EKISODO 37

₁Betsaliele a dira le polokelo ka mamati a moduhlare. Botelele bja yona ya ba meelo e mebedi le seripa. Bophara bja yona ya ba moelo le seripa. ₂A e manega ka gauta e tagilego ka teng le ka ntle, a e dikološa ka morumo wa gauta. ₃A e tšhollela mekgoko e mene ya gauta, ya go kgokelwa dikhutlong tše nne tša yona, mekgoko e mebedi ya ba lehlakoreng leno, e mebedi ya ba lehlakoreng lela. ₄A betla diphata tše pedi tša moduhlare, a di manega ka gauta. ₅Diphata tšeo a di nokela mo mekgokong ya mo mahlakoreng a polokelo; ya ba tša go e rwala ka tšona. ₆O dirile le sekhurumelo sa gauta e tagilego. Botelele bja sona ya ba meelo e mebedi le seripa; bophara bja sona ya ba moelo le seripa. ₇A dira Bakerubi ba babedi ka gauta; a ba dira ka gauta e rutšwego, ba dula mo dintlheng tše pedi tša sekhurumelo. ₈Mokerubi e mongwe a ba ntlheng yeno, e mongwe a ba ntlheng yela. A ba dira ba le tshipi e tee le sekhurumelo mo dintlheng tša sona. ₉Bakerubi ba be ba phurollela diphego tša bona godimo ga sekhurumelo, ba se šireletša ka diphego tša bona. Difahlogo tša bona di be di lebile sekhurumelong.

₁₀A dira le sethalana ka mamati a moduhlare. Botelele bja sona ya ba meelo e mebedi. Bophara bja sona ya ba moelo o tee. Boemo bja sona ya ba moelo le seripa. ₁₁A se manega ka gauta e tagilego; a se dikološa ka morumo wa gauta. ₁₂A se dikološa le ka lematšana le le lekanago le bophara bja seatla, a le dikološa ka morumo wa gauta. ₁₃A se tšhollela mekgoko e mene ya gauta, a e kgokela mo maotong a sona, mo dikhutlong tše nne tša sona. ₁₄Mekgoko ye e be e beilwe ka tlase ga lematšana, e be e le ya go nokela diphata tša go rwala sethalana seo. ₁₅Diphata tšeo o betlile tša moduhlare, a di manega ka gauta, ya ba tša go rwala sethalana. ₁₆A dira le dibjana tša go bewa mo sethaleng, meruswi ya sona, le megopo ya sona, le meetana ya sona, le digo tša go ga ka tšona; a di dira ka gauta e tagilego.

₁₇A dira le sehlomapone ka gauta e tagilego. O se dirile ka gauta e rutšwego, leoto la sona le thito ya sona. Matšoba a sona, le dinoko tša sona, le mahlare e be e le tšhipi e tee le sona.

₁₈Mo thitong ya sehlomapone go tšwile dithabe tše di selelago; tše tharo tša dula ka lehlakoreng le lengwe; tše tharo tša dula ka go le lengwe la thito. ₁₉Thabe e be e na le dinoko tše tharo, tše di nago le mahuto le mahlare, ntlha e etša letšobana. Dithabe di be di le ka mokgwa woo go selela ga tšona. ₂₀Thito ya sona e be e na le dinoko tše nne, tše di nago le mahuto le mahlare a matšobana. ₂₁Lehuto le be le dutše gona moo go tšwago thabe tše pedi tše pedi mo thitong; ya ba dithabe tše di selelago tša sehlomapone. ₂₂Mahuto le dithabe tša sona e be e le tshipi e tee le thito, e le gauta e rutšwego, gauta e tagilego. ₂₃A dira le mabone a sona a šupago, le matlaonyana, le dikhurumelo, ka gauta e tagilego. ₂₄Sehlomapone le dibjana tša sona ka moka o di dirile ka gauta ye e bego e elwa ya ba talente ka moka.

₂₅O dirile le aletare ya diorelo ka mamati a moduhlare. Botelele bja yona ya ba moelo o tee, le bophara bja yona ya ba moelo o tee. Ya ba le dikhutlo tše nne. Boemo bja yona ya ba meelo e mebedi. ₂₆O e manegile ka gauta e tagilego, sekhurumelo sa yona, le mahlakore a yona, le dinaka tša yona; a e dikološa ka morumo wa gauta. ₂₇O e diretše mekgoko e mebedi ya gauta ka tlase ga morumo wa yona; a dira bjalo mahlakoreng a mabedi a yona, ya ba ya go nokela diphata tša go e rwala. ₂₈Diphata o betlile tša moduhlare, a di manega ka gauta.

₂₉A dira le makhura a setlolo se sekgethwa, le diorelo tše di bose tše di sekilego ka mokgwa wa badiri ba tšona.