DANIELE 2

₁Nebukadinetsara, ka ngwaga wa bobedi wa mmušo wa gagwe o kile a lora diloro; pelo ya gagwe ya tšhoga, a felega boroko. ₂A laela gore go bitšwe dingaka le didupe le mekome le ba bohlale, a re ba tle ba hlathollele kgoši diloro tšeo; ba tle ba eme pele ga kgoši. ₃Kgoši ya bolela le bona ya re: Ke lorile diloro; pelo ya ka e belaela ge nka tseba tše ke di lorilego.

₄Ba bohlale ba bolela ka mmolelo wa bona wa Searamo, ba re: A kgoši e phele go ya go ile! E ke e botše rena bahlanka ba yona diloro tša yona; ke mo re tlogo bola tlhathollo.

₅Kgoši ya fetola ya re: Lena Bakaladea! Go nna go tiile taba ye: Ge le sa mpotše diloro tša ka le tlhathollo ya tšona, gona le tlo kgabutlwa, nywako ya lena ya rutlwa ya šala e le dithobolo. ₆Fela ge le ka mpotša diloro tšeo le tlhathollo ya tšona, gona ke tlo le nea dimpho tše dintši, ka le humiša ka tše kgolo. Bjale mpotšeng diloro tšeo le tlhathollo ya tšona.

₇Ba boela ba fetola ba re: A kgoši e botše bahlanka ba yona diloro tšeo, re kgone go bola tlhathollo.

₈Kgoši ya re: Bjale ke tseba se e lego taba: Le rata go ntetetša, ka ge le bona gore ke tiiša se ke se boletšego, ₉ka re, ge le sa mpotše diloro tšeo, se se tlogo phethega ke se tee seo ke se boletšego. Lena le lakane go bolela maaka le bofora fa pele ga ka, gore lebaka le be le fete. Bjale mpotšeng se ke se lorilego; ke mo ke tlogo bona gore le go hlatholla le a kgona.

₁₀Ba bohlale ba fetola ba re: Kgoši, mo lefaseng ka moka ga go motho e a kago botša kgoši taba yeo; le gona ga go ešo gwa ba le kgoši, le ge e le e kgolo le e maatla, e kilego ya nyaka tše bjalo go ngaka, le ge e le go sedupe, le go yo bohlale. ₁₁Taba ye kgoši a e nyakago ke e thata; ga go motho e a kgonago go nyepolela kgoši tše bjalo, ge e se Modimo e a sa dulego le batho ba nama.

₁₂Kgoši ya befelwa ya galefa gagolo, ya laela ya re ba bohlale bohle ba Babele ba bolawe. ₁₃Ya re ge go tšwele taelo yeo ya go re ba bohlale ba bolawe, gwa nyakwa le Daniele le bagwera ba gagwe gore ba bolawe.

₁₄Daniele a ya go Arioko letona la madira a mošate, e a bego a tšwela go bolaya ba bohlale ba Babele, a bolela le yena ka pelokeledi le ka tlhaologanyo, ₁₅A re: Molao wo wa kgoši o hlaganetšwa kang? Arioko a mo anegela ditaba tšeo.

₁₆Daniele a ya a kgopela kgoši go fiwa lebaka la gore a nyarolele kgoši tlhathollo ya diloro. ₁₇Daniele a boela ngwakong wa gagwe go bagwera ba gagwe, Hananya le Misaele le Asaria, a ba botša ditaba tšeo, ₁₈A re ba kgopele Modimo wa magodimong go dira ka kgaugelo tabeng ye e sa tsebjego ke motho, gore Daniele le bagwera ba gagwe, le ba bohlale bala ba bangwe ba Babele, ba se ke ba bolawa. ₁₉E le bošego Daniele a utollelwa phihlo yeo ka pono, a reta Modimo wa magodimong. ₂₀A re: A go retwe leina la Modimo mehleng ya neng le neng le ka go sa felego, gobane bohlale le maatla di na le yena. ₂₁Ke yena Mophekgodi wa tša kgale le tša pakeno, Morakamagoši, a bea magoši; bahlale bohlale ba fiwa ke yena; ke yena a neago wa temogo tsebo. ₂₂Moutolodi wa diphiri le diphihlo, Mohlathatšaswiswing; seetša se agile mo go yena. ₂₃Modimo wa botatawešo, ke a go leboga, ke a go tumiša; o mphile bohlale, wa mpha le maatla, wa nkutollela se re go kgopetšego sona, wa re tsebiša taba tša kgoši.

₂₄Daniele a napa a ya go Arioko, yo kgoši a mo laetšego go bolaya ba bohlale ba Babele, a bolela nae a re: Ba bohlale ba Babele o se ke wa ba bolaya; nkiše kgošing ke botše kgoši tlhathollo ya diloro tšeo.

₂₅Arioko a akgofa a iša Daniele go kgoši, a re: Ke hweditše monna e mongwe wa mathopša a Juda, e a tlogo botša kgoši tlhathollo ya diloro tšela.

₂₆Kgoši ya bolela le Daniele e a bego a reetšwe la Belesatsara, ya re: A o tlo kgona go mpotša diloro tše ke di bonego le tlhathollo ya tšona?

