Moshe o kgothatša Baisiraele gore ba boife Morena
1Mohla woo Morena a nthera a re: Ipetlele matlapa a mabedi a etšago ala a pele, o rotogele go nna thabeng, o itirele polokelo ka dimati. 2Mo matlapeng ao ke tlo ngwala mantšu ala a bego a le matlapeng ala a pele, a o a pšhatlilego; gomme o a nokele polokelong.
3Ka dira polokelo ka dimati tša moduhlare, ka betla matlapa a mabedi a etšago ala a pele, ka tseba go rotogela thabeng ke swere matlapa ao a mabedi ka diatla. 4Gomme yena a ngwala matlapeng ao lengwalo le le etšago lela la pele, Mantšu ala a lesome a a le boditšego ona a le thabeng gare ga mollo mohla wola wa phuthego; mme a nneela. 5Ka boa ka fologa thabeng, ka nokela matlapa polokelong ye ke bego ke e dirile. A sa le mo go yona ka mo Morena a ntaetšego ka gona.
6Bana ba Isiraele ba tloga Beerothe-Bene-Jaakane ba ya Mosera. Ke mo Arone a hwetšego ntshe; Eleasara morwa wa gagwe a ba moperisita legatong la gagwe. 7Ba tloga ntshe ba ya Gudegoda; ba tloga Gudegoda ba ya Jotebatha nageng ya dinoka tša meetse. 8Mohla woo Morena a kgetha lešika la Lefi gore ba rwale polokelo ya kgwerano ya Morena, ba hlankele Morena, ba mo direle, ba šegofatše batho ka leina la gagwe ka mokgwa wo wa lehono. 9Ke ka lebaka leo Balefi ba sa kago ba newa kabelo le naga ya bona le bana ba bobona, ka mo Morena Modimo wa gago a go laeditšego.
10Gomme nna ka fetša matšatši a masome a mane le mašego, a ona ke le thabeng bjalo ka mola pele; gomme Morena a nkwa mohla woo, a se ke a hlwa a rata go le fediša. 11Morena a ntaela a re: Tsoga, o ete setšhaba pele, ba yo tšea naga ye ke enetšego botatabo ka re ke tlo ba nea yona.
12Gomme, bjalo, Isiraele, Morena Modimo wa gago o nyaka eng go wena, ge e se gore o boife Morena Modimo wa gago, o sepele ditseleng tša gagwe mo go fela, o mo rate, o direle Morena Modimo wa gago ka pelo ka moka le ka maatla ka moka. 13O hlokomele ditaelo tša gagwe le melao ya gagwe ye ke go hlathollelago yona lehono, gore o letlege? 14O ke o bone; magodimo le magodimo a magodimo ke a Morena Modimo wa gago, le lefase le tšohle tše di lego mo go lona. 15Fela, ba a ratilego go ba rata ke botataweno, a itlhaolela bana ba bona ba mehleng ya ge ba ile, bolena; a le hlaola mo go ditšhaba tšohle. Ke tšona tša mehla yeno. 16Bjale bollang bošoboro bja dipelo tša lena; le se ke la hlwa le hlamalatša melala ya lena; 17gobane Morena Modimo wa lena ke yena Modimo wa medimo, ke yena Morena wa marena ohle, yena Modimo e mogolo, yo maatla, e a tšhabegago, e a sa bebego sefahlogo, e a sa amogelego seatla se kobong, 18Moloki kahlolong, Moratatšhuwana le mohlologadi le modiidi, a ba nea bogobe le dikobo. 19Le lena ratang badiidi, ka gobane le be le le badiidi kua nageng ya Egipita. 20Morena Modimo wa gago o mmoife, o mo direle, o mo gomarele, o ene ka leina la gagwe. 21Ke yena Moretwa wa gago, Modimo wa gago, e a go diretšego tše kgolo le tše di tšhabegago, tše mahlo a gago a di bonego. 22Botatago ba fologetše kua Egipita e le batho ba masome a šupago; bjale Morena Modimo wa gago o go atišitše bjalo ka dinaledi tša legodimo.
