Ba fihla thabeng ya Sinai
1Ka kgwedi ya boraro ya leeto Baisiraele ba tsene lešokeng la Sinai; ba fihlile ka lona letšatši le ba faletšego Egipita ka lona. 2Batlile lešokeng la Sinai ba etšwa Rafidima. Gona moo Baisiraele ba bokana lešokeng, ba hloma mešaša mo ba lebanego le thaba.
3Mošhe a namela a ya go Modimo; Morena a mmitša a le thabeng a re: Bolela le ba leloko la Jakobo, o botše Baisiraele o re: 4Le di bone ka noši tše ke di dirilego Baegipita; mme lena ka le kuka ka phego tša nong, ka le tliša go nna. 5Gomme bjale, ge le tlo theetša ruri se ke se bolelago, la hlokomela kgwerano ya ka, ke mo le tlogo ba baruiwa ba ka mo ditšhabeng ka moka; ka gobane lefase ka moka ke la ka. 6Gomme lena le tlo ba setšhaba sa ka sa bomphamodimo, setšhaba se sekgethwa. Ke ona mantšu a o tlogo botša Baisiraele. 7Moshe a tla a bitša ba bagolo ba setšhaba, a ba anegela mantšu ao ka moka a Morena a mo laetšego ona. 8Setšhaba ka moka sa dumela gammogo, sa re: Tšohle tše Morena a di boletšego re tlo di dira. Phetolo yeo ya setšhaba Moshe a e fihliša go Morena.
9Morena a botša Moshe a re: Ge e le nna ke tlo tla go wena ke le lerung le leso, gore setšhaba se kwe ge ke bolela le wena; ke mo se tlogo go dumela ka mehla.
Mme Moshe a tsebiša setšhaba tše Modimo a di boletšego. 10Bjale Morena a bolela le Moshe a re: Yaa go setšhaba o re: Ba ikgethe lehono le bosasa, ba hlatswe diaparo tša bona. 11Gomme ka la moso ba be ba itokišitše; ka gobane ka la moso setšhaba ka moka se tlo bona ge Morena a fologela thabeng ya Sinai. 12Bjale beela setšhaba mollwane thoko tšohle tša yona, o se botše o re: le itote gore le se namele thaba ye, le se gate mo e fihlago. Mang le mang e a kago gata thaba ye o tlo hwa lehu. 13A a se ke a swarwa ka seatla; a a thungwe ka maswika, goba a betšwe ka lerumo; ga go se se kago leswa sa phela, le ge e le motho, le ge e le seruiwa. Thaba ye ba tlo e namela ge go tlo kwala phalafala.
14Gomme Moshe a fologa thabeng a tla go setšhaba a se laela sa ikgetha sa hlatswa diaparo; 15a botša setšhaba a re: Le fele le itokišetše la ka moso; se batameleng mosadi.
16Ka tšatši la boraro ge go esa gwa ba le medumo, le magadima, le leru le lesoleso mo thabeng; gwa kwala moletšo o mogolo ka maatla wa naka. Setšhaba ka moka sa roromela se le mo mešašeng. 17Gomme Moshe a ntšha setšhaba mo mešašeng a se iša sa yo lebana le Modimo, sa ema tlase ga thaba. 18Gomme thaba ka moka ya Sinai e be e thuntšha muši, ka gobane Morena o be a fologetše go yona ka mollo; gomme muši wa yona o be o hlatloga bjalo ka mokubelo; thaba ka moka ya šišinyega gagolo. 19Moletšo wa naka wa fela o gola o eya; mme go be go bolela Moshe, Modimo a fetola ka lentšu le legolo. 20Morena o be a fologetše thabeng ya Sinai, mo ntlheng ya thaba. A bitša Moshe gore a tle ntlheng ya thaba; mme Moshe a namela. 21Morena a mmotša a re: Fologa o laele setšhaba, gore se se ke sa šwahlela go Morena go bona, gore se se tlo fela ka bontši. 22Le baperisita ba ba batamelago Morena, ba ikgethe, gore Morena a se tlo ba galefela.
23Moshe a fetola a re: Setšhaba se ka se ke sa kgona go namela thaba ya Sinai, ka gobane o re laetše wa re re beele thaba mollwane, e be e kgethwa.
24Morena a re: Napa o fologe, o kgone go rotoga o na le Arone. Ge e le baperisita le ba setšhaba ba se ke ba šwahla ba re re namele re ye go Morena, gore Morena a sa tlo ba galefela. 25Gomme Moshe a fologa a tla go setšhaba, a ba botša.
