E sa le tša Leeto la pele la Paulo
1Ge ba le motseng wa Ikonio, ba ya phuthegong ya Bajuda gammogo, ba ruta; mme gwa dumela bontši bjo bogolo bja Bajuda le Bagerika. 2Bajuda ba ba bego ba sa dumele ba tsoša bantle, ba senya dipelo tša bona, ba ba lohlanya le badumedi. 3Ba fetša lebaka le letelele ba dutše gona, ba ruta ba ikholofediša ka Morena, e a bego a hlatsela lentšu la kgaugelo ya gagwe, a kgoniša diatla tša bona mehlolo le dika tša bohlatse. 4Selete sa motse woo sa kgaogana. Ba bangwe ba ema le Bajuda; ba bangwe ba ema le baapostola.
5Gwa tsoga mpherefere wa bantle ba na le Bajuda le beng ba motse, ba rata go ba hlokofatša le go ba thuma ka maswika. 6BoPaulo ba sebelwa, ba tšhabela nageng ya Likaonia, motseng wa Lisitara le motseng wa Derebe, le mathokong ao. 7Le gona kua ba ruta Ebangedi.
8Motseng wa Lisitara go be go na le monna e mongwe wa go palelwa ke maoto, e a bego a dutše fase, a belegwe e le segole, a sešo a ba a sepela. 9Yena eo a theetša ge Paulo a bolela. Paulo ge a mo iša mahlo, a bona gore o na le tumelo ya gore a ka fodišwa. 10Paulo a hlaboša lentšu a re: Ema ka dinao tša gago o loke! Monna eo a nanoga a sepela. 11Mašaba ge a bona se Paulo a se dirilego, ba hlatloša mantšu ba bolela ka Selikaonia ba re: Badimo ba itirile batho ba fologela go rena! 12Baranaba ba re ke yena Jupitere, Paulo ba re ke yena Merekurio, ka ge e le yena mmoledi wa ditaba. 13Mphamodimo wa Jupitere e a bego a agetšwe pele ga motse wa bona, a tliša dipoo le mefapahlogo ya matšoba mo kgorong, a rata go ipega ka didimo a na le mašaba a batho.
14Baapostola, Paulo le Baranaba, ge ba botšwa taba yeo, ba gagola diaparo tša bona, ba tsena gare ga mašaba ba hlaboša mantšu, 15Ba re: Hee lena banna! Le dirang fao? Le rena re batho ba go tlo hwa bjalo ka lena. Re ba go le botša Ebangedi ya go re le tlogele mafela ao, le boele go Modimo e a phelago, e a dirilego legodimo le lefase le lewatle le tšohle tše di lego gona. 16Ke yena e sa le mola kgale, a lesitšego ditšhaba ka moka di sepele ka ditsela tša tšona. 17Le ge a sa ka a lesa go itlhatsela ka go re šetša ka dilo tše ntši, a re fa dipula di etšwa legodimong, a hoša dipelo tša rena ka dijo le ka thabo. 18Le ge ba realo, ba nyakile go šitwa go šegela mašaba gore ba se ba hlabele didimo.
19Gwa tla Bajuda ba ba tšwago Antiokia le Ikonia, ba hlohleletša mašaba, ba thuma Paulo ka mabje, ba mo goga ba mo lahla kua ntle ga motse, ba re o hwile. 20Fela, ge barutiwa ba eme ba mo dikaneditše, a tsoga a boela motseng. Ka la ka moswana a tloga le Baranaba ba ya Derebe.
21Motseng woo ba kwatša Ebangedi, ba ruta batho ba bantši. Ba tsebo goma ba ya Lisitara, le Ikonio, le Antiokia. 22Ba tšama ba tiiša dipelo tša barutiwa, ba ba kgothatša ba re ba tielele tumelong, ba re: Mmušong wa Modimo re tsena ka ditlaišego tše ntši. 23Diphuthegong ka moka ba ba beela bagolo, ba bea dithapelo ba ikona dijo, ba ba gafela Morena yo ba mo dumetšego.
24Ba phatša naga ya Pisidia, ba fihla nageng ya Pamfilia. 25Motseng wa Perege ba iša Lentšu la Modimo; ba tsebo fologela Atalia. 26Moo ba namela leselawatle ba boela Antiokia, mo ba tšwelego gona ba gafetšwe kgaugelo ya Modimo ba sa ya modirong wo ba tšwago go o phetha.
27Ge ba boetše gona, ba kgobokanya phuthego, ba ba anegela mediro e megolo ye Modimo a e dirilego a na le bona, le ka mo a buletšego bantle mojako wa go tsena tumelong. 28Ba dula le barutiwa, gwa fela mabaka ba le moo.
