HESEKIELE 20

₁Ka la lesome la kgwedi ya bohlano ya ngwaga wa go šupa, go tlile ba bangwe ba bagolo ba Isiraele go nna go botšiša Morena; ba dula fase pele ga ka. ₂Nna ka tlelwa ke lentšu la Morena, le re: ₃Ngwana motho! Bolela le bagolo ba ba Isiraele, o re: Morena Mong wa bohle o re; A fa le tlile go mpotšiša? Ka bophelo bja ka, nna ga ke botšišwe ke bolena. O realo Morena Mong wa bohle.

₄Napo ba sekiše! Wene ngwana motho! Napo ba sekiše! Ba tle ba lemoge mabohlola a botatabo. ₅Bolela nabo o re: Morena Mong wa bohle o re: Mohla wola ke hlaola Isiraele, ke emišitše atla sa ka ka baka la mohuta wo wa moloko wa Jakobo, gore ba ntsebe ba le kua nageng ya Egipita; ka emiša letsogo la ka ka baka la bona ka re: Ke nna Morena Modimo wa lena. ₆Mohla woo ke ba enetše ka re ke tlo ba ntšha nageng yeo ya Egipita, ka ba iša nageng ye ke ba hlaoletšego yona, e elago maswi le dinose, e lego yona e botse mo go dinaga tšohle. ₇Ka ba laya ka re: Ka moka lahlang makgapha a le a bonego, le se itšhilafatše ka medimo ya Egipita; Modimo wa lena ke nna Jehofa. ₈Bona ba mpeela mereba, ba gana go nkwa, bohle ba se lahle makgapha a ba bego ba a lebeletše, ba se kgaogane le medimo ya Baegipita; Nna ka ba ka re ke tlo thenolela bogale bja ka godimo ga bona, ka feletša pefelo ya ka mo go bona, ba le moo Egipita. ₉Ka direla ina la ka, gore ke se le nyatšiše mo ditšhabeng tše ba agilego le tšona, tše di bonego ge ke iponatša mo go bona ka re ke tlo ba ntšha Egipita.

₁₀Ka ba ntšha moo, ka ba iša lešokeng. ₁₁Ka ba nea ditaelo tša ka; ka ba ruta molao wa ka, wo e rego ge motho a eya ka wona a phele. ₁₂Ka ba nea le disabatha tša ka, gore e be seka mo go bona le bana ba bona, sa go re ba kgethilwe ke nna. ₁₃Fela, ba moloko wa Isiraele ba le lešokeng ba mpeetše mereba. Ba ganne go ya ka molao wa ka; ba nyaditše ditaelo tša ka, tše e rego ge motho a eya ka tšona a phele; ba sentše disabatha tša ka wa go befa, ka ba ka re ke thenolela kgalefo ya ka godimo ga bona gona moo lešokeng gore ke ba fedišetše ruri. ₁₄Fela, ke diretše ina la ka gore le se gobošwe ke ditšhaba tše di bonego ge ke ba khuduša. ₁₅Le gona ka emiša letsogo la ka moo šokeng ka baka la bona, ka re nka se ba fihliše mo nageng ya ka ba neilwego yona, e elago maswi le dinose, e lego yona e botse mo go dinaga ka moka. ₁₆Ka realo ka ge ba nyaditše ditaelo tša ka, ba gana go ya ka melao ya ka, ba goboša disabatha tša ka, ka gobane dipelo tša bona di be di latela medimo ya bona.

₁₇Ka fela ke ba lebelela ke ba kwela bohloko, ke se ba senye, ke se ba fediše lešokeng. ₁₈Gona moo šokeng ka bolela le bana ba bona ka re: Le se ke la latela mekgwa ya botataweno, le se ke la ya ka melao ya bona, le se ke la itšhilafatša ka medimo ya bona. ₁₉Modimo wa lena ke nna Jehofa; latelang melao ya ka, gomarelang mekgwa ya ka, le dire yona. ₂₀Kgethang disabatha tša ka e be seka sa go re ke na le kgwerano le lena, le tsebe gore Modimo wa lena ke nna Morena.

₂₁Fela, le bana ba bona ba mpeela mereba, ba se latele melao ya ka, ba se ye ka ditaelo tša ka, tše e rego ge motho a eya ka tšona a phele. Ba sentše disabatha tša ka; ka ba ka re ke thenolela bogale bja ka godimo ga bona, gore ke feletše kgalefo ya ka mo go bona gona moo lešokeng. ₂₂Fela, ka gomiša seatla sa ka, ka dira gore ina la ka le se gobošwe ditšhabeng tše di bonego ka mahlo ge ke ba khuduša. ₂₃Fela, gona mo lešokeng ke emišitše seatla ka ena ka re ke tlo ba tšitlanyetša ditšhabeng, ka ba gašanya le dinaga. ₂₄Ya tlo ba go ba otla ge ba sa dire ka molao wa ka, ge ba nyatša ditaelo tša ka, ge ba goboša disabatha tša ka, ge ba lebiša difahlogo medimong ya botatabo.