₂₇Daniele a fetola a re: Phihlo yeo kgoši a e botšišago, ba bohlale, le dinoge, le bamangwalo, le mekome, ba ka se ke ba kgona go e botša kgoši. ₂₈Go na le Modimo wa legodimong, Moutolodi wa diphihlo. Yena o tebišitše kgoši Nebukadinetsara tše di tlogo tšwelela mehleng ye e tlogo tla. Diloro tša gago le dipono tše o di bonego o le malaong, šedi:

₂₉Wena kgoši, o itše o le malaong a gago wa tsogelwa ke megopolo ya tše di tlogo tšwelela mehleng e tlago; mme yena Moutolodi wa diphihlo a go tsebiša tše di tlogo tšwelela. ₃₀Ge e le nna tša yona phihlo yeo ga nka ka di nyarola ka bohlale bjo bo ka bago go nna bja phala bja ba bangwe ba ba phelago. Nna ke utolletšwe gore kgoši e hwetše tlhathollo, gore o tsebe megopolo ya pelo ya gago.

₃₁Kgoši, o bone seswantšho se segolo sa motho. Seswantšho seo e be e le se segolo, se phadima se šiiša. ₃₂Hlogo ya sona e be e le ya gauta; sehuba le mabogo e be e le silifera; mpa le matheka e be e le mphiri; ₃₃Maoto e be e le tšhipi; dinao tša sona e be e le tshipi e tswakanego le letsopa. ₃₄Wa re o sa lebeletše, gwa kgomoga leswika, e sego ka seatla sa motho, la tla la tia dinao tša seswantšho seo, tše e bego e le tša tshipi e tswakanego le letsopa, la di pšhatlaganya. ₃₅Gwa šilaganywa tshipi le letsopa, le mphiri wola, le silifera yela, le gauta yela, tša etša moko diboeng lehlabula, tša tšewa ke phefo, gwa se hlwe go bonwa felo ga tšona. Leswika lona le thubilego seswantšho seo, la ba thaba e kgolo, la tlala lefase ka moka.

₃₆Ke tšona diloro. Bjale le tlhathollo a nke re e botše kgoši. ₃₇Wena kgoši, o kgoši ya magoši. Modimo wa magodimong o go file mmušo, le bogolo, le maatla, le borena. ₃₈Mo go fela mo go dutšego bana ba batho, le diphoofolo tša naga, le dinonyana tša sebakeng, Modimo o go gafetše tšohle, a go dira mmuši wa tšona ka moka. Hlogo ya gauta ke wena. ₃₉O tlo hlatlangwa ke o mongwe mmušo, wo o tlogo tsoga, fela, wa se lekane le wa gago. Gwa tlo kgona go tla o mongwe mmušo wa boraro wa mphiri, o tlogo buša mafase ka moka. ₄₀Mmušo wa bone e tlo ba o mothata boka tshipi, o tlogo etša tshipi ge e robaganya tšohle, e di ritaganya. Le wona mmušso woo o tlo pšhatlaganya mebušo e mengwe wa e robaganya boka tshipi. ₄₁Bjale ge o bone dinao le menwana e le letsopa la mmopi le le tswakanego le tshipi, e tlo ba mmušo wo o kgaoganego; bothata bja tshipi bo tlo ba gona go wona boka ge o bone tshipi e tswakane le letsopa. ₄₂Bjalo ka ge o bone dinao le menwana, mo gongwe e le tshipi, mo gongwe e le letsopa, le go mmušo woo go tlo ba bjalo; mo gongwe e tlo ba o mothata, mo gongwe o tlo fokola. ₄₃Ge o bone tshipi e tswakane le letsopa, ke go re ba tlo hlakanya meloko ba tšeana; fela, ba ka se ke ba ba setšhaba se tee, boka tshipi ge e sa gomarelane le letsopa. ₄₄Mehleng ya dikgoši tšeo, ke mo Modimo a tlogo tsoša mmušo wo o ka se kego wa šwalalanywa neng le neng, wo o ka se kego wa selela go setšhaba se sengwe. O tlo pšhatla mebušo e mengwe ka moka wa e fediša; ge e le wona, o tlo ema go ya go ile, ₄₅Bjalo ka ge o bone leswika le kgomoga thabeng, go se seatla sa motho, le pšhatlaganya tshipi le mphiri le silifera le gauta, Modimo o tsebišitše kgoši tše di tlogo tšwelela mehleng e tlago. Diloro tšeo di a rereša; le tlhathollo ya tšona e tiile.

₄₆Kgoši Nebukadinetsara a napa a khunama a lotšha Daniele, a laela a re ba mo tlišetše didimo le dibego, a thuntšhetšwe diorelo. ₄₇Kgoši ya bolela le Daniele ya re: Ka kgonthe Modimo wa lena ke Modimo wa medimo, Morena wa magoši, Moutolodi wa diphihlo, ka gobane o kgonne go nyarola phihlo yeo. ₄₈Kgoši ya godiša Daniele, ya mo nea dimpho tše ntši tše kgolo, ya mo dira mokgoma wa dilete tša Babele ka moka, a ba molaki wa ba bohlale ba Babele ka moka. ₄₉Daniele a kgopela kgoši gore a bee Sadirake le Mesake le Abedinego, e be babušiši ba dilete tša Babele; yena Daniele a šala motseng wa mošate.