DANIELE 9

₁Ka ngwaga wa pele wa pušo ya Dario morwa wa Ahasiberose wa moloko wa Bameda, yo e bego e le kgoši ya mmušo wa Bakaladea, ₂Ka wona ngwaga wa pele wa pušo ya gagwe, nna Daniele ka hlokomela palo ya nywaga ye e beilwego ke lentšu la Morena la go tlela moporofeta Jeremia, ge a re: Go tlo feta nywaga e masome a šupago motse wa Jerusalema e le mašope. ₃Ka iša mahlo go Modimo Mong a bohle, ka mo nyaka ka dithapelo le ka diphegelo, le ka go ikona ke apere lenkgeretla ke le moloreng. ₄Ka rapela Morena Modimo wa ka, ka itshola ka re: Joo Mong a ka! Modimo e mogolo e a tšhabegago! Ba ba go ratago, le ba ba yago ka melao ya gago o dula o ba botegetše ka kwano le ka kgaugelo.

₅Go sentše rena; re dirile bokgopo le bobe; re go beetše mereba ka go arogana le melao ya gago le mekgwa ya gago. ₆Le gona ga ra kwa baporofeta bahlanka ba gago, ba go bolela ka ina la gago le magoši a rena le bagolo ba rena, le botatawešo, le setšhaba ka moka sa naga ya gešo. ₇Toko e go wena Mong a rena! Sa rena ke difahlogo tše di llwego ke dihlong, ka ge banna ba Juda le baagi ba Jerusalema le Baisiraele ka moka ba kgauswi le ba kgole o ba leleketše dinageng ka moka ka baka la masenyi a bona a ba go rumotšego ka ona. ₈E, go bjalo Morena! Se se re swanetšego, rena le dikgoši tša rena, le bagolo ba rena le botatawešo, ke tšona difahlogo tše di llwego ke dihlong, ka gobane re go senyeditše. ₉Fela, Modimo Mong a rena ke yo kgaugelo le wa tebalelo, le ge re mo hlanogetše, ₁₀ra gana go kwa se Morena Modimo wa rena a se bolelago, ra gana go ya ka melao ya gagwe, ye a e beilego pele ga rena ka bahlanka ba gagwe ba baporofeta. ₁₁Baisiraele ka moka ba lahlile molao wa gagwe ba hlanoga, ba gana go kwa ge o bolela le bona. Molato ke wona woo, ge re tletšwe ke mahlolakotši a a ngwadilwego molaong wa Moshe mohlanka wa Modimo, ka gobane re go senyetše. ₁₂O dirile tše o di boletšego ge o kgala babuši ba rena ba ba bego ba re buša, wa re o tlo re tlišetša kotši e kgolo, ye ka tlase ga legodimo go se tlo ba le e nngwe e lekanago le yeo e tlogo tlela motse wa Jerusalema. ₁₃Dikotsi ka moka di re tletše bjalo ka ge go ngwadilwe molaong wa Moshe; rena ra lesa go boelana le Morena Modimo wa rena; ga ra ka ra lahla makgopo a rena; ga ra ka ra ela therešo ya gago hloko. ₁₄Morena a eleletša tša go tliša dikotši; a di tliša godimo ga rena. Gobane Morena Modimo o ya ka toko medirong ya gagwe ka moka ye a e dirago; go sentše rena ka go se kwe ge a bolela le rena.

₁₅Gomme bjale Morena Modimo wa rena! Wena o kilego wa ntšha setšhaba sa gago nageng ya Egipita ka seatla se maatla, wa retiša ina lago le nankhono! Rena re basenyi, re mašaedi. ₁₆Mong a rena, le go e eya ka tokotoko, hle gomiša kgalefo ya gago e wetšego motse wa Jerusalema, Thabakgethwa ya gago; gobane ke dibe tša rena, ke molato wa botatawešo, ge motse wa Jerusalema le setšhaba sa gago di nyadiwa ke bohle ba ba dutšego tikologong. ₁₇Gomme bjale, Modimo wa rena, kwaa thapelo ya mohlanka wa gago, ge a go kgopela. Sekgethwa sa gago sela se se phušotšwego o se edišetše sefahlogo sa gago, ka baka la gago wena Mong a rena. ₁₈Modimo wa ka! Sekega tsebe o kwe! Lebelela o bone marope a rena, motse woo o bitšwago ka leina la gago; ka gobane, ge re bea ditopo tša rena pele ga gago, ga re bone toko ya rena; re bona dikgaugelo tše kgolo tša gago. ₁₉Mong a rena! Re kwe hlee! Mong a rena! Lebelela hlee! Mong a rena phafoga! O dire e le go itirela wena Mong, Modimo wa ka, ka gobane motseng woo wa gago, le setšhabeng sa gago, ke mo go bolwago leina la gago.

₂₀Ke be ke sa rapela ke kgopela ke ipobola dibe tša ka le dibe tša setšhaba sa gešo sa Isiraele, ke bea ditopo tša ka pele ga Modimo wa ka ka baka la thaba e kgethwa ya Modimo wa ka. ₂₁Ke sa rapela ke realo, gwa tla monna yola Gabriele, yo ke mmonego ponong yela ya mathomo; a tla a fofa a hlaganela, a tla kgauswi, e le lebaka la sedimo sa mantšiboa. ₂₂A bolela le nna a re: Daniele! Nna bjale ke tlile gore ke go rute go lemoga. ₂₃Lentšu le ke tlilego go go botša lona le tšweletše mola o thoma go rapela; ka gobane o moratiwa. Theetša gee, o hlaloganye tša dipono.

₂₄Ke dibeke tše masome a šupago tše di beetšwego setšhaba sa geno le motse wa geno o mokgethwa, gore go fedišwe dikarogo, go lebalwe dibe, go dirwe poelano, go tšweletšwe toko ye e sa felego, go phethege dipono le diporofeto, go tle go kgakolwe Sekgethwakgethwa. ₂₅Bjale tseba o kwešeše; go tloga ka lebaka la ge lentšu la go re Jerusalema go buše go agiwe go fihla go Motlotšwa Moetapele, ke beke tše di šupago. Ka beke tše masome a selelago a metšo e mebedi go tlo agiwa merako le mekgoba; fela, e le mehla e methata. ₂₆Ge go fetile dibeke tše masome a selelago a metšo e mebedi, Motlotšwa o tlo tlošwa, a se ke a hlwa a eba gona; gomme motse le Sekgethwa di tlo senywa ke setšhaba sa kgoši e tlogo tla, ye e tlogo fela ka go gogolwa ke lefula; mme go fihla mafelong go tlo dula go na le dintwa le go thubiwa. ₂₇Ba bantši o tlo ba thatafaletša kgwerano beke e tee; bogareng ga beke o tlo kgaotša sedimo le sebego, mme mosenyi o tlo tla ka diphego tša makgapha; yena mosenyi a tlo ba a tšhologelwa ke kotlo ye e mmeetšwego.