DOITERONOMIO 26

₁E re ge o tsene mo nageng ye Morena Modimo wa gago a go fago yona gore e be magae a lena, mme o šetše o dutše go yona, ₂o tšee dithakangwaga tša dienywa ka moka tša naga, tše o tlogo di ntšha nageng ya gago, o neilwe ke Morena Modimo wa gago, o di nokele serotong mme o ye felo mo Morena Modimo wa gago a tlogo go kgethela go bea leina la gagwe gona. ₃O tle go moperisita e a tlogo ba gona mohla woo, o mmotše o re: Lehono ke begela Morena Modimo wa ka gore ke fihlile mo nageng ye Morena a enetšego botatawešo a re o tlo ba fa yona.

₄Moperisita o tlo amogela seroto seo a se bea fase pele ga aletare ya Morena Modimo wa gago. ₅Ke mo o tlogo rapela Morena Modimo wa gago wa re: Tatawešo e be e le Mosiria wa moputlaputli, a fologela Egipita, a diilela gona a na le batho ba sego nene, a ba setšhaba se segolo gona kua, se se maatla se sentši. ₆Baegipita ba re dira bošula, ba re tlaiša, ba re rweša bohlanka bjo bothata. ₇Rena ra hlabela Morena Modimo wa botatawešo mokgoši; Morena a kwa ge re goeletša, a bona mahloko a rena, le mohlako wa rena, le go patikega ga rena. ₈Morena a re ntšha Egipita ka seatla se maatla, a emišitse letsogo la gagwe, ka tše kgolo tše di boifišago, le ka matete le mehlolo. ₉A ba a re fihliša felo fa, a re fa naga ye e elago mawsi le nose. ₁₀Bjalo šedi! Ke tliša dithakangwaga tša dikenyo tša naga ye o mphilego yona, wena Morena. O realo o di beile fase pele ga Morena Modimo wa gago; mme o lotšhe Morena Modimo wa gago. ₁₁O kgone go thabela tše botse ka moka tše Morena Modimo wa gago a go filego tšona, o na le ba lapa la gago, le Molefi, le modiiledi e a lego ga geno.

₁₂E re ge o phethile go ntšha karolo ya lesome ya dikenyo tša gago ka moka ka ngwaga wa boraro, e lego wona ngwaga wa tša lesome, o file Molefi le modiidi le sešuana le mosadi wa moholologadi, ba lle ba le dikgorong tša geno ba khoše, ₁₃gona o rapele Morena Modimo wa gago, o re: Tše kgethwa ke di ntšhitše lapeng ka di neela Molefi, le modiildi, le sešuana, le mosadi wa mohlologadi ka mo o ntaetšego ka gona. Ga go na taelo ye ke e fetilego le ye ke e lebetšego. ₁₄Ga nka ka ja selo mohla wa manyami; ga nka ka swara selo mohla ke na le seila; ga nka ka iša selo go badimo. Ke theeditše se Morena Modimo wa ka a mpoditšego sona; ke dirile ka mo a ntaetšego ka gona. ₁₅Anke o mpone hle, o le bodulong bjo bokgethwa bja gago legodimong, gomme o šegofatše setšhaba sa gago sa Isiraele, le naga ye o re filego yona, bjalo ka ge o enetše botatawešo, naga e elago maswi le nose.

₁₆Lehono le Morena Modimo wa gago o go laela go dira ka melao ye le ka mokgwa wo, gore o di hlokomele o dire ka tšona ka pelo ka moka le ka moya ka moka. ₁₇Lehono o boletše wa re: Morena ke yena Modimo wa gago, wa re o tlo swara ka tsela ya gagwe, wa kwa se a se bolelago. ₁₈Lehono Morena o re o botšwe gore o setšhaba sa gagwe se se mo enago hlogo ka mo a go boditšego ka gona, gore o hlokomele ditaelo tša gagwe ka moka, ₁₉gore a go hlaole mo go ditšhaba ka moka tše a di dirilego, o retwe, o tsebje, o godišwe, o be setšhaba se sekgethwa sa Morena Modimo wa gago, ka mo a boletšego ka gona.