Kolobetšo ya bantle. Thuto e tla Antiokia
1Baapostola le badumedi ba nageng ya Juda ba kwa gore bantle ba amogetše lentšu la Modimo. 2Petro ge a boetše Jerusalema, a sekišwa ke ba e lego ba lebollo. 3Ba re: O tsene go banna ba ba sa bollago, o lle le bona. 4Ke mo Petro a thomilego go ba laodišetša ditaba ka mo di tlilego ka gona, a re:
5Ke be ke le motseng wa Jope ke rapela, ka tšewa ke Moya ka bona pono, sephutha se fologa se etša lešela le legolo le le swerwego ka dintlha tše nne, se etšwa legodimong sa tla sa fihla go nna. 6Ge ke se lebeleša ka bona se na le diphoofolo tša lefase le dibata le digagabi le dinonyana tša legodimo. 7Ka kwa lentšu le re: Petro, tsoga o hlabe o je. 8Nna ka re: Aowaa Morena! A go se be bjalo; gobane molomong wa ka ga go ešo gwa tsena seila le ge e le sa ditšhila. 9Lentšu leo la mphetola la bobedi le etšwa legodimong la re: Tše Modimo a di hlatswitšego o se ke wa re di na le ditšhila. 10Tša dirwa gararo ka mokgwa woo; ke moka tša bušetšwa legodimong. 11Gomme šedi. Ka lona lebaka leo gwa tla banna ba bararo, ba ema pele ga ngwako wo ke bego ke le go wona. Ba be ba romilwe ke Koronelio. 12Nna Moya wa mpotša wa re ke ye le bona, ke se ke ka belaela. Ka ya ke na le bana bešo ba ba selelago; ra tsena ngwakong wa monna eo. 13Yena a re anegela ka mo a bonego Morongwa ngwakong wa gagwe, e eme a mmotša a re: Roma banna ba ye Jope, o bitše Simone e a reilwego la Petro. 14Ke yena a tlogo go botša mantšu a o tlogo phološwa ka ona, wena le bohle ba ngwakong wa gago. 15Ya re ke sa thoma go bolela, batho bao ba tlelwa ke Moyamokgethwa bjalo ka mola o tlela rena mathomong. 16Nna ka elelwa Lentšu la Morena, le a le boletšego a re: Johane o kolobeditše ka meetse; mme lena le tlo kolobetšwa ka Moya o Mokgethwa. 17Bjale, ge Modimo a ba file yona neo yeo a e filego rena ba re dumetšego Morena Jesu Kriste -- ke nna mang nkago thibela Modimo?
18Ge ba ekwa a realo, ba homola, ba reta Modimo ba re: Anthe le bantle Modimo o ba file tshokologo e išago bophelong.
19Bale ba go gašanywa ke tlaišo ya go ba tsogela ka Stefano, ba sepetše le naga ba fihla Fenikia, le Tsipero, le Antiokia, ba sa botše motho Lentšu la Modimo ge e se Bajuda fela. 20Ba bangwe e be e le banna ba Tsipero le ba Kirene. Bona ba re go tsena motseng wa Antiokia, ba bolela le Bagerika, ba ba ruta Ebangedi ya Jesu. 21Seatla sa Morena sa ba le bona; batho ba bantši ba dumela, ba sokologela go Morena.
22Yona taba ye ya bona ya kwala ditsebeng tša phuthego ya Jerusalema. Ba roma Baranaba ba re a ye Antiokia. 23Baranaba ge a fihla gona a bona kgaugelo ya Modimo, a thaba, a ba kgothatša bohle a re ba gomarele Morena ka pelo e phegeletšego. 24Gobane Baranaba e be e le monna wa makgonthe, a tletše moya o mokgethwa le tumelo; mme ba go ba ba Morena ya ba ba bantši.
25Baranaba a swara leeto a ya Tareso a yo nyaka Saulo; a ba a mo hwetša a mo tliša Antiokia. 26Ba fetša ngwaga ka moka ba phedišana le phuthego ya gona, ba ruta lešaba le legolo. Motseng wa Antiokia ke mo barutiwa ba thomilego go reelwa leina la Bakriste.
27Mehleng yeo gwa fihla baporofeta ba ba tšwago Jerusalema, ba tla motseng wa Antiokia. 28E mongwe wa bona, yo leina la gagwe e lego Agabo, a ema a laodiša ka moya, a bolela tlala e kgolo ya go tlo wela lefase ka moka. Ke yona ya go wa mehleng ya Kesara Kelaudio. 29Barutiwa ba kwana bohle gore ba romele bana babo ba ba agilego nageng ya Juda thušo, ka mo e mongwe le e mongwe a kgonago ka gona. 30Ba dira ka mokgwa woo, ba romela dineo go ba bagolo ka diatla tša Baranaba le Saulo.
