Daniele o hlathollela Nebukadinetsara diloro
1Kgoši Nebukadinetsara o ngwalela ba ditšhaba ka moka, le ba merafo ka moka le ba maleme a šele ba ba agilego lefaseng ka moka, o re:
Molao wa lena a e be o mogolo! 2Ke hweditše e le mo gobotse ge ke tsebatša mehlolo le matete, a Modimo yo godimodimo a ntiretšego ona. 3Mehlolo ya gagwe ke e megologolo! Matete a gagwe ga se ka maatla! Mmušo wa gagwe ke wa go se fele. Bogoši bja gagwe ke bja melokoloko!
4Nna Nebukadinetsara ke be ke dutše ngwakong wa ka ke iketlile, ke thabile ke le mo ntlong ya ka ya mošate. 5Ka lora diloro tše di ntšhošitšego; ka tlaletšwa ke megopolo ke le malaong; ka tlaletšwa ke dipono tša hlogo ya ka. 6Ka ntšha taelo ka re ba bohlale bohle ba Babele ba tlišwe pele ga ka, ba tle ba mpotše tlhathollo ya diloro tšeo. 7Gwa tla ba dinoge, ba ditaola, le ba mahlale, le batsebi ba dinaledi, ka ba anegela tše ke di lorilego; ba šitwa go mpotša tlhathollo ya tšona. 8Tša fela ka ge go etla Daniele, yo a reilwego ka la modimo wa ka a thwe Belesatsara, yo moya wa medimo e mekgethwa o lego mo go yena, ka mo anegela diloro tša ka, 9Ka re: Belesatsara, wena mogolo wa ba bohlale, wena ke tsebago gore moya wa medimo e mekgethwa o go wena, le gore ga go phihlo e kago go palela! še pono ya diloro tša ka; mpotše tlhathollo ya yona.
10Se pono ya hlogo ya ka ke le dilaong: Ke bone sehlare se le gare ga dinaga, e le se setelele ka kudu. 11Sehlare seo sa fela se gola se tia, ntlha ya ba ya fihla kua legodimong, sa bonwa ke ba magomo a lefase lohle. 12Mahlare a sona e le a go taga; dikenyo tša sona e le tše dintši, di lewa ke bohle; moriting wa sona gwa khuta diphoofolo tša lefase; nonyana tša sebakeng tša aga dihlaga makaleng a sona; tšohle tše di phelago tša sela mo go sona.
13Ka re ke sa le ponong yeo ya hlogo ya ka, ka bona Mohlapetši e mokgethwa a fologa kua magodimong, 14A hlaboša lentšu a goelela a re: Remang sehlare seo, le kgaole le makala a sona, le se hlohlore matlakala, le lahle dienywa tša sona. Diphoofolo a di tloge moriting wa sona; dinonyana a di tloge makaleng a sona. 15Fela le šadiše thito ya sona mmung; e šale e tlemilwe ka ditshipi le mefiri, gona moo mabjanyeng a matala a molala, e fele e koloba ka phoka ya legodimo, e šielane tše di tala tša nageng le diphoofolo. 16Pelo ya yona ya motho, a e fetoge e be ya phoofolo, go be go fete mabaka a šupago. 17Ke tšona tše di rerilwego ke Bahlapetši; ke yona taelo ya Bakgethwa, gore ba ba phelago ba tsebe ge Yogodimodimo a buša bogoši bja batho; o bo nea yo a ratago go mo nea bjona; le mothwana wa mmotlana a ka mmea a ba buša.
18Ke tšona diloro tše nna kgoši Nebukadinetsara ke di bonego. Bjale wena Belesatsara, mpotše tlhathollo ya tšona, ka gobane ba bohlale ka moka ba mmušo wa ka ba paletšwe ke go ka ntlhathollela. Ge e le wena o a kgona, ka gobane moya wa medimo e mekgethwa o go wena.
19Daniele e a reetšwego la Belesatsara, a fetša lebaka a tšhogile, a tlaletšwe ke megopolo ya gagwe; kgoši ya ba ya re: Belesatsara, diloro tše le tlhathollo ya tšona di se go tlaletše!
