DOITERONOMIO 15

₁Ge go fedile nywaga e šupago o dire khunollo. ₂Tša khunollo šedi: Mong wa molato, e a adimilego wa gabo, a se ke a lata molato go wa gabo, ka gobane go kwetše mogowo wa khunollo, ya Morena. ₃Molato go wa ditšhaba o ka o lata; fela, se se lego go ngwana weno se lese.

₄Mo go lena go se ke gwa ba le modiitšana, gobane Morena Modimo wa lena o tlo le šegofatša gagolo mo nageng ye a le fago yona, la e tšea ya ba ya lena, ₅ge le ka fela le theetša se Morena Modimo wa lena a se bolelago, la šetša ditaelo tše ka moka tše ke le laelago tšona lehono. ₆Gobane Morena Modimo wa lena o tlo le šegofatša bjalo ka ge a le boditše. Lena le tlo adima ba ditšhaba; fela, le ka se ke la adingwa, le tlo buša ditšhaba tše ntši; fela, tšona di ka se ke tša le buša.

₇Ge e mongwe wa bana beno a ka diila a le ga geno, goba a le motseng o mongwe wa nageng ya geno ye Morena Modimo wa lena a le fago yona le se ke la thatafiša pelo la mo tima. ₈O mo nee ka botho; o mo adime ka mo go lekanego tše a di hlokago. ₉O itote gore o se ke wa tlelwa ke bopelothata, wa re: Ngwaga wa go šupa, wa khunollo o batametše, mme wa tima ngwaneno o na le mahlomaso; gomme yena a go bega go Morena, ya ba molato. ₁₀Mo nee ka go rata, o se be pelo ntsho; gobane ge o dira bjalo Morena Modimo wa gago o tlo go šegofatša medirong ya gago ka moka, mo go tšohle tše o išago diatla go tšona. ₁₁Gobane badiidi ba ka se ke ba hlokega nageng; ke ka baka leo ke go layago ka re: O nee ngwaneno e a humanegilego wa modiitšana mo nageng ya geno.

₁₂Ge ngwaneno wa Mohebere, e ka ba monna goba mosadi, a ka ithekiša go wena, gona a go direle a fetše nywaga e selelago; ka wa go šupa o mo lese a hunologe. ₁₃Gomme ge o mo lesa a hunologa, o se ke wa mo gomiša a le fela. ₁₄O mmopelele tše ntši, tša dihuswane tša gago, le tša seboa sa gago, le tša dinkgong tša seboa sa gago, le tša dinkgong tša gago. O mo fe tše Morena Modimo wa gago a go šegofaditšego ka tšona. ₁₅O gopole gobane le wena o kile wa ba mohlanka nageng ya Egipita; mme Morena Modimo wa gago o go namoletše. Ke ka baka leo ke go layago ka mokgwa woo lehono.

₁₆Ge ngwaneno eo a ka re: Nka se ke ka tloga ka gobane wena le ba lapa la gago ke a le rata; a realo ka gobane a ekwa bose ge a dutše ga gago. ₁₇Gona o tšee tšhwana o phule tsebe ya gagwe o e hlakanye le lemati la mojako, a kgone go ba molata wa gago ka mehla; le molata wa mosadi o mo dire ka mokgwa woo. ₁₈Di se ke tša go thatafalela ge o mo hunolla, ka gobane tše a go diretšego tšona nywaga e selelago di lekana le moputso wa bathwalwa ba babedi; gomme Morena Modimo wa gago o tlo go šegofaletša tšohle tše o di dirago.

₁₉Maitšibulo ka moka a dipholwana a dikgomo le a dihuswane o a kgethele Morena Modimo wa gago; pholo ya gago ya leitšibulo o se ke wa e diriša modiro; o se ke wa kota maitšibulo a dihuswane tša gago. ₂₀O di je pele ga Morena Modimo wa gago o na le ba lapa la gago ka ngwaga o mongwe le o mongwe, le le felo mo Morena a tlogo go kgetha. ₂₁Ge e ka ba le bosodi, ge a ka hlotša, goba ge e foufetše, goba ge e ka ba le lebadi le le befilego, gona o se ke wa e hlabela Morena Modimo wa gago. ₂₂O e je dikgorong tša gago; e ka lewa ke e a sa sekegago le e a sekilego; bohle ba e je bjalo ka ge go lewa tshepe le ge e le kgama. ₂₃Fela madi a tšona o se ke wa a ja; ona o a tšhollele fase bjalo ka meetse.