Daniele moleteng wa ditau
1Dario wa Meda o tšere bogoši a na le nywaga e masome a selelago a metšo e mebedi.
2Yena Dario o hweditše e le mo go botse ge a bea bakgoma ba lekgolo le masome a mabedi mmušong wa gagwe, ba kgone go o buša wohle. 3Mo go bona bao a bea bagolo ba bararo; e mongwe wa bona e be e le Daniele. Bakgoma ba be ba swanetše go diga ditaba go ba bararo bao, gore kgoši e se senyegelwe ke selo. 4Daniele yena o be a phala bakgoma le bagolo, ka gobane go yena go be go na le moya o phagamilego; kgoši ya ba ya re e tlo mmea molaki wa mmušo ka moka. 5Bagolo le bakgoma ge ba di bona, ba lakana Daniele gore ba mmee molato ka tša mmušo; ba šitwa go hwetša molato le ge e le phošo; ka gobane Daniele o be a botega, ka gobane Daniele o be a botega, go sa hwetšwe bošaedi le ge e le tshenyo mo go yena. 6Banna bao ba re: Go Daniele yo, re ka se ke ra hwetša molato, ge e se ge re ka o hwetša ka thokong ya melao ya Modimo wa gagwe.
7Bagolo bao le bakgoma ba tla go kgoši ka go hlaganela, ba re: Kgoši Dario! Phela go ya go ile! 8Ba re: Balaki bohle ba mmušo, le bagolo, le bakgoma, le matona, le dikala, ba kwane gore go bewe molao wa kgoši, go ntšhiwe taelo ye e tiišitšwego, ya go re: Mang le mang e a kago kgopela selo go modimo ofe le ofe, le ge e le go motho yo mongwe ka matšatši a a masome a mararo, ge e se go wena kgoši, a lahlelwe legageng la ditau. 9Ba re: Bjale kgoši, tiiša molao woo ka lengwalo, gore o se tlo fetolwa; go dirwe ka mokgwa wa Bamede le Baperesia wa go re: Molao ga o hlanošwe. 10Kgoši Dario a tiiša molao woo ka lengwalo. 11Daniele ge a ekwa gore molao woo o ngwadilwe, a ya ngwakong wa gagwe, wo o bego o na le ngwakwana wa godimo wa mašoba a lebilego Jerusalema, mo a bego e eya ka mehla gararo, a khunama a rapela Modimo wa gagwe, a mo leboga. Le bjalo a dira ka mokgwa woo wa ka mehla.
12Banna bao ba tla ka go hlaganela, ba hwetša Daniele a tliša dithapelo le dikgopelo go Modimo wa gagwe. 13Ba napa ba tla pele ga kgoši, ba botšiša tša molao wola o beilwego ke kgoši, ba re: A ga wa ka wa bea molao wa go re: Mang le mang e a kago kgopela selo go modimo ofe le ofe, le ge e le go motho e mongwe, ka matšatši a a masome a mararo, ge e se go wena kgoši, o tlo lahlelwa legageng la ditau?
Kgoši ya fetola ya re: Taelo yeo e tiile ka mokgwa wa Bameda le Baperesia wa go re: Molao ga o hlanošwe.
14Bona bjale ba bolela le kgoši ba re: Daniele, e mongwe wa Bajuda ba ba thopilwego, o a go nyatša, wena kgoši; o nyatša le molao wola o o beilego; ga a re selo ka wona; o fela a rapela gararo ka letšatši.
15Kgoši ge a ekwa taba yeo, a šulafala ka kudu, a akanya pelong ya gagwe ka mo a kago hlakodiša Daniele; letšatši la dikela a sa itapiša go ka mo phološa. 16Fela, banna bala ba napa ba tiišetša go tla go kgoši, ba fela ba re: Kgoši tseba gobane go rena Bameda le Baperesia molao wo o beilwego ke kgoši ga o hlanošwe.
17Kgoši ya ba ya laela fore Daniele a tlišwe, gore a lahlelwe legageng la ditau. Kgoši ya bolela le Daniele ya re: Modimo wa gago yo o mo hlankelago ka mehla, a ke a go hlakodiše! 18Gwa pshikološwa leswika la tswalela legaga leo, mme kgoši a le bea seka sa palamonwana ya gagwe, le dika tša dipalamonwana tša bagolo ba mošate, e le go re taba ya Daniele e ripilwe. 19Kgoši ya boela ngwakong wa yona wa bogoši; bošego bjoo ya yo lala le tlala; ya gana ge go letšwa diletšo; ya lala e hlobaela.
20Ya re ge go esa, kgoši ya tsoga; ge go thoma go etša, ya hlaganela ya tšwela legageng la ditau. 21Ge e fihla moo, ya bitša Daniele e hlokofetše, ya re: Daniele wena mohlanka wa Modimo a phelago! A Modimo wa gago yo o mo hlankelago ka mehla, a o kgonne go go hlakodiša ditaung?
22Daniele a fetola a re: A kgoši e phele go ya go ile! 23Modimo wa ka o romile Morongwa wa gagwe a khuparetša melomo ya ditau, di se ntire selo, ka gobane Modimo o hweditše ke se ne molato go yena; le go wena kgoši ga ka senya selo.
24Kgoši ya thaba gagolo; ya laela ya re Daniele a ntšhwe mo legageng. Gomme ge a etšwa moo legageng, gwa hwetšwa a se na mo a gobetšego, ka gobane a botile Modimo wa gagwe. 25Bjale kgoši ya laela ya re go tlišwe banna bala ba go bega Daniele; mme bona le bana ba bona le basadi ba bona ba lahlelwa legageng la ditau. Ditau tša ba swara ba sešo ba fihla, tša ba pšhatlaganya marapo ka moka.
26Bjale kgoši Dario a ngwalela ba ditšhaba ka moka, le ba merafo ka moka, le ba maleme ka moka, ba ba agilego nageng ka moka, a re: Molao wa lena a e be o mogolo! 27Ke beile molao wa go re dinageng ka moka tša mmušo wa ka go boifše Modimo wa Daniele, a lotšhwe, yena Modimo a phelago, Mobagona wa neng le neng, Mong a mmušo o sa senyegego, wa bogoši bjo bo sa felego. 28Ke Mophološi le Monamoledi; o dira mehlolo le dimakatšo kua godimo le mo lefaseng. O phemetše Daniele marofa a ditau.
29Daniele yena a ba monna e mogolo mmušong wa Dario, le mmušong wa Korese wa Peresia.