Ya ba gona Belesatsara a fetolago a re: Mong aka! A diloro tšeo di ele ba ba go hloilego; tlhathollo ya tšona e ele manaba a gago. 20Sehlare se setelele se tiilego, seo o se bonego, seo ntlha ya sona e fihlago magodimong, se se bonwago ke lefase lohle, 21sa mahlare a a tagilego, le dikenyo tše dintši, sa go lewa ke bohle, sa go khutiša diphoofolo moriting, sa agiša dinonyana tša sebakeng makaleng a sona,
22Kgoši, sehlare seo ke wena, o lego yo mogolo le yo maatla; gobane bogolo bja gago bo rotobetše kua legodimong, bogoši bja gago bo fihla magomong a lefase. 23Bjale ge kgoši e bone Mohlapetši e mokgethwa a fologa kua magodimong, a re: Remang sehlare seo le se fediše; fela, le šadiše thito ya sona mmung, e šale e tlemilwe ka ditshipi le ka mefiri gona moo mabjanyeng a matala a molala, e kolobe ka phoka ya legodimo, e šielane tše tala tša nageng le diphoofolo, go be go fete mabaka a šupago.
24Kgoši, tlhathollo ya tšona še: Yogodimodimo o laile tše di tlogo tlela wena kgoši mongaka. 25O tlo lelekwa bathong wa dula le diphoofolo tša naga, o fula bjang le dikogmo, o koloba ka phoka ya legodimo, gwa tlo ba gwa feta mabaka a šupago, ya tlo ba gona o lemogago gore mebušo e bušwa ke Yogodimodimo, mme o e nea yo a ratago go mo nea yona; 26Fela, ka ge go laetšwe go šadiša thito ya sehlare seo mmung, mmušo wa gago o tlo boela o go tiela ge o šetše o lemogile gore dilo tšohle di bušwa kua legodimong. 27Bjale kgoši, a amogele keletšo ya ka ge ke re: Fediša dibe tša gago ka toko, o fediše molato wa gago ka go šetša bahlaki, mohlomongwe o tielwe ke modula.
28Dilo tšeo ka moka, kgoši Nebukadinetsara di mo tletše. 29E itše ge go fetile dikgwedi tše lesome le metšo e mebedi, a itshepelela mathuding a ngwako wa bogoši motseng wa Babele, 30A bolela a re: Šo motse o mogolo wa Babele wo nna ke o agilego ka maatla a ka a magolo, ya ba motse wa mošate, ya tlo ba sereto sa bogoši bja ka.
31Polelo yeo ya re e sa tšo tšwa molomong wa gagwe, gwa kwala lentšu le etšwa legodimong, la re: Wena kgoši Nebukadinetsara o botšwa gore mmušo o go tlogile! 32O tlo lelekwa bathong, wa dula le diphoofolo tša naga, wa fula bjang bjalo ka dikgomo. O tlo fetwa ke mabaka a šupago, wa tlo ba wa lemoga gore mebušo e bušwa ke Yogodimodimo, mme o e nea yo a ratago go mo nea yona.
33Lentšu leo la napa la mo phethegela ka nako yeo. Nebukadinetsara a lelekwa bathong, a fula bjang bjalo ka kgomo, mmele wa gagwe wa koloba ka phoka ya legodimo; meriri ya gagwe ya gola ya telefala wa diphofa tša lenong, le dinala tša gagwe tša ka tša lenong.
34Ge go fetile mabaka ao a beilwego, nna Nebukadinetsara ka iša mahlo kua legodimong, ka boelwa ke tlhaologanyo, ka reta Yogodimodimo, ka tumiša yena Mophelamoka, ka mo godiša ka re: Bogoši bja gagwe ke bjo bo sa felego, mmušo wa gagwe ke wa melokoloko ya meloko. 35Baagi bohle ba lefase a ka re ga se selo; mašaba a legodimong le baagi ba lefase o ba buša ka mo a ratago; ga go e a kago phema letsogo la gagwe, le a kago mo re: O dirang?
36Ka lona lebaka leo ka boelwa ke tlhaologanyo; le bogolo bja mmušo wa ka, le borena bja ka, le letago la ka, tša boela tša tla go nna; matona a ka le bakgoma ba ka ba tla go mpona ke boetše ka ba kgoši, ke filwe bogolo bjo bo fetišago bja mola pele.
37Bjale nna Nebukadinetsara ke reta kgoši y legodimo, ke a mo godiša, ke a mo tumiša, gobane mediro ya gagwe ka moka ke ya therešo, ditsela tša gagwe ke tša toko: o ne maatla a go kokobetša baipoti.
