DITIRO TŠA BAAPOSTOLA 27

₁Bjale ge go tlemilwe la go re re ye Italia ka leselawatle, ba ntšha Paulo le bagolegwa ba bangwe ba ba laela tona ya sekgao sa dira tša mošate; leina la gagwe e be e le Julio. ₂Ra namela leselawatle la Adiramite, ra tloga ra re re tlo šika le leboto la naga ya Asiana; ra tloga re na le Aristareko wa Thesalonika motse wola wa Matsedonia. ₃Ka la ka moswana ra fihla Sidone. Julio a dira Paulo ka botho, a mo dumelela go yo hlola bagwera ba gagwe, gore ba mo fe mefago. ₄Ra tloga moo ra šika le sehlakehlake sa Tsipero, ka gobane phefo e be e etšwa mo re bego re leba gona. ₅Ra tšea ka lewatle la Tsilitsia le la Pamfilia, ra tla motseng wa Mira wa la Litsia. ₆Motseng woo tona ya hwetša leselawatle la Alesandria le yago Italia, a re nametša lona.

₇Ra sepela ka go nokologa matšatši a mantši ka ge phefo e fela e re gomiša, ra ba ra tla ra lebana le motse wa Kenido, ra pota sehlakehlake sa Kereta ka tlase, ra lebana le Salamone. ₈Ra feta moo ka thata, ra ba ra kgona go tsena felo mo ba rego ke Madibogo a mabotse, kgauswi le motse wa Lasea.

₉Go be go fedile matšatši a mantši a leeto; gomme go sepela lewatleng go be go šetše go boifša, ka gobane matšatši a Paseka a be a fetile. Paulo a ba eletša ka tšona, ₁₀a re: Banna! Ke a bona, leeto le le tlo iša kotsing le tshenyegong e kgolo, e sego ya phahlo la ya leselawatle fela; e ka ba le ya tshenyego ya bophelo bja rena. ₁₁Fela, tona ya dumela molaodi wa leselawatle le mong wa lona, a se kwe keletšo ya Paulo. ₁₂Gomme letšibogo leo e be e se la go ka dulwa marega go lona. Ba bantši ba bona ba kwana ba re a re tloge re leke go fihla Fenikisi, re yo dula gona marega. Ke letšibogo la sehlakehlake sa Kereta le le khutilego diphefo tša marega.

₁₃Ba bona ge phefo ya borwa e foka gabotsana, ba re re tlo fihla mo re go ratago; ba tšwa ba ipata le sehlakehlake sa Kereta. ₁₄Ba sa ya ka mokgwa woo, ba tšhoga ledimo le ba rego ke la bohlabela bja leboa le wela sehlakehlake seo. ₁₅Leselawatle la tšewa ke ledimo leo, ra šitwa go boa, ra ba ra fo lesa ra tloga re išwa ke lona. ₁₆Ge re re re ipata ka sehlakehlake sa Kelauda, lekokgwana la rena le nyako tšewa ke lewatle. ₁₇Ba ba ba kgona go le boloka. Ba leka go itwela ka go swineletša dimpa tša leselawatle ka dithapo. Ka go boifa gore ba ka lahlelwa magageng a leboto la lewatle, ba mena diphego tša leselawatle. ₁₈Ke ge ledimo le re swere o šoro. Ka la ka moswana ba fokotša morwalo wa leselawatle, ba ntšha phahlo ba di lahlela lewatleng. ₁₉Ka la boraro ra ba swariša go lahla le thoto ye ba bego ba sepetša leselawatle ka yona. ₂₀Gwa feta matšatši a mantši re sa bone letšatši le dinaledi, ledimo le re wetše wa sehlogo, ra ba ra felelwa ke kholofelo ya go re re ka phologa.

₂₁Ya re ge go fetile sebaka se segolo go sa lewe, Paulo a ema mo gare ga bona a re: Banna! Ge le ka be le kwele nna, la lesa go tloga kua Kereta, re ka be re sa ka ra welwa ke kotsi ye le mahloko a. ₂₂Bjale ke a le kgopela ke re tlemang dipelo; gobane mo go rena go ka se senyege le bophelo bja o tee. Se se tlogo senyega ke leselawatle. ₂₃Gobane bošego go tlile Morongwa wa Modimo yo nna ke mo direlago, a ema pele gaka, ₂₄A re: Paulo, se boife. O sa tlo ema pele ga Kesara. Gomme o tsebe gobane Modimo o go file bohle ba o nago nabo fa leselawatleng. ₂₅Tlemang pelo ge, Banna! Nna ke kgodilwe gore tše Modimo a mpoditšego tšona di tlo ba gona. ₂₆Gomme re sa tlo lahlelwa sehlakehlakeng se sengwe.

₂₇Ya re e šetše e le bošego bja letšatši la lesome la metšo e mene re sepela lewatleng la Aderia, e le mašegogare, basepediši ba leselawatle ba bona eke go batamela naga. ₂₈Ba ela bodiba ka lenti ba hwetša e le dikelo tša matsogo tše masome a mabedi. Ge ba fetetše pejana ba ela, ba hwetša e le dikelo tše lesome le metšo e mehlano. ₂₉Ba boifa go ka gohlomela maswikeng, ba emiša leselawatle ka go ntšha dikgwega tše nne, ba di kgokela lešagong la lona, ba di lahlela lewatleng. Ba dula ba letela masa. ₃₀Basepediši ba leselawatle ba leka go tšhaba ka lekokgwana, ba le ntšhetša lewatleng; ba aketša ba re: Re rata go kgokela dikgwega le ka mo hlogong ya leselawatle. ₃₁Paulo a bolela le tona le bahlabani a re: Ge banna bao ba sa dule fa leselawatleng, le ka se phologe. ₃₂Bahlabani ba napa ba ripa dithapo tša lekokgwa, ba le lesa la tšewa ke lewatle.

₃₃Ge bo sa tlo sa, Paulo a ba kgothatša bohle a re ba je, a re: Lehono e šetše e le letšatši la lesome la metšo e mene le ehlwa le tlala, le sa je selo. ₃₄Bjale ke re, hle tšeang dijo le je, le be le maatla; gobane ga go le o tee wa lena e a tlogo senyegelwa le ke ntsha e tee ya moriri wa hlogo. ₃₅A realo a tšea bogobe, a leboga Modimo ba mo lebeletše, a ngwatha, a thoma go ja. ₃₆Ke mo ba betilego dipelo, ba tšea dijo ba ja bohle. ₃₇Ka moka ga rena mo leselawatleng re be re le batho ba makgolo a mabedi a nago le masome a šupago le metšo e seletšego. ₃₈Ge ba lle ba hora, ba hwefola leselawatle ka go lahlela le mabele a mefago ya bona lewatleng.

₃₉Ge go sele, ba se tsebe naga yeo ba bego ba lebane nayo. Ba hwetša go na le letšibogo la lešikahlaba, ba re ke mo re swanetšego go iša leselawatle gona ge go kgonega. ₄₀Ba ripa dithapo tša dikgwega tša wela lewatleng. Ba tlemolla mosela wa leselawatle, ba hlaramolla lefego, phefo ya ba goga ba lebile lešing. ₄₁Ba wela felo mo meetse a afarilego ka dithoko tše pedi, leselawatle la tanywa ka hlogong la tsetsemela le se šišinyege; fela ka lešagong la pšhatliwa ke mafula a lewatle.

₄₂Bahlabani ba lakana ba re ba bolaye bagolegwa, gore go se be le e a tlogo rutha a tšhaba. ₄₃Fela, tona ya ba iletša, ka gobane e be e rata gore Paulo a phele; ya laela ya re: Ba ba tsebago meetse ba ikwetše lewatleng, ba ruthe ba sele. ₄₄Ya re: Ba bangwe ba sele ba itshwareletše ka dikwata, ba bangwe ka mamati a leselawatle. -- Bohle ba phologa ka mokgwa woo, ba fihla mo go omilego.