HESEKIELE 1

₁E be e le ka ngwaga wa masome a mararo, ka kgwedi ya bone, ka tšatši la bohlano la kgwedi yeo, ke na le ba ba thopilwego, re le nokeng ya Kebara, ge go bulwa legodimo ka bona dipono tša Modimo. ₂E be e le ka tšatši la bohlano la kgwedi yeo ka ngwaga wo kgoši Joyakini a išitšwego bothopša ka wona, ₃Ge lentšu la Modimo le tlela Hesekiele morwa wa Busi, yo e bego e le moperisita, a le nageng ya Kaladea nokeng ya Kebara; gona fao seatla sa Modimo sa ba godimo ga gagwe.

₄Wa re ge ke lebelela ka bona go etla ledimo le legolo le etšwa thoko ya Leboa, e le leru le legolo le le hlakanego le mollo, le etša magadigadi thoko tšohle, ka teng ga lona go phadima boka tshipi e khubedu. ₅Gona moo gare gwa bonala tše e kego ke diphedi tše nne, tša lebopo e kego ke la batho. ₆Se sengwe le se sengwe se be se na le difahlogo tše nne, le diphego tše nne. ₇Maoto a tšona e be e le maoto a a lokilego; dinao di be di swana le ditlhako tša namane ya kgomo; di be di phadima bjalo ka mphiri. ₈Ka tlase ga diphego tša tšona tše nne go be go na le diatla tša motho, di eya ka bone bja difahlogo le diphego tša tšona. ₉Tšona di be di dirišana. Go sepeleng ga tšona di be di sa retologe, ka gobane mo di bego di eya bo be go lebile sefahlogo.

₁₀Ge e le difahlogo tša tšona, se tee se be se swana le sa motho; sa ka thoko ya le letona e be e le sa tau; sa ka thoko ya la ntsogošo e be e le sa poo; sa ka thoko e nngwe e be e sa nong; tša realo bone bja tšona. ₁₁Difahlogo tša tšona di be di le ka mokgwa woo. Ge e le diphego tša tšona, tše pedi tša tšona di be di phorologela godimo, di be di dirišana ka tše pedi tše pedi go sephedi se sengwe le se sengwe. Tše dingwe diphego tše pedi di be di apešitše mebele ya tšona. ₁₂Ge di sepela di be di eya mo go lebilego sefahlogo, mo moya o kago di iša gona; di be di sa retologe ge di ya mo di yago.

₁₃Lebopo la tšona e be e ke ke magala a a hlennego a mollo o tukago boka diša, o tuka mo gare ga tšona, o phadima o etšwa dikgadima. ₁₄Gomme tšona diphedi di be di eya di boa ka lebelo la legadima.

₁₅Ya re ke sa lebeletše diphedi tšeo, ka bona ka tlase ga tšona ka se tee go eme leotwana la koloi, eke ke a mane ka go ya ka difahlogo tša tšona. ₁₆Maotwana a ka mo a bego a bonala lebopo, e be e le a mmala wa talamatala. Bone bja ona a be a swana, a bonala eke leotwana le tsenana le leotwana. ₁₇A be a kgona go ya thoko tšohle tše nne a sa retologe. ₁₈Merumo ya ona -- ka ge a godile kudu wa go šiiša -- a be a tletše mahlo mo go fela. ₁₉Ya re ge diphedi di sepela, le maotwana a sepela a bapetše natšo; ge di hlatloga, le ona a hlatloge. ₂₀Mo di bego di išwa ke moya le ona a ya gona. Mo di bego di eya di išwa ke moya, le ona maotwana a tsoge gotee le tšona; gobane a be a na le moya wa tšona diphedi. ₂₁Ge di sepela, le ona a sepele; ge di ema, le ona a eme. Ge tšona di hlatloga, le ona a hlatloge a fela a bapetše natšo, moya wa diphedi o le mo go tšona.

₂₂Ka godimo ga diphedi go be go le bjalo ka eke ke leratadima la mmala wa legakabje le lešweu le phadimago, le bapilwe godimo ga tšona. ₂₃Sebaka sa ka tlase ga leratadima leo se be se lekanwe ke diphego ge di emišitšwe di batagane di phorologile, e le tše pedi tše pedi tša sephedi se sengwe le se sengwe, se na le tše dingwe diphego di bego di apeša mmele wa sona. ₂₄Ka kua modumo wa diphego o etša modumo wa meetse a magolo, modumo wa yena Yogodimo; mošito eke ke wa madira a magolo, wa kwala ge di sepela. Ge di ema di be di hunyetša diphego. ₂₅Ya re ge di ema di hunyeditše diphego, gwa kwala modumo o etšwa sebakeng sa godimo ga dihlogo tša tšona.

₂₆Ka godimo ga leratadima le le bego le ukametše dihlogo tša tšona gwa bonala se e kego ke sedulo sa lebopo la talamatala mo go sona go dutše yo e kego ke motho. ₂₇Ka bona phadimo eke ke ya mphiri, ya mollo wa ntlong. Go tloga lethekeng go iša godimo le go iša tlase, ka bona e ke ke mollo, go dikologilwe ke phadimo. ₂₈Gwa swana le molalatladi wa marung ge pula e nele. Phadimo ye e bego e mo dikologile e be e le e bjalo. Ke tšona tše di bonetšego tša letago la Morena.

Ka re go di bona, ka khunama ka lotšha, ka kwa lentšu la e a bolelago.