MMOLEDI 6

₁Go sa le bjo bongwe bošula bjo ke bo bonego fa tlase ga letšatši; mme bjona bo atile mo bathong. ₂Ke ge motho yo Modimo a mo neilego mahumo le menono le bogolo, mme a se hloke le setee sa tše pelo ya gagwe e di kganyogago, ge yena yo Modimo a sa mo dumelele go ka di ja, tša lewa ke motho o šele. Tše bjalo ke lefela, ke bohloko bjo bogolo. ₃Le ge motho a tswetše bana ba lekgolo, a phetše galelele, a atetšwe ke matšatši a bophelo, ge yena yo pelo ya gagwe e sa kgodišwe ke menono ya gagwe, a sa lokišetšwe lebitla, -- yo bjalo, nna ke re, kaone ke lefolotšana. ₄Gobane lona le tla e le lefela, le boela leswiswing, mme leina la lona le khupetšwa ke leswiswi. ₅Le gona ga lešo la bona letšatši, ga le tsebe, le phala yola ka bokaone. ₆Yola, ge a ka phela nywaga e dikete tše pedi a sa bone tše dibotse, a ga ke re tšohle di ya felo gotee?

₇Maitapišo ohle a motho ke a magolo; le ge go le bjalo, kganyogo ga e kgolwe. ₈Se yo bohlale a holegago ka sona a feta setlatla ke eng? Sa mmotlana wa tsebo ke eng ge a swere ka tsela a bonwa ke ba phelago? ₉Se se lego kaone ke go bona ka mahlo; go phala go iša kganyogo kgole. Le tšona tše ke lefela, ke go phuthela moya ka kobo.

₁₀Tše di lego gona di reetšwe maina a tšona kgale, gwa tsebja se motho a lego sona; mme ga a kgone go sekiša yo a mo phalago ka maatla. ₁₁Gobane go na le tše ntši tše di bolelwago tša atiša mafela, tše di sa holego motho selo. ₁₂Gobane tše di holago motho bophelong bja lefela di tsebja ke mang? Matšatši a gagwe a sego makae ke a lefela, a feta bjalo ka thiti; mme ke mang a kago botša motho tše di tlogo tla fa tlase ga letšatši, ge a ile?