Pono ya mebušo ya lefase
1Ka ngwaga wa boraro wa pušo ya kgoši Belesatsara, nna Daniele ka tlelwa ke e nngwe pono gape, ya latela yela ka go e bona pele. 2Ka bona ke le motseng wa Susane mošate wa Elama; ponong ka ikhwetša ke le nokeng ya Ulai. 3Ka emiša mahlo ka bona kgapa e eme hleng ga noka, e na le dinaka tše pedi, e le tše telele; le lengwe le feta le lengwe ka botelele; le letelele lona le tšweletše, lela le lengwe le šetše le le gona. 4Ka bona kgapa yeo e oma ka dinaka, ya leba thoko ya bodikela le ya leboa le ya borwa, go se e nngwe e kgonnego go hlabana le yona; go se e a kgonnego go namolela ge e hlaba; e be e dira ka mo e ratago; e fela e gola.
5Ka re ke sa lebeletše ka bona phoko e etšwa bodikela, e ralala godimo ga lefase ka moka e sa gate fase. Phoko yeo e be e na le lenaka le legolo gara phatla. 6Ya fihla go kgapa yela ya dinaka tše pedi, ye ke e bonego e eme hleng ga noka, ya e kutologela ka maatla a sehlogo. 7Ka bona e fihla go kgapa e e galefetše, ya e thula, ya thokga dinaka tše pedi tša yona. Kgapa yona e be e se ne maatla a go lwa le yona; phoko ya e uša, ya e gatakela, go se e a kago namolela kgapa.
8Yona phoko ya gola ka kudu; ya re e šetše e tiile maatla, lenaka leo le legolo la yona la kgolega; mme sebakeng sa lona gwa tšwa dinaka tše nne tše kgolo, di lebile thoko tše nne tša legodimo. 9Le lengwe la dinaka tšeo la tšwa lenaka le lenyenyane; lona le la gola ka kudu la lemela thoko ya naga e rategago. 10La ikgodiša la fihlela makoko a legodimo; makoko a mangwe la a ušetša fase, le dinaledi tše dingwe la di gatakela. 11La ithotobatša la ba la fihla kgošing ya makoko ao, la iletša didimo tša ka mehla, la senya Moago o mokgethwa wa gagwe. 12Makoko a gafiwa, le didimo tša ka mehla, ka baka la bokgopo; la uša therešo, la dira la kgona.
13Ya ba gona ke kwago go bolela e mongwe wa bakgethwa. E mongwe wa bakgethwa a mmotšiša a re: Tša pono ye, tša ge go iletšwa sedimo sa ka mehla, tša tlhanogo ye e senyago, tša ge Moago o mokgethwa le makoko di gafetšwe go gatakwa, di tlo fela neng?
14A botša nna a re: Go tlo balwa mantšiboa le masa a dikete tše pedi le makgolo a mararo, ya ba gona Moago o mokgethwa o tlogo boelwa ke toko.
15Nna Daniele, ka re ke sa eme ke lebeletše pono yeo, ke sa nyaka tlhathollo ya yona, ka bona pele ga ka go eme yo e kego ke monna. 16Ka kwa lentšu le etšwa nokeng ya Ulai, le re: Gabriele! Mo hlathollele pono yeo! 17Gabriele a tla a ema hleng ga ka; nna ka tšhoga ka khunama ka lotšha.
Yena a re: Wene ngwana motho, thaetša! Ka gobane pono ye ke ya lebaka la bofelo. 18A re a sa bolela, nna ka idibala, ka wela fase ka sefahlogo; yena a ntshwara a nkemiša mo ke bego ke eme gona, 19A re: Tseba gore ke go botša tše di tlogo tšwelela lebakeng la kgalefo e tlogo tla, ka gobane ke tša lebaka la bofelo.
20Kgapa ye o e bonego ya dinaka tše pedi, ke dikgoši tša Bameda le Baperesia. 21Phoko yela ya maboya ke kgoši ya Bagerika; lenaka le le medilego makgatheng a mahlo a yona, ke kgoši ya mathomo. 22Ge mo go kgolegilego lenaka leo la pele go medile dinaka tše nne, ke go re setšhaba seo se tlo tšwa mebušo e mene ye e sa lekanego le wa lona.
23E tlo re ge mebušo yeo e fedile, e tlaleleditše bosenyi bja yona, ke mo go tlogo tšoga kgoši e šoro ya maano a mabe. 24Maatla a yona a tlo gola, le ge e se ka maatla a yona ka nnoši. E tlo senya ka mokgwa o tlabago, ya atlega go direng, ya senya ba maatla, ya hloya setšhaba sa bakgethwa. 25E tlo ba le mahlatse ka mamenemene a yona; e tlo dira e ipotile ya senya ba bantši ba ba dutšego ba iketlile. E tlo ba ya rumola le Kgoši ya dikgoši; ya ba mo e tlogo pšhatlaganywa, e sego ka seatla sa motho. 26Pono yela, ya ge o botšwa tša mantšiboa le tša masa, ke therešo; fela wena, tše o di bonago o di dire thopa, ka gobane ke tša mehla e sa lego kgole.
27Gomme nna Daniele ka kwa ke fokola, ka fetša matšatši ke babja; ka tsebo tsoga ka dira mediro ya kgoši; ka hlwa ke tlabegile ka pono yeo, go se e a di tsebago.
