2 BATHESALONIKA 1

₁Paulo le Silibano le Timotheo, re ngwalela phuthego ya ba Thesalonika ineng la Modimo Tata wešo le la Mong wa rena Jesu Kriste.

₂Kgaugelo a e be le lena le khutšo e tšwago go Modimo Tata wešo le go Morena Jesu Kriste.

₃Go re swanetše ge re le lebogela go Modimo ka mehla, lena bana bešo, go swanetše, ka gobane tumelo ya lena e tielela e eya, le leratano la lena bohle le fela le