EKISODO 23

₁O se ke wa ba le ditshele. O se ke wa emela bokgopo wa ba hlatse ya maaka. ₂O se ke wa latela bontši ge bo senya; ge o bolela bohlatse tshekong o se ke wa fapogela mo go fapogelago bontši. ₃Le gona o se ke wa lahletša modiitšana tshekong ya gagwe.

₄Ge o ka hwetša kgomo ya lenaba la gago, le ge e ka ba pokolo ya gagwe, e timetše, o se ke wa lesa go e bušetša go yena. ₅Ge o ka hwetša pokolo ya motho e a go hloilego e wile le morwalo wa yona, o se ke wa feta; o mo swariše go e rola.

₆O se ke wa kgopamiša taba ya modiitšana wa geno tshekong ya gagwe. ₇Tšhaba taba ya maaka; motho e a se nago molato, le mothomoloki. O se ke wa mmolaya; ka gobane yo mobe nna ga ke mo emele. ₈O se ke wa amogela tša tsogo le kobong; gobane tša tsogo le kobong di foufatša ba ba bonago, di kgopamiša taba tša baloki.

₉Modiiledi o se ke wa mo pateletša; gobane pelo ya modiiledi le a e tseba; ka gobane le be le le badiiledi nageng ya Egipita.

₁₀Tšhemo ya gago o e lema ka nywaga e selelago, o bune dijo tša yona. ₁₁Ka ngwaga wa go šupa o e ladiše, o e tlogele, gore badiitšana ba setšhaba sa geno ba je; mme se se šalago se lewe ke diphoofolo tša naga. Le serapa sa gago sa merara, le mehlware ya gago, o di dire ka mokgwa woo.

₁₂O dire mediro ya gago ka matšatši a selelago; ka la go šupa o khutše, gore kgomo ya gago le pokolo ya gago di khutše, gore morwa wa molata wa gago, le modiiledi, ba lapologe.

₁₃Le hlokomele tšohle tše ke le boditšego tšona. Maina a medimo e šele le se ke la a gopola, a se ke a kwala melomong ya lena.

₁₄O ntirele monyanya gararo ka ngwaga. ₁₅O dire monyanya wa dinkgwa tše di se nago hlabego; o fetše matšatši a šupago o eja dinkgwa tše di sa hlabegwago ka mo ke go laetšego, ka kgwedi ya Abibi; ka gobane ke yona ye o tšwilego nageng ya Egipita ka yona. Fela le se ke la tla pele ga ka le sa swara selo.

₁₆Le dire monyanya wa puno, wa dithakangwaga tša mediro ya gago, ya tše o di bjetšego mašemong. Le dire le monyanya wa go kgobela tše o itiretšego tšona; o dirwe ge ngwaga o fela. ₁₇Banna ba gago ka moka ba bonale pele ga Morena gararo ka ngwaga.

₁₈Madi a dihlabelo tša gago o se ke wa a tliša le tše di hlabegilwego, le makhura a monyanya wa ka a se ke a šalela la ka moswana.

₁₉Tša pele tša dithakangwaga tša gago o di iše ngwakong wa Morena Modimo wa gago.

Putšane o se ke wa e apea le maswi a mmayo.

₂₀Tseba gore ke roma Morongwa wa ka a go etepele, a go diše tseleng ya gago, a go fihliše felo mo ke go lokišitšego. ₂₁O itote o lebane nae; o kwe se a se bolelago; o se ke wa mo gana; ka gobane a ka se ke a lesa go le otla ge le fapoga, ka gobane leina la ka le le mo go yena. ₂₂Fela, ge o theetša se a se bolelago, wa dira tšohle tše a go botšago tšona, ke mo ke tlogo ba lenaba la manaba a gago, ka beka ba ba go bekago. ₂₃Ka gobane Morongwa wa ka o tlogo etapele, o tlogo fihliša mo go lego Baamoro, le Bahethe, le Bapherese, le Bakanana, le Bahefe, le Bajebusi, mme ke tlo ba fediša. ₂₄O se ke wa khunamela medimo ya bona, o se ke wa e direla, o se ke wa latela mokgwa wa bona, o e fedišetše ruri, mme o pšhatlaganye dikokwane tša bona. ₂₅Direlang Morena Modimo wa lena; ke mo a tlogo šegofatša bogobe bja lena, le meetse a lena, a le efela malwetši. ₂₆Mme mo nageng ya gago go ka se ke gwa ba le mosadi e a senyegelwago le e a dulago e le moopa; matšatši a bophelo bja gago a tlo atišwa ke nna.

₂₇Go boifiša ga ka ke tlogo etiša pele ga gago; ditšhaba ka moka tše o yago go tšona ke tlo di raranya; manaba a gago ka moka ke tlo a tšhabiša pele ga gago. ₂₈Ke tlo roma mebu ya go etapele ya raka Bahefe, le Bakanana, le Bahethe, ge o fihla. ₂₉Nka se ke ka ba raka ka moka ka ngwaga o tee ge o fihla, gore naga e sa tlo ba lešoka, gore o sa tlo atelwa ke dibata tša naga. ₃₀Ke tlo ba raka ka o tee ka o tee ge o fihla, gore le thome go ata, le hlakanye lefase. ₃₁Mellwane ya gago e tlo bewa ke nna, ya thoma ka Lewatle la Mahlaka, ya goma ka Lewatle la Bafilisita, ya goma ka lešoka le ka noka; ka gobane beng ba naga yeo ke tlo ba gafela diatleng tša lena, ka ba raka ge o fihla. ₃₂O se ke wa dira kgwerano le bona le medimo ya bona. ₃₃Ba se ke ba aga mo nageng ya gago, gore ba sa tlogo diriša tša go nthumola, ge o ka direla medimo ya bona, ba ba moreo wo o tlogo go tanya.