EKISODO 8

₁Gomme Morena a laela Moshe a re: Botša Arone o re: Swara lepara la gago o emišetše letsogo la gago godimo ga dinoka, le godimo ga meela le megobe, o tšweleletše naga ya Egipita digwegwe. ₂Arone a emišetša letsogo la gagwe godimo ga meetse ka moka a Egipita, digwegwe tša tšwelela tša tlala naga ya Egipita. ₃Gomme dingaka tša Egipita le tšona tša dira tšona tšeo ka meleko ya tšona, tša tšweleletša naga ya Egipita digwegwe. ₄Farao yena a bitša Moshe le Arone a re: Nthapeleleng go Morena, a tloše digwegwe tše go nna le go setšhaba sa ka, e be gona ke tlogo lesa setšhaba se sa ya sa hlabela Morena dihlabelo.

₅Moshe a fetola a re: A nke ke laiwe ke wena, o bee lebaka la go kgopelela wena le bahlanka ba gago le setšhaba sa gago, gore digwegwe di tlošwe go wena, le nywakong ya gago, di šale mo nokeng fela. ₆Farao a re: A e be ka moswana. Moshe a re: Go tlo dirwa se o se boletšego, gore o lemoge gore ga go e a swanago le Morena Modimo wa rena. ₇Digwegwe di tlo tloga go wena le go bahlanka ba gago le go setšhaba sa gago, tša šala mo nokeng fela.

₈Moshe le Arone ge ba etšwa go Farao, Moshe a hlaboša lentšu a kgopela Morena ka baka la digwegwe tše a di roletšego Farao.

₉Morena a dira se Moshe a se kgopetšego, digwegwe tša hwa mo nywakong, le mo malapeng, le mo mašemong.

₁₀Ba di kgobela ya ba mekgobokgobo, naga ya napa ya nkga.

₁₁Farao bjale ge a bona a khutšišitšwe, o thatafaditše pelo ya gagwe, a se ke a dira se ba se boletšego. Ya ba tšona tšeo tše Morena a di boletšego. ₁₂Bjale Morena a bolela le Moshe a re; Botša Arone o re: Emiša lepara la gago o itie lerole le fetoge menang nageng ka moka ya Egipita. ₁₃Ba dira bjalo; Arone a emiša letsogo a swere lepara, a itia lerole la lefase, mme menang ya tlela batho le diruiwa; lerole ka moka la naga la fetoga menang mo lefaseng ka moka la Egipita. ₁₄Dingaka le tšona tša itapiša ka meleko ya tšona gore di tšweletše menang, mme tša šitwa. Menang yona ya tlala bathong le diruiweng. ₁₅Ke mo dingaka di boditšego Farao tša re: Se ke monwana wa Modimo. Fela, pelo ya Farao ya fela e thatafetše, a se ke a kwa se ba se bolelago. Ya ba tšona tšeo tše Morena a di boletšego.

₁₆Bjale Morena a bolela le Moshe a re: Tsoga e sa le bosasa, o eme pele ga Farao. O tlo mo hwetša a theogela nokeng; mme o mmotše o re: Lesa setšhaba sa ka se yo ntirela! ₁₇Ge o ka gana go lesa setšhaba sa ka sa sepela, gona o tsebe gore ke tlo roma diboba, tša tlela wena le bahlanka ba gago le setšhaba sa gago, le nywakong ya gago. Nywako ya Baegipita e tlo tlala diboba, le naga ye ba lego mo go yona. ₁₈Fela bjalo ke tlo hlaola naga ya Gosene mo go agilego setšhaba sa ka; gona kua go ka se ke gwa ba le diboba, gore o tsebe gore nna Morena Modimo ke gona mo lefaseng. ₁₉Ke tlo aroganya batho ba gago le batho ba ka; mohlolo wo o tlo ba gona ka moswana.

₂₀Morena a dira tšona tšeo. Diboba tša tla ka bontši mo nywakong ya Farao le nywakong ya bahlanka ba gagwe; gomme mo lefaseng ka moka la Egipita naga ya senyega ka diboba. ₂₁Ke mo Farao a biditšego Moshe le Arone, a re: Yang, le hlabele Modino wa lena mo nageng yeno. ₂₂Moshe a re: Go ka se loke ge re dira tšeo, ka gobane se re tlogo se hlabela Morena Modimo wa rena, e tlo ba tše Baegipita ba di ilago. Naa ba ka se re thume ka maswika ge re hlabela Modimo diila tša Baegipita? ₂₃Re lese re ye lešokeng, leeto la matšatši a mararo, re hlabele Morena Modimo wa rena dihlabelo, re dire se a tlogo re botša sona. ₂₄Farao a re: Ke tlo le lesa la sepela la hlabela Morena Modimo wa lena dihlabelo kua lešokeng; fela, le se ke la ya kgolekgole; le gona le nthapeleleng.

₂₅Moše a re: Tseba ge, gore nna bjale ge ke tloga fa go wena, ke ya go go kgopelela go Morena; mme ka moswana diboba di tlo tlogela Farao le bahlanka ba gagwe. Fela, Farao a se ke a boeletša tša bofora a gana gape ge setšhaba se sepela se yo hlabela Morena dihlabelo.

₂₆Moše a tšwa go Farao, mme a rapela Morena. ₂₇Morena a dira se Moshe a se kgopetšego, a tloša diboba go Farao le go bahlanka ba gagwe, gwa se ke gwa šala le setee.

₂₈Eupša Farao le tabeng ye a boela a thatafatša pelo ya gagwe, a se ke a lesa setšhaba sa sepela.