Isiraele a a theetše Melao. Metse ya botšhabelo
1Gomme bjale, Isiraele, theetša melao le mekgwa ye ke go rutago go dira ka yona gore le phele, gore le goroge le tšee naga ye Morena Modimo wa botataweno a le gago yona. 2Lentšu le nna ke go layago ka lona o se ke wa le eketša ka le lengwe, o se ke wa le fokotša. O hlokomele ditaelo tša Morena Modimo wa lena tše nna ke le lailego ka tšona. 3Mahlo a lena a bone se Morena a se dirilego Baali-Peoro; ka gobane bohle ba ba latetšego Baali-Peoro, Morena Modimo wa gago o ba fedišitše a ba ntšha mo go wena. 4Gomme lena ba le gomaretšego Morena Modimo wa lena, ka moka ga lena le sa phela le lehono.
5Bonang! Ke le rutile melao le mekgwa ka mo Morena Modimo wa ka a ntaetšego ka gona gore le dire ka yona le le nageng ye le yago go e tšea. 6E hlokomeleng le dire ka yona; ka gobane ke yona ye ba ditšhaba tše dingwe ba tlogo re ke bohlale bja lena, le thlaologanyo ya lena. E tlo re ge ba ekwa melao ye ka moka, ba re: Ruri setšhaba se segolo se ke se bohlale, sa thlologanyo!
7Ka gobane ga go sa na setšhaba se sekaakaa, seo medimo ya sona e lego kgaufsi le sona, bjalo ka Morena Modimo wa rena a le kgaufsi le rena ge re mmitša. 8Ke sefe setšhaba se sekaakaa, se se nago le melao le mekgwa e lokilego ya etša molao wo nna ke o beago pele ga lena lehono? 9O fele o tiiše go itota, o tiiše go diša moya wa gago gore o se lebale tše o di bonego ka mahlo, di se tloge pelong ya gago ka mehla yohle ge o sa phela; o di anegele bana ba gago, le bana ba bana ba gago. 10O se lebale tšatši lela le o bego o eme pele ga Morena Modimo wa gago ka lona thabeng ya Horebe, mola Morena a mpoditše a re: Nkgobelele setšhaba, ke ba kwiše mantšu aka, gore ba ithute go mpoifa ka mehla ka moka ya go phela ga bona lefaseng, ba be ba a rute le bana ba bona.
11La batamela la ema ka tlase ga thaba; thaba ya tuka mollo wa fihla kwa gare ga legodimo, gwa ba le lefsifsi, le leru, le boso. 12Morena a bolela le lena a le gare ga mollo, la kwa segalo sa mantšu, Yena Mong la se ke la mmona sebopego, la kwa lentšu fela. 13A le anegela tša kgwerano ya gagwe ye a le laetšego ka yona se le swanetšego go se dira, Mantšu a lesome, a a ngwala matlapeng a mabedi. 14Nna mohla woo Morena a ntaela a re ke le rute melao le mekgwa, gore le dire ka yona le le nageng ye le tlogo selela go yona la e tšea.
15Bjale le itoteng sa ruri -- ka ge le sa ka la bona sebopego sa Morena mola a bolela le lena a le gare ga mollo thabeng ya Horebe 16gore le se itshenye ka go ka itirela seswantšho sa Modimo, la bopa sebopiwa, la swantšha ka go bopa monna le ge e le mosadi, 17le ge e le seswantšho sa seruiwa sa mo lefaseng, goba sa nonyana ya diphego e fofago sebakeng, 18le ge e le sa tše gagabago mo fase, le ge e le sa hlapi e mo meetseng ka tlase ga lefase; 19gore o se emišetše mahlo a gago legodimong, wa bona letšatši goba kgwedi goba dinaledi, makoko ao a legodimo a go timetša wa a khunamela, wa direla ona ao, a Morena Modimo wa gago a a beetšego ditšhaba ka moka tše di lego ka tlase ga legodimo ka mo go fela. 20Ge e le lena, Morena o le hlaotše, a le ntšha sebešong sa tšhipi kua Egipita, gore le be setšhaba sa gagwe ruri, bjalo ka ge le le ba gagwe lehono. 21Gomme nna Morena o mpefeletšwe ka baka la lena, a ba a ena a re: O ka se ke wa ba wa sela noka ya Jorodane wa tsena nageng e botse yela ye Morena Modimo wa gago a go neago gore e be ya geno. 22Ka gona nna ke tlo hwela nageng yeno: noka ya Jorodane nka se ke ka e sela. Ba ba tlogo sela ba tšea naga e botse yeo ke bolena. 23Itoteng ge, gore le se lebale kgwerano ya Morena Modimo wa lena, ye a e dirilego le lena; gomme le se ke la ba la itirela seswantšho sa modimo, la swantšha tše Morena Modimo wa lena a di ileditšego. 24Gobane Morena Modimo wa gago ke mollo o tšhumago, ke Modimo yo bogale.
