mollo; ke mo ba tlogo tseba ge Morena e le nna. 7Ina la ka le lekgethwa ke tlo le tsebatša setšhabeng sa ka sa Isiraele, ke se hlwe ke dumela ge le ka gobošwa. Ke mo ditšhaba di tlogo tseba ge Mokgethwa wa Isiraele e le nna Morena.
8Tsebang, di etla, di tlo direga. O realo Morena Mong wa bohle. Ke lona letšatši le ke le boletšego. 9Baagi ba metse ya Isiraele ba tlo tšwa ba gotetša mello ka dibetša, le ka diphemo, le ka dikotse, le ka mara le mesebe, le ka melamo, le ka marumo. Ba tlo fetša nywaga e šupago ba gotša mello ka tšona. 10Go ka se iwe dikgonyeng hlageng; di ka se rengwe sekgweng; mello ba tlo gotša ka dibetša; e tlo ba gona go thopolola tše di thopilwego, le go hlakola bahlakodi ba bona. O realo Morena Mong wa bohle.
11Mehleng yeo ke tlo kgaolela Gogo felo ga mabitla nageng ya Isiraele, moedi wa baeti wa lewatleng ka thoko ya bohlabela. Ke mo go tlogo kgaotša maeto a Gogo, ge go epelwa yena le madira a gagwe ka moka; felo fao ba tlo re ke Moedi wa makoko a Gogo. 12Ba moloko wa Israele ba tlo fetša dikgwedi tše di šupago ba ba epela, e le go ntšha naga tšhila. 13Batho ka moka ka naga ba tlo epela ditoto, ba ithetiša ka gona mohla nna ke tlogo ithetiša. O realo Morena Mong wa bohle. 14Go tlo fela go hlaolwa banna ba go ralala le naga, ba epela bafeti bala ba go šalela ntle, gore ba ntšhe naga tšhila. Ba tlo thoma go tsoma ge go fetile kgwedi tše di šupago. 15Baraladi ba naga ge ba ralala, e tlo re ge e mongwe wa bona a hwetša mašapo a motho, o tlo tsema seka sa leswika, gore baepedi ge ba fihla, ba ye ba a epele moeding wa makoko a Gogo. 16Le motse wa gona ba tlo o rea leina la Makokong. Ba tlo ntšha naga tšhila.
17Ge e le wene ngwana motho, Morena Mong wa bohle o re: Bitša manong ka moka a diphego, le dibata ka moka tša naga, o re: Rapang le tleng, le kgobokane le etšwa mathoko ohle, le bokanele sedimo sa ka, se ke le hlabetšego sona, sedimo se segolo dithabeng tša Isiraele; le je dinama, le nwe madi. 18Le tlo ja dinama tša bagale; le tlo nwa madi a babuši ba lefase, a dikgapa le dinku, a diphoko le dipoo tše nonnego tša Basani. 19Le tlo ja makhura la khora, la nwa madi la buiwa, le tlile sedimong sa ka se ke le hlabelago sona. 20Mo ke le solelago, le tlo khora dipitsi le banamedi, le bagale le banna ba bahlabani ba mehutahuta. O realo Morena.
21Ke mo borena bja ka ke tlogo bo bea mo go bantle bohle. Mme bantle bohle ba tlo bona moahlolelo wa ka wo ke dirago ka wona, le letsogo la ka le ke le beilego go bona. 22Ba moloko wa Isiraele ba tlo tseba ge nna Morena ke le Modimo wa bona, go tloga mohla woo le mehleng e tlago. 23Bantle ba tlo tseba gobane ba moloko wa Isiraele ba be ba išitšwe bothopša ka molato wa bona wa ge ba ntlhanogela, nna ka ba fularela, ka ba gafela diatleng tša manaba a bona, ba wa ka lerumo ka moka ga bona. 24Ke ba dirile se se swanetšego ditšhila tša bona le bohlanogi bja bona, ka ba fularela.
25Bjale Morena Mong wa bohle o re: Bjale ke buša mathopša a Jakobo, ke gaugela bohle ba moloko wa Isiraele ke pelofaletše ina la ka le lekgethwa. 26Kgobogo ya bona le bohlanogi bja bona bja mola ba ntlhanogela, ba tlo di ila ge ba dutše mo nageng ya gabo ba iketlile, go se e a ba tšhošago. 27Ge ke ba gomiša ditšhabeng, ke ba phutha dinageng tša manaba a bona, ke mo ke tlo tšwelela ke le yo Mokgethwa ke na le bona, baditšhaba tše ntši ba di bona. 28Ke mo ba tlogo tseba ge nna Morena Mong wa bohle ke le Modimo wa bona, ge ke ba iša bothopša ditšhabeng, ka buša ke ba kgobela mo nageng ya gabo, ke se šadiše le o tee wa bona. 29Nka se dule ke ba fularetše, ka gobane ke tlo ba ke tšholletše Moya wa ka godimo ga moloko wa Isiraele, o realo Morena Mong wa bohle.
