Petro le Johane ba a sekišwa
1Ya re ba sa bolela le setšhaba, gwa fihla baperisita ba ema moo ba na le tona ya Ntlokgethwa, 2ba tla ba tletše pelo ka ge baapostola ba ruta setšhaba ba bolela Jesu ba re o tsogile bahung. 3Ba ba swara ba ba iša kgolegong ba lala moo; ka gobane e be e šetše e le mantšiboa. 4Go bala ba go kwa lentšu, ba bantši ba dumela; palo ya banna ya ba dikete tše tlhano.
5Ka moswana bagolo ba setšhaba ba bokana Jerusalema ba na le matona le bamangwalo, 6ba na le Hanna moperisita e mogolo le Kayafa, le Johane, le Alesandere, le ba moloko wa moperisita e mogolo. 7Baapostola ba bewa gare, ba botšišwa gwa thwe: Tše le di dirago le di dira ka maatla afe le ka leina la mang?
8Ke mo Petro a boletšego a tletše Moyamokgethwa, a fetola a re: Lena marena le bagolo ba setšhaba sa Isiraele, 9Lehono re sekišwa ka baka la modira o botse wo o diretšwego motho wa sekoka. Le re o fodišitšwe ke mang? 10Tsebang ge, lena setšhaba ka moka sa Isiraele: Ge motho e a ema fa pele ga lena a fodile, ke ka leina la Jesu Kriste wa Natsaretha, yo le mmapotšego, yo Modimo a mo tsošitego bahung. 11Ke yena leswika le baagi ba le nyaditšego; le bile motheo wa sekhutlo. 12Ga go phološo go e mongwe; le gona ka tlase go legodimo ga go leina le lengwe le batho ba le neilwego, le re kago phološwa ka lona.
13Ge ba bona Petro le Johane ba bolela ba thabile, mola ba boditšwe gore ga se batho ba mangwalo, ga se barutegi, ba kgotsa; le gona ba be ba tseba ge e le ba ba bego ba na le Jesu. 14Ge ba bona le motho eo a fodišitšwego, a eme le bona, ba hloka sa go phema. 15Ba re ba ntšhetšwe ntle, gwa šala ba lekgotla, ba eletšana ba re: 16Batho ba re tlo ba dirang? Gobane bohle ba ba agilego fa Jerusalema ba tseba ge mohlolo wo o bonagalago o dirilwe ka bona; mme re ka se kgone go ganetša fao. 17Fela, a re ba tšhošeng, gore dilo tše di se ke tša enela setšhaba, re ba kgaleme re re ba se ke ba hlwa ba bolela le motho tša leina leo.
18Ba ba bitša, ba ba laela ba re, ba lese le go bolela dilo tšeo, ba se ke ba ba ba ruta ka leina la Jesu. 19Petro le Johane ba fetola ba re: Ahlolang lena beng, le re botše ge go swanetše ge re kwa lena, ra lesa go kwa Modimo. 20Ge e le rena ga re kgone go lesa go bolela tše re di bonego le tše re di kwelego. 21Bona ba buša ba ba kgalema, ba tsebo ba lesa ba tloga, ba sa bone ka mo ba kago ba otla ka gona ka baka la setšhaba; gobane batho bohle ba be ba reta Modimo ka tše di diregilego. 22Gobane motho eo mohlolo wa go fodišwa o dirilwego go yena, e be e le monna wa nywaga e fetago masome a mane.
23Petro le Johane ge ba lesitšwe, ba boela go ba gabo, ba ba anegela tše baperisita ba bagolo le ba bagolo ba di boletšego le bona. 24Ba di kwa, ba hlatlošetša mantšu go Modimo ka bopelotee, ba re: Morena, wena o hlodilego legodimo le lefase le lewatle, le tšohle di lego mo go ona, 25o boletše ka molomo wa Dafida mohlanka wa gago wa re: Ba reng ba ditšhaba ba tsoša marole? Dilete di reng di rera tša lefela? 26Magoši a lefase a a tsoga, le babuši ba lakana go lwa le Morena Motlotšwa wa gago. 27Ka kgonthe ba bokane motseng wo, ba tsogela Jesu mohlanka wago e mokgethwa, e o mmeilego; ke boHerode, le Pontio Pilato, le bantle ba na le dilete tša Isiraele.
28Ya na ya ba go tšweletša tše di beilwego pele ke atla sa gago le morero wa gago, wa re di tlo ba gona. 29Mme bjalo, Morena, bona kgalemo tša bona; mme bahlanka ba gago o ba fe mafolofolo ruri, ba bolele ntšu la gago. 30Emiša letsogo la gago batho ba fole; go bonale dika tša bohlatse le mehlolo ka ina la Jesu mohlanka e mokgethwa wago.
31Ya re ge ba feditše go rapela, felo mo ba bego ba phuthegetše gona gwa šišinyega; ka moka ba tlala Moya o mokgethwa, ba bolela lentšu la Modimo ka mafolofolo.
32Gomme lešaba la ba ba dumetšego e be e le ba pelo e tee le moya o tee. Go be go se motho e a rego dilo tše a nago natšo ke tša gagwe; ba be ba re ke tša bohle. 33Baapostola bona ba bea bohlatse ka maatla a magolo, bja go re Morena Jesu o tsogile bahung; gomme botho bjo bo bego bo ba okametše e be e le bjo bogolo. 34Gobane mo go bona go be go se mohloki, ka ge bohle ba bego ba na le naga goba ngwako, ba di rekiša, ba tliša theko ya thoto ye ba e rekišitšego. 35Ba tla ba e bea fase pele ga baapostola, gomme motho a abelwa ka mo a bego a hloka.
36Le Jose, yo baapostola ba mo reetšego la Baranaba (ke go re Morwa khomotšo) wa Molefi e a tswaletšwego Tsipero, 37o be a na le naga; a e rekiša, a tliša tšhelete a e bea fase pele ga baapostola.