25E tlo re ge le šetše le atile ka bana le ka ditlogolo, ge le šetše le feditše lebaka le letelele le dutše nageng yeo, gomme la dira seswantšho sa modimo sa sebopego sefe le sefe, la dira se se befelago Morena Modimo wa lena, le mo nyamiša, 26gore legodimo le lefase ke dihlatse tša ka lehono ge ke re: Le tlo senyega ka pela nageng ye le yago go e tšea ge le sela noka ya Jorodane. Le ka se ke la phela mo go yona galelele, ka gobane le tlo fedišetšwa sa ruri. 27Morena Modimo wa lena o tlo le gašanya ditšhabeng, la šala le le sehlophanyana sa batho mo gare ga merafo yeo Morena a tlogo le rakela go yona. 28Gona kua le tlo direla medimo ye e dirilwego ke diatla tša batho ya dikwata le ya matlapa, ye e sa tsebego go bona le go kwa le go ja le go dupa. 29Ge le le gona kua ke mo o tlogo nyaka Morena Modimo wa gago, mme o tlo mo hwetša, ka gobane o tlo ba o mo tsomeša ka pelo ya gago ka moka le ka moya wa gago ka moka. 30Mo o tlogo ba o tlaletšwe, o wetšwe ke dilo tšeo ka moka mehleng e tlago, ke mo o tlogo sokologela go Morena Modimo wa gago, wa kwa se a se boletšego. 31Ka gobane Morena Modimo wa gago ke Modimo yo kgaugelo; a ka se ke a go lahla; a ka se ke a go lesa wa senyega; a ka se ke a lebala kgwerano ye a e dirilego le botataweno a e tiiša ka dikeno.
32Ka gobane ge o ka botšiša tša mabaka a kgale a mehla yela o sešo wa ba gona, go tloga mola Modimo a bopa motho lefaseng, wa botšiša wa fihla mo gohle mo legodimo le fihlago ntshe, o ka se ke wa hwetša tše kaakaa, goba wa kwa tše di swanago le tše, 33tša go re go na le setšhaba se se kwilego lentšu la Modimo a bolela a le gare ga mollo, bjalo ka ge wena o di kwile, mme wa phela. 34A goba Modimo o kile a leka go tla le go itlhaolela setšhaba se sengwe, a se ntšha go setšhaba se sengwe ka meleko le ka matete, le ka mehlolo le ka ntwa, le ka seatla se maatla le ka letsogo le le emišitšwego, le ka ditlaba tše dikgolo, tša swana le tšeo ka moka tše Morena Modimo wa lena a di dirilego lena kua Egipta, mme la di bona ka mahlo? 35Di dirilwe tša bonwa ke wena gore o tsebe ge Morena e le yena Modimo, yo go sego e a swanago le yena. 36O go kwišitše lentšu la gagwe a le legodimong gore a go rute; mo lefaseng a go bontšha mollo wa gagwe o mogolo, wa kwa lentšu la gagwe le etšwa gare ga mollo. 37A di dira ka gobane a ratile botataweno, a ikgethela ditlogolo tša bona mehleng a tlilego morago, a go ntšha Egipita ka noši ka maatla a gagwe a magolo. 38A raka ditšhaba tše kgolo tše di go fetago ka maatla ge o fihla, gore a go tliše fa, a go fe naga ya tšona. Ke tšona tše tša mehla yeno. 39Bjalo tseba gee, mme o se ke wa ba wa lebala, gore Modimo wa kua godimo magodimong le mono tlase lefaseng ke Morena; ga go sa na e mongwe. 40O hlokomele melao ya gagwe le ditaelo tša gagwe, tše ke go laetšego tšona lehono, gore o dule o thabile le bana ba gago ka mehla e tlogo tla, mme o phele galelele nageng ye Morena Modimo wa gago a go fago yona gore e be ya gago ka mehla.
41Mehleng yeo Moshe o hlaotše metse e meraro ya mošono wa Jorodane thoko ya bohlabela, 42gore e be ya go tšhabela mmolai e a bolailego wa gabo a sa dira ka boomo, a sa ka a mo hloya maabane le maloba; gore a kgone go tšhabela go o mongwe wa metse yeo a phela. 43O hlaotše motse wa Betsera wa kua lešokeng molaleng, ya ba wa Barubeni, le motse wa Ramothe wa kua Gileada, ya ba wa Bagada, le motse wa Gobani wa kua Basani, ya ba wa Bamanase.
44Ke yona melao ye Moshe a e anegetšego Baisiraele. 45Ke tša kgwerano le melao le mekgwa ye Moshe a e boditšego Baisiraele mola ba tšwile Egipita, 46ba le mošono wa Jorodane molapong o lebanego le Bethe-Peoro nageng ya Sihoni kgoši ya Baamori e a bego a dutše Hesiboni, yo Moshe a mo fentšego le Baisiraele mola ba tšwile Egipita. 47Ba tšea naga ya gagwe, le naga ya Ogo kgoši ya Basani, naga ya magoši a mabedi ao a bego a agile mošono wa Jorodane thoko ya bohlabela, 48go tloga ka motse wa Aroere mo nokeng ya Arimoni go fihla thabeng ya Sirione, ya Herimone, 49le molala ka moka o lego mošono wa Jorodane thoko ya bohlabela, go fihla Lewatleng la Molala patogeng ya thaba ya Pisiga.
