DITIRO TŠA BAAPOSTOLA 7

₁Moperisita e mogolo a re: A taba tšeo di dutše bjalo?

₂Stefano a fetola a re: Banna ba gešo le Botate! Modimo wa letago o iponaditše go Aborahama tatawešo mola a sa le kua Mesopotamia, a sešo a aga Harane. ₃A mo laela a re: Tlogela lefase la geno, le metswalo ya gago, o ye nageng ye ke tlogo go laetša yona. ₄Ya ba gona a tlogago nageng ya Bakaladea, a aga Harane. Ge tatagwe a hwile, Modimo a mo tloša fao, a mo tliša nageng yeno le agilego go yona bjale. ₅A se mo arolele karolo mo go yona, le ge e ka ba bophara bja lwao; a fo mo holofediša a re o tlo mo fa naga ye ya ba ya gagwe le ya bana ba gagwe ba ba tlogo ba gona; ke ge a sešo a ba le ngwana. ₆Se Modimo a mmoditšego sona sese: Bana ba gago ba tlo falalela nageng e šele; ba tlo ba dira bahlanka, ba ba hlakiša nywaga e makgolo a mane. ₇Mme setšhaba seo ba tlogo ba ba hlanka ba sona Modimo a re: Ke tlo se sekiša, ya tlo ba gona ba tlogo tšwa gona, ba tla ba direla nna felo fa. ₈A mo fa kgwerano ya lebollo. Ge go dutše bjalo, Aborahama a tswala Isaka, a mmolotša ka letšatši la seswai. Isaka a tswala Jakobo; Jakobo a tswala botatawešo ba bagolo ba lesome le metšo e mebedi.

₉Botatawešo ba hufegela Josefa ba mo rekiša, a išwa Egipita. Gomme Modimo a ba le yena. ₁₀A mo hlakodiša mehlakong ya gagwe yohle, a mo hwetšiša botho bja Farao a mo fa bohlale. Farao a mmea mmuši wa Egipita le wa ntlo ya gagwe ka moka. ₁₁Gwa na gwa wa tlala nageng ya Egipita le Kanana, tlalelo ya ba e kgolo. Botatawešo ba hloka dijo. ₁₂Jakobo a kwa ge ba re: Mabele a kua Egipita; a roma botatawešo ba ya la pele. ₁₃Ge ba ile la bobedi, Josefa a tsebja ke bana babo; Farao a tseba moloko wa Josefa. ₁₄Josefa a roma batho ba yo tšea tatagwe le ba gabo bohle, batho ba masome a šupago le metšo e mehlano. ₁₅Jakobo a khudugela Egipita, a hwa; le botatawešo ba hwa. ₁₆Ba rwalwa ba išwa Sikeme, ba bolokwa lebitleng le Aborahama a le rekilego ka tšhelete go bagaHemoro tatago Sikeme.

₁₇Ge lebaka la kholofedišo yela Modimo a e enetšego Aborahama le batametše, ke ge setšhaba se godile, ba atile nageng ya Egipita. ₁₈Gwa ba gwa tsoga kgoši e šele ya Egipita, ye e bego e sa tsebe Josefa; ₁₉Ya logela ba moloko wešo maano, ya tlaiša botatawešo, ya laela ya re masea a bona a lahlwe a se phele. ₂₀Ke lona lebaka le Moshe a tswetšwego ka lona; a kgahla Modimo, a fepša lapeng la gabo kgwedi tše tharo. ₂₁Mohla ba mo lahlilego, a thwalwa ke morwedi wa Farao; yena eo a mmolela, a re ke ngwana wa gagwe. ₂₂Moshe a rutwa mabohlale ohle a Baegipita a ba yo maatla go direng le ditabeng.

₂₃Ge a šetše a godile, e le wa nywaga e masome a mane, a eleletša a re: Nke ke yo hlola bana bešo ba Isiraele. ₂₄A bona e mongwe a hlokofatšwa a se ne molato; a namolela eo wa go katwa, a bolaya Moegipita. ₂₅Pelong ya gagwe a re, bana babo ba tlo bona gore Modimo o ba phološa ka letsogo la gagwe; bona ba se di lemoge. ₂₆Ka la ka moswana a wela ba elwa; a ba eletša a re ba boelane, a re: Banna! Le bana ba motho o tee. Le lwelang? ₂₇E a rumotšego wa gabo, a mo kgorometša a re: Ke mang e a go beilego a re o be mmuši le moahlodi wa rena? ₂₈A re: Afa o rata go mpolaya bjalo ka ge o bolaile Moegipita maabane? ₂₉Moshe a re go kwa polelo yeo, a tšhaba a yo diilela nageng ya Midiane; moo a tswala barwa ba babedi.

₃₀Ge go fetile nywaga e masome a mane, Morongwa wa Morena a iponatša go yena lešokeng la thaba ya Sinai a le kgabong ya mollo sethokgwaneng. ₃₁Moše ge a iša mahlo, a kgotsa pono yeo. Ge a sa batamela gore a bone, a kwa lentšu la Morena le re: ₃₂Ke nna Modimo wa botatago, Modimo wa Aborahama, Modimo wa Isaka, Modimo wa Jakobo! Moshe a swarwa ke go roromela, a šia le go lebelela. ₃₃Morena a bolela nae a re: Rola dieta naong tša gago, gobane felo fa o emego gona ke naga e kgethwa. ₃₄Ke bone pateletšo ya setšhaba sa ka se se lego kua Egipita; ke kwele dikolomelo tša bona. Ke tlile go ba namolela; bjalo tlaa ke go rome kua Egipita.

