E sa le melao ya go phedišana
1Ge banneng go ka tsoga phapang, mme ba ya go seka kgorong, go alhlolelwe moloki, sesenyi se tšuwe. 2Ge mosenyi a swanetšwe ke kgati, moahlodi a mo patlamiše, a itiwe pele ga gawe; dikgati di lekane molato. 3Dikgati e ka ba tše masome a mane; di se ke tša fetiša, gore ngwaneno a se ke a nyatšega ka dikgati tše di fetišago tšeo.
4Pholo ge e fola, o se ke wa e tlemelela molomo.
5Ge bana ba motho o tee ba agile ga mmogo, mme e mongwe wa bona a hwa a sa šie ngwana, gona mosadi wa gagwe a se ke a tšewa ke o šele; ngwanabo monna wa gagwe a tsene go yena, a mo tšee e be mosadi wa gagwe ka tshwanelo ya ngwanabo monna. 6Gomme morwa wa pele e a tlogo mmelega, o tlo balelwa monna wa pele, gore leina la gagwe le se ke la hwelela mo go Isiraele. 7Ge monna a sa rate go tšea mosadi eo wa ngwanabo, gona mosadi a rotoge a tle kgorong go ba bagolo, a bolele a re: Ngwanabo monna wa ka o gana go tsošetša ngwanabo leina go Isiraele; ga a rate go ntira ka tshwanelo ya ngwanabo monna. 8Ke mo bagolo ba motse wa gabo ba tlogo mmitša ba bolela le yena; gomme ge a ka tiiša a re: ga ke rate go mo tšea, 9gona mosadi eo wa ngwanabo a mmatamele gona moo bagolo ba le ntshe, a mo role seeta, a mo tshwele ka mare sefahlogong, mme a bolele a re: Ke tšona tše di dirwago monna e a sa agego lapa la ngwanabo. 10Gona lebitšo la gagwe mo go Isiraele e tlo ba la “Ga bomorolwaseeta”.
11Ge banna ba elwa, e le monna le ngwanabo, gomme mosadi wa e mongwe wa bona a re ke namolele monna wa ka, mme a iša seatla go yola e a mo itiago, a mo swara ka mapele, 12mosadi e mobjalo o mo kgaole seatla; leihlo la gago le se ke la mo gaugela.
13Mo mokotleng wa gago go se ke gwa ba le mehuta e mebedi ya kelo ya go ela boima. 14Mo ngwakong wa gago go se ke gwa ba le kelo ya ntlatla e kgolo le e nyenyane. 15O be le kelo e lokilego ya go ela boima, le ntlatla e lokilego ya go ela, gore o phele galelele nageng ye Morena Modimo wa gago a go fago yona. 16Ka gobane Morena Modimo wa gago o hlaswa bohle ba ba dirago tše bjalo, bohle ba ba forago.
17Le se ke la lebala tše Baamaleke ba le dirilego tšona mola le le tseleng le etšwa Egipita. 18Ka mo ba kilego ba le šwahlela tseleng le lapile, le swaretšwe, ba bolaya sekgoto sa lena sa ba ba bego ba latela ba fokola; mme ba dira ba sa boife Modimo. 19E re ge Morena Modimo wa gago a go khutšišitše manaba a gago ka moka a go dikaneditšego mo nageng ye Morena Modimo wa gago a go fago yona gore e be magae a lena, gona o fediše Baamaleke gore ba se ke ba hlwa ba tsebja ka tlase ga legodimo. O se ke wa lebala.