₂₅Ka ba ka ba gafela melaong e sego botse, le mekgweng ye e sa phedišego. ₂₆Ka lesa ba itšhilafatša ka dibego tša bona, ge ba fiša bana ba bona ba dithakaletswalo ka mollo; ya ba gore ke ba šwalalanye, ba tle ba tsebe ge Modimo e le nna Morena.

₂₇Bjale wene ngwana motho, bolela le ba moloko wo wa Isiraele, o re: Morena Mong wa bohle o re: Botataweno ba nnyaditše ka go fela ba ntlhanogela. ₂₈Mehleng yela ke ba tlišitše nageng ye ke emišitše letsogo la ka, nageng ye ke enetšego botatabo ka re ke tlo ba nea yona, ba ile ba re go bona mmoto o phagamile, le ge e le sehlare se tletše matlakala, ba ya ba iša dibego tša bona, ba ipega gona ka dineo tša go rumola nna, ba tupiša diorelo tša bona, ba tšhela ditšhelo. ₂₉Nna ka ba botšiša ka re: Madulo ao a phagamilego, a le yago go ona ke ang? Ke ka baka leo le nankhono a sago fela a thwe: Ke ang. ₃₀Bjale botša ba moloko wa Isiraele o re: Morena Mong wa bohle o re: Ge le lena le sa itšhilafatša ka mekgwa ya botataweno, le sa latela makgapha a bona a bootswa. ₃₁Le sa itšhilafatša le lehono le ka dibego tša lena, le ka go fiša bana ba lena ka mollo, le ka medimo ya lena ya diswantšho, a le re nka botšišwa ke lena ba moloko wa Isiraele? -- Ka bophelo bja ka, nka se dumele go ka botšišwa ke lena. O realo Morena Mong wa bohle. ₃₂Tše di lego dipelong tša lena, di ka se ke tša ba tša direga, ge le re: Re tlo etša bantle, ra swana le ba mehuta e mengwe, ra hlankela kota le maswika.

₃₃Morena Mong wa bohle o re: Ka bophelo bja ka, ke tlo le buša ka seatla se se tiilego, ke le akgela letsogo, ke le tšhollela kgalefo. ₃₄Ke tlo le ntšha ditšhabeng, ka le phutha dinageng tše ke le tšitlanyeditšego go tšona, ke emišitše letsogo, ke tšholla kgalefo. ₃₅Ke tlo le iša lešokeng la ditšhaba, ke tlo le sekiša gona re lebane ka difahogo. ₃₆Ke tlo le sekiša boka mola ke sekiša botataweno lešokeng la naga ya Egipita O realo Morena Mong wa bohle.

₃₇Ke tlo le goroša ka lepara, ka le kgopeletša ka ditlemo tša kgwerano yela. ₃₈Ba ba mpeelago mereba ke tlo ba tloša mo lena; ba ba ntlhanogelago ke tlo ba ntšha mo nageng ya madiilelo a bona; fela, ba ka se hlwe ba etla mo nageng ya Isiraele; ke mo le tlogo lemoga ge Morena e le nna.

₃₉Bjale lena ba moloko wa Isiraele, Morena Mong wa bohle o re: Le ka no ya la hlankela medimo ya lena ya diswantšho! Ka morago le tlo ba la kwa nna, la se hlwe le goboša ina la ka ka dibego tša lena, le ka medimo ya lena ya diswantšho. ₄₀Morena Mong wa bohle o re: Ke mo le tlogo tla thabeng e kgethwa ya ka, thabeng ye e phagamilego ya Isiraele, le bohle ba ba lego nageng, ba tlo hlankela nna; gona moo ba tlo nkgahla ka amogela dibego tša lena le dithakangwaga, tše le tlogo di tliša e le tše kgethwa. ₄₁Ke tlo le thabela boka monko o bose mohla ke le ntšha ditšhabeng, ke le phutha le etšwa dinageng tše le gašanyeditšwego go tšona, ka ba Mokgethwa wa lena, bantle ba di bona. ₄₂Ke mo le tlogo lemoga ge Morena e le nna, ge ke le iša nageng ya Isiraele, nageng ye ke e enetšego botataweno ka re ke tlo ba fa yona. ₄₃Gona moo le tlo gopola ditsela tša lena ka moka, le mediro ya lena ka moka, ye le itšhilafaditšego ka yona, la tlo ba la inyenya ka baka la mabobe ka moka a le a dirilego. ₄₄Ke mo le tlogo lemoga ge Morena e le nna, le gore ke le dirile tše di amanago le leina la ka, e sego le ditsela tše mpe tša lena, le mediro ya lena ye e senyegilego ya ba moloko wa Isiraele. O realo Morena Mong wa bohle.