Go swantšhwa go thopiwa ga kgoši le setšhaba
1Lentšu la Morena le ntletše la re: 2Ngwana motho! O agile le ba moloko wa dinganga, ba ba nago le mahlo a go bona, mme ga ba bone; ba ba nago le ditsebe tša go kwa, mme ga ba kwe; gobane ke moloko wa dinganga.
3Bjale wene ngwana motho! Tlema merwalo wa go khuduga; o khuduge mosegare ba go bona. O tloge motseng wa geno, o khudugele go o šele ba go bona; ke mo ba tlogo le boga mohlomong; ka gobane ke moloko wa dinganga. 4Thoto ya gago o e ntšhe mosegare ba go bona ge o dira ka mokgwa wa mokhudugi. 5Ba go bone ge o phula leboto o ntšha thoto ka lešoba. 6Ba bone ge o rwala thoto ka magetla, leswiswi le šetše le swere, o bipile sefahlogo o sa bone naga, ka gobane ke go dira seswantšho sa ba moloko wa Isiraele.
7Nna ka dira ka mo ke laetšwego ka gona; ka ntšha thoto ya ka e le mosegare boka thoto ya mokhudugi; ka mantšiboa ka thula leboto ka seatla sa ka. Leswiswi ge le swara ba mpona ke etšwa ke rwele thoto ka magetla.
8Ka moswana lentšu la Morena la ntlela la re: 9Ngwana motho! Ba moloko wa Isiraele, ba moloko wo wa dinganga, a ga ba ka ba go botšiša ba re: O dirang ge o realo? 10Ba botše ge o re: Morena Mong wa bohle o re: Thuto ye e ela ba mošate wa Jerusalema, le ba moloko ka moka wa Isiraele ba ba nago le bona. 11O re: Nna ke seswantšho sa lena; se nna ke se dirilego, ke sona ba tlogo dirwa sona, gobane ba tlo khudušwa ba išwa bothopša. 12Kgoši ye ba nago le yona, e tlo rwala thoto ka magetla leswiswi le swere; ba tlo thula leboto ba mo ntšhetša ntle a bipile sefahlogo a sa bone naga ka mahlo. 13Ke tlo ba ke mo reile ka lokwa la ka, ke mo tantše ka manti a ka, ka mo iša Babele nageng ya Bakaladea; a ka se ke a e bona, le ge a tlo hwela gona. 14Gomme bohle ba ba nago le yena, le ba ba emago le yena, le madira a gagwe, ke tlo ba tšitlanyetša thoko tšohle, ka khwamola tšhoša ka ba hlomarela.
15Ke mo ba tlogo lemoga ge Morena e le nna, mohla ke ba gašanya le ditšhaba, ke ba tšitlanyetša dinageng. 16Ke tlo šadiša batho ba sego nene, ba go phonyokga lerumo le tlala le dinkhu, ba tlo bola mabohlola a bona ka moka gare ga ditšhaba tše ba tlogo tla go tšona; ke bona ba tlogo lemoga ge Morena e le nna.
17Gomme lentšu la Morena la ntlela la re: 18Bogobe bja gago bo je o roromela; meetse a gago a nwe o hlakgasela o boifa. 19O botše setšhaba sa naga o re: Morena Mong wa bohle o bolela ba ba dutšego Jerusalema le nageng ya Isiraele, o re: Ba tlo ja bogobe bja bona ba boifa; ba tlo nwa meetse a bona ba tšhogile, ka gobane naga ya bona e tlo šala e le ya marope, ye e hlakotšwego tšohle ka baka la bošoro bja baagi bohle ba yona. 20Metse ye e dutšwego ke batho e tlo šwalalanywa, naga e tlo ba lehanata. Ke mo le tlogo lemoga ge Morena e le nna.
21Lentšu la Morena le ntletše la re: 22Ngwana motho! Ke morero mang wo le nago nawo nageng ya Isiraele, ge le re: Matšatši a a atalala, dipono ka moka tša loba? 23Bjale ba botše o re: Morena Mong wa bohle o re: Morena woo ke tlo o fediša, ba se hlwe ba hlaba seema seo go Isiraele. Ba botše o re: Matšatši a fihlile le tše di boletšwego ke dipono tšohle.
24Go ka se hlwe go eba le pono ya lefela le morero wa go fora mo go ba moloko wa Isiraele. 25Gobane Morena ke nna; go tlo bolela nna; Lentšu le ke tlogo le bolela le tlo direga, le ka se ke la diega. Gobane mehleng yeno ya lena ba moloko wa dinganga, ke tlo bolela lentšu ka napa ka le phetha. O realo Morena.
26Lentšu la Morena la ntlela la re: 27Ngwana motho! Seba ba moloko wa Isiraele, ba re: Tša pono ya mmoni e di tlo tšwelela ge go fetile matšatši a mantši; o bolela tša mabaka a kgole. 28Bjale ba botše o re: Morena mong wa bohle o re: Mantšu aka ka moka a ka se hlwe a diega. Lentšu le ke le bolelago le tlo direga. O realo Morena.
