Go tsošwa ga setšhaba sa Modimo ka Morwadafida
1Seatla sa Morena se ntletše, sa nthwala ka Moya, sa nkiša molaleng o tletšego marapo. 2Sa nthethiša nao thoko tšohle mo go fela; ka hwetša e le a mantšintši a tletše molala ka moka, le gona a omeletše ka kudu. 3A mpotšiša re: Ngwana motho! A fa marapo a a ka phela?
Nna ka re: Morena Mong wa ka! Go tseba wena.
4Yena a re: Porofeta o bolele le mašapo a, o re: Lena mašapo a a omeletšego, kwang lentšu la Morena! 5Morena Mong wa bohle o bolela le lena mašapo, o re: Tsebang! Nna ke tliša moya go lena, le tle le phele. 6Ke tlo le apeša ka mešifa, ka tsoša nama mo go lena, ka le apeša ka letlalo, ka bea Moya wa ka mo go lena, le tle le phele. Ke mo le tlogo tseba ge Morena e le nna.
7Nna ka porofeta ka mo ke laetšwego. Ka re ke sa porofeta, gwa kwala modumo le mogwaša; marapo a batamelana, lešapo la kgotlana le la galo. 8Ka re ke sa lebeletše, ka bona mo go ona go eba le ditšhika, go hloga dinama, mme a apara letlalo. Fela, go be go sešo gwa ba le moya mo go ona.
9A mpotša a re: Porofeta, wene ngwana motho! Porofeta, o bolele le Moya, o re: Morena Mong wa bohle o re: Hee Moya, tlaa o budulele ba ba bolailwego ba, ba tle ba phele!
10Nna ka porofeta ka mo ke laetšwego ka gona; ke ge Moya o tsena go bona, ba phela, ba ema ka maoto, e le mašaba a mantšintši ka kudukudu.
11A bolela le nna a re: Ngwana motho! Mašapo ao ke bohle ba moloko wa Isiraele. Bona ba re: Mašapo a rena a omeletše; re senyegetšwe ke lehutšo; re fedile! 12Bjale porofeta o ba botše o re: Morena Mong wa bohle o re: Tsebang! Nna ke tlo bula mabitla a lena; ke tlo le ntšha mabitleng a lena, lena setšhaba sa ka; mme ke tlo le iša nageng ya Isiraele. 13Mohla ke bula mabitla a lena, ke le ntšha mabitleng a lena, lena setšhaba sa ka, ke mo le tlo go tseba ge Morena e le nna. 14Ke tlo tsenya Moya wa ka mo go lena, le tle le phele; ke tlo le dudiša nageng ya lena la tlo tseba gore nna Morena ke dirile se ke se boletšego. O realo Morena.
15Lentšu la Morena le ntletše la re: 16Bjale wene ngwana motho! Tšea phata e tee o ngwale mo go yona o re: Juda le Baisiraele ba ba nago le yena. O nape o tšee e nngwe phata. Mo go yona o ngwale o re: Josefa, phata ya Efuraimi le bohle ba moloko wa Isiraele ba ba nago le yena. 17Phata tše pedi tšeo o di kgotlanye, e be phata e tee seatleng sa gago. 18O tlo botšišwa ke ba setšhaba sa geno, ba tlo re: A o ka se re hlathollele se o nago le sona? 19Gona o ba botše o re: Morena Mong wa bohle o re: Tsebang, ke nna ke tlo go tšea phata ya Josefa e lego seatleng sa Efuraimi le ba moloko wa Isiraele ba ba nago le yena, ka ba kgotlanya le Juda, ya ba phata e tee seatleng sa ka.
20E tlo re ge o swere diphatana tše di ngwadilwego, mme ba di bona, 21O bolele le bona o re: Morena Mong wa bohle o re: Tsebang! Ke nna ke tlogo ntšha Baisiraele mo gare ga ditšhaba tše ba ilego go tšona, ka ba phutha thoko tšohle, ka ba iša nageng ya bona. 22Ke tlo ba dira setšhaba se tee moo nageng ye thabeng tša Isiraele. Ka moka ga bona ba tlo ba le kgoši e tee e tlogo ba buša. Ba ka se hlwe ba eba ditšhaba tše pedi; ba ka se hlwe ba arogana mebušo e mebedi. 23Ba ka se ke ba hlwa ba itšhilafatša ka medimo ya bona le ka mabohlola a bona, le ka dikarogo tša bona ka moka. Ke tlo ba phološa metseng ya bona ka moka, ye ba bego ba dira dibe ba le mo go yona. Ke tlo ba hlatswa gore e be setšhaba sa ka: Nna ke be Modimo wa bona. 24Kgoši ya bona e tlo ba Dafida mohlanka ka; ba tlo dišwa ke modiši o tee ka moka ga bona. Ba tlo latela mekgwa ya ka; ba tlo hlokomela melao ya ka ba dira ka yona. 25Ba tlo dula nageng ye ke e neilego Jakobo mohlanka wa ka, ye botataweno ba bego ba dutše mo go yona, le bana ba bona go ya go ile. Mme Dafida mohlanka wa ka e tlo ba kgoši ya bona go ya go ile. 26Ke tlo dira kgwerano ya khutšo le bona; e tlo ba kgwerano ye e sa felego ye ke e dirago le bona. Ke tlo ba bea gona ka ba atiša, ka bea Sekgethwa sa ka gare ga bona ka go sa felego. 27Ntlo ya ka e tlo ba mo go bona, ka ba Modimo wa bona, mme bona ya ba setšhaba sa ka. 28Ke mo bantle ba tlogo tseba gore ke nna Morena ke dirago Isiraele batho ba bakgethwa ka ge Ntlo ya ka e kgethwa e le mo go bona neng le neng.