₃₅Yena Moshe eo ba mo nyaditšego ba re: Ke mang a go beilego mmuši le moahlodi, ke yena yo Modimo a mo romilego a ba mmuši le molopolodi, ka seatla sa Morongwa e a iponaditšego go yena moo sethokgweng. ₃₆Ke yena a ba ntšhitšego ka go dira mehlolo e mentši le dika tša bohlatse nageng ya Egipita, le lewatleng le Lehwibedu le lešokeng; a fetša nywaga e masome a mane a dira tše bjalo. ₃₇Ke yena Moshe wa go botša Baisiraele a re: Morena Modimo wa lena o tlo tsoša Moporofeta e a swanago le nna; o tlo tšwa go bana beno. Yena eo le mo theetšeng. ₃₈Ke yena Moshe a bego a na le setšhaba lešokeng thabeng ya Sinai, a ba le Morongwa e a boletšego le yena le botatawešo; ke yena a amogetšego thuto e phelago a re nea.

₃₉Ke yena botatawešo ba gannego go mo kwa, ba mo kgoromeletša kgole, dipelong tša bona ba retologela Egipita. ₄₀Ke mola ba bolela le Arone ba re: Re direle medimo ya go re eta pele, ka gobane tše di wetšego monna e Moshe, wa go re ntšha nageng ya Egipita, rena ga re di tsebe. ₄₁Mehleng yeo ba dira namane. Seswantšho seo ba se tlišetša didimo; ba thabela mediro ya diatla tša bona. ₄₂Modimo a ba fularela, a ba lesa ba blankela makoko a legodimo, ka mo go ngwadilwego pukung ya baprofeta, gwa thwe: A lena ba moloko wa Isiraele, nywaga yela ya masome a mane le le lešokeng, le be le fa nna dibego tša dikgomo le didimo, ₄₃le be le šikere mokutwa wa Mologo le naledi ya Remphane modimo wa lena. Diswantšho tše le itiretšego tšona la di khunamela; gwa thwe: Ke tlo le khudušetša kgole, la tlo ba la feta motse wa Babele.

₄₄Botatawešo ba be ba na le Ngwako wa Bohlatse kua lešokeng, wo ba o laetšwego ke yena ge a botša Moshe a re a o dire o tle o swane le wo a o bonego. ₄₅Ngwako woo wa Bohlatse, botatawešo ba o amogetše, ba o tliša nageng yeno, e bego e dutšwe ke bantle, ba Modimo a ba rakilego ge botatawešo ba fihla ba na le Joshua. Gwa ba gwa tla mehla ya Dafida. ₄₆Ke yena a bonego go gaugelwa ke Modimo: a kgopela gore a laetšwe felo fa go aga Ngwako wa Modimo wa Jakobo. ₄₇Mme ngwako woo wa Modimo wa agiwa ke Salomo.

₄₈Fela, Yogodimodimo ga a dule mo go tše di dirilwego ka diatla. Ke sona se moporofeta a se boletšego a re: ₄₉Magodimo ke sedulo sa ka sa bogoši. Lefase ke bogato bja dinao tša ka. Bjale Ngwako wo le kago nkagela wona o ka ba kae? Le bodulo bjo nkago khutša gona bo ka ba kae? ₅₀A ga se letsogo la ka le le dirilego tšeo tšohle?

₅₁Lena ba melala e methata, ba go se bolle dipelo le ditsebe! Ka mehla le ganetša moya o Mokgethwa. Tše botataweno ba di dirilego, ke tše lena le di dirago. ₅₂Ke ofe moporofeta yo botataweno ba sa kago ba mo hlomarela? Ba bolaile bao ba bego ba mmolela pele, yena mothomoloki, yo lena le mo ekilego la mmolaya. ₅₃Lena le filwego molao ka go laeletšwa ke barongwa, moka le se o lotole.

₅₄Ya re ge ba ekwa Stefano a realo, ba betwa ke dipelo, ba lomanya meno ba mo lebeletše. ₅₅Yena a tlala Moyamokgethwa, a lelalela legodimong, a bona letago la Modimo; a bona Jesu a eme ka letsogong le letona la Modimo; ₅₆a bolela a re: Tsebang, ke bona magodimo a bulegile; Morwamotho ke mmona a eme ka letsogong le letona la Modimo.

₅₇Bona ba goa ka mantšu a magolo, ba ithiba ditsebe, ba mo wela godimo bohle ka gotee, ₅₈ba mo kgoromeletša kua ntle ga motse, ba mo thuma ka mabje. Ba dihlatse ba bea dikobo tša bona fase pele ga lesogana le lengwe, le ba bego ba re ke Saulo. ₅₉Ge ba thuma Stefano ka maswika, yena Stefano a rapela a re: Morena Jesu! Amogela moya wa ka. ₆₀A khunama ka matolo, a hlaboša lentšu a re: Morena, o se ba balele sebe se! A realo, a ithobalela.