HESEKIELE 24

₁Ka letšatši la lesome la kgwedi ya lesome ya ngwaga wa senyane, lentšu la Morena le ntletše la re: ₂Ngwana motho! Ngwala ina la letšatši la lehono, ka gobane la lehono le ke lona letšatši le kgoši ya Babele a fihlago motseng wa Jerusalema ka lona. ₃Mme moloko woo wa dinganga o o kaele sefela, o re: Morena Mong a bohle o re: Hlahlega pitša! E hlahlege o e hladie. ₄O e kgabele digoba; e be digoba tše dibotse tšohle tša dirope le matsogo; o e tlatše ka marapo a a hlaotšwego. ₅O tšee yona namanama ya diruoruo, o tsebo bešeletša ka dikgong, e bele. -- E a bela; e tla butšwa e na le marapo a yona.

₆Ke tšona tše Morena a di boletšego; o re: Joo, motse wa madi! Joo, pitša ya kgwara! Ye kgwara ya yona e sa tlogego! Ntšha digoba mo go yona ka setee; o se di hlaole. ₇Gobane madi a motse wo a sa le mo go wona; o a tšholletše lwaleng; ga wa ka wa a tšhollela mmung, wa a tšheletša ka mmu. ₈Ge ke lesa madi a wona a tšhollwa lwaleng, a se ke a tšheletšwa, ke dira gore mo go nna go tsoge kgalefo ya go tlo lefetša.

₉Bjale Morena Mong wa bohle o re: Joo, motse wa madi! Le nna ke kgobela dikgong tša go goteletša. ₁₀Rwalela dikgong tše ntši, o bešetše, mollo, o buduše dinama, moro o felele, di swe le marapo a tšona. ₁₁O buše o hlahlege pitša magaleng e le fela, tshipi ya yona e hubale, go swe ditšhila tše di lego mo go yona; le kgwara e tšwe. ₁₂Nna e mpaletše, e bile e ntenne; kgwara ya yona e sa le e ntši, ga e tšwe, e dula e le kgwara le mollong. ₁₃Ditšhila tša gago di befile; ke go hlatswitše, wa se hlatswege. Bjale ditšhila tša gago di ka se tšwe go wene. ₁₄Nna Morena ke boletše. Di tlo tla di phethwa ke nna; nka se lese, nka se setše, nka se thiše. O tlo otlwa ka mo go loketšego ditsela tša gago le tiro tša gago. O realo Morena.

₁₅Lentšu la Morena le ntletše la re: ₁₆Ngwana motho! Tseba gore o tlo tšhoga ke go amogile thabo ya mahlo a gago ka lehu. Mme wena o se ke wa lla, o se ke wa ntšha megokgo. ₁₇O fegelelwe teng; o se hlatloše sello; o rwale kefa le dieta; o se ipipe maledu; o se je bogobe bja mahlobogo.

₁₈Ya re ke sa tšo botša batho taba tše ka moswana, ka mantšiboa mosadi wa ka a hwa. Ka la ka moswana ka dira ka mo ke laetšwego ka gona. ₁₉Batho ba mpotšiša ba re: A o ka se re botše se o re rutago sona ka tše o di dirago?

₂₀Nna ka fetola ka re: Lentšu la Morena le ntletše la re: ₂₁Botša ba moloko wa Isiraele, o re: Morena Mong wa bohle o re: Tsebang gore Ntlokgethwa ya ka ke tlo e senya, yona le kgantšhago maatla ka yona, lona thabo la mahlo a lena, sellelwa sa dipelo tša lena. Gomme barwa ba lena le barwedi ba lena, bao le ba šiilego, ba tlo fela ka lerumo. ₂₂Se nna ke se dirilego, se tlo dirwa ke bolena; le ka se ke la ipipa maledu, le ka se ke la ja magobe a mahlobogo. ₂₃Le ka se role dikefa dihlogong, le ge e le dieta dinaong. Le ka se ke la hlatloša sello la golola; le tla fo fegelwa seng, le felela le dibeng tša lena. ₂₄Ke mo Hesekiele yo, a tlogo ba seka sa lena ka tšohle tše a di dirilwego, la tlo dira bjalo mohla di tšwelela, la tlo lemoga ge Morena Mong wa bohle e le nna.

₂₅Gomme wene ngwana motho, o tsebe gore mohla woo ge ke ba amoga sebo se ba se kgantšhago, le botšhepi bjo ba bo thabelago, le thabo la mahlo a bona, le sellelwa sa dipelo tša bona, le barwa ba bona le barwedi ba bona. ₂₆Mohla woo o tlo tlelwa le mophonyokgi, a go sebela ditsebeng. ₂₇Ka lona leo molomo wa gago o tlo hunologa, ge go tsena mophonyokgi eo, wa bolela o se hlwe o homola. Ke mo o tlogo ba seka mo go bona, ba kgona go tseba ge Morena e le nna.