Pitšo ya baapostola motseng wa Jerusalema
1Gwa tla ba bangwe ba etšwa nageng ya Juda, ba ruta badumedi ba re: Ge le sa bolle ka mokgwa wa Moshe, le ka se ke la phološwa. 2Gwa tsoga kgang; phetolano le Paulo le Baranaba e se be e nyane. Gwa ba gwa tlengwa la go re: Paulo le Baranaba le ba bangwe ba bona ba rotogele Jerusalema, ba botšiše baapostola le ba bagolo taba ye.
3Phuthego ya ba felegetša. Ba phatša naga ya Fenikia le ya Samaria, ba tšama ba anegela badumedi tša tshokologo ya bantle; ba tsoša lethabo le legolo go bana babo ba tumelo. 4Ba tla Jerusalema, ba amogelwa ke phuthego le baapostola le ba bagolo; ba ba laodišetša tšohle tše Modimo a di dirilego a na le bona. 5Gwa tsoga ba bangwe ba thuto ya bafarisei, ba e bego e le badumedi, ba ema ba re: A ba bolotšwe, ba laelwe go ya ka molao wa Moshe.
6Baapostola le ba bagolo ba phuthega gore ba bone taba ye ka mo e lego ka gona. 7Ya re ba fetolana ka tše ntši, Petro a ema a bolela a re: Banna ba gešo! Le a tseba, ke kgale Modimo a hlaotše molomo wa ka mo go lena, gore bantle ba kwe Ebangedi, ba dumele. 8Modimo Mohlathadipelo o ba beetše bohlatse ge a ba fa Moyamokgethwa, bjalo ka ge a file borena. 9A se hlaole mo go rena le go bona, a sekiša dipelo tša bona ka tumelo. 10Bjale le reng le leka Modimo ka go rweša barutiwa joko melaleng ya bona, ye botatawešo le rena re šitilwego go e rwala? 11Gomme re dumela go phologa ka kgaugelo ya Morena Jesu Kriste. Le bona a ba realo.
12Pitšo ka moka ya homola. Ba theetša ge Baranaba le Paulo ba ba anegela ka mo Modimo a dirilego mehlolo le dika tše ntši tša bohlatse kua gare ga bantle ka bona. 13Ge ba homotše, gwa bolela Jakobo a re: Banna ba gešo! Kwang se ke se bolelago. 14Simone o laodišitše ka mo Modimo a etetšego batho ba bantle bala ba a thomilego ka bona, a ba amogela, ya ba ba leina la gagwe. 15Gomme mantšu a baporofeta a kwana fao, ka mo go ngwadilwego gwa thwe: 16Mehleng yeo ke tlo tsoša mokutwana wa Dafida wo o wilego; moo rutlologilego ke tlo buša ke o tsošološa, ka o aga bjalo ka mohlamonene. 17Gore mašalela a batho a tle a nnyake, bantle bao leina la ka le tlo go goelelwa mo go bona. O realo Morena. O tlo di dira. 18Modimo tše a di dirago tšohle o di tsebile go tloga mathomong a neng le neng.
19Ke gona nna ke re, taba še: Bantle ba ba boelago go Modimo, re se ke ra ba belaetša. 20A re ba ngwaleleng re re: Ba ile ditšhila le medimo ya diswantšho le bootswa le tše di tlimilwego le madi. 21Gobane Moshe, go tloga kgaleng, o na le ba ba mmolelago metseng ka moka, ge ka disabatha tšohle a balwa diphuthegong.
22Baapostola le ba bagolo, le pitšo ka moka, ba tlema la go re: Go hlaolwe banna mo go bona, ba rongwe ba ye Antiokia le Paulo le Baranaba. Ba hlaola Juda e a reilwego la Barasaba, le Silase, ba e bego e le diketapele mo go bana babo ba tumelo. 23Diatleng tša bona ba bea lengwalo le le rego: Rena baapostola le ba bagolo, le bana ba borena, re re: Thabang! Lena bana ba borena ba Antiokia le ba Siria le ba Tsilitsia, ba le tšwago go bantle. 24Re kwele gore ba bangwe ba ba tšwilego go rena ba le belaeditše ba šišinya dipelo tša lena, ka go re le bolotšwe, le ye ka molao wa Moshe. Ba realo ba sa ka ba rongwa ke rena. 25Bjale ge re phuthegile ra kwana, re bona ge go swanetše ge re hlaola banna ra ba roma, ba tla go lena ba na le Baranaba le Paulo, barategi ba rena. 26Ba e lego banna ba ba gafilego bophelo bja bona ka baka la leina la mong wa rena Jesu Kriste. 27Bjale re roma Juda le Silase. Ke bona ba ba tlogo le laodišetša ditaba tše ka ganong. 28Gobane Moyamokgethwa, o na le rena, o tlemile la go re: Go swanetše ge re sa le beleše boima bjo bongwe gape. Se se swanetšego sese: 29Go ilwe didimo tša medimo ya diswantšho, le madi, le tše di tlimilwego, le bootswa. Ge le ila tšona, e tlo ba go dira gabotse. -- Thabang!
30Baromiwa ba fiwa tsela. Ba re go fihla Antiokia, ba kgobokanya phuthego, ba ntšha lengwalo leo. 31Ge ba le badile, badumedi ba thabela keletšo yeo. 32Juda le Silase, ba e bego e le baporofeta le bona, ba eletša bana babo ba tumelo ka ditaba tše ntši, ba ba tiiša. 33Ba fetša sebaka ba dutše gona; ba tsebo laelana le bana babo ba tumelo, ba boela go baapostola ba thabile. 34Ge e le Silase, a bona go swanetše ge a ka šala Antiokia.
35Paulo le Baranaba ba dula Antiokia, ba ruta ba bolela Ebangedi ya lentšu la Modimo ba na le ba bangwe ba bantši.
36Ge go fetile matšatši, Paulo a bolela le Baranaba, a re: A re boele go yo bona bana bešo ba metseng yela yohle, ye re išitšego lentšu la Morena go yona, re bone se ba se dirago. 37Baranaba a rata ge ba tloga le Johane yola wa go reelwa la Mareka. 38Paulo a bona go sa swanela ge ba ka tloga le motho eo wa go ba lahletša kua Pamfilia, a se ye le bona modirong. 39Ya ba kgang, ba ba ba kgaogana, Baranaba a tloga a na le Johane a ya Tsipero ka leselawatle. 40Paulo a itlhaolela Silase; a wela tsela, badumedi ba mo gafetše kgaugelo ya Morena, 41A tšea ka tsela ya Siria le Tsilitsia, a tšama a tiiša diphuthego.
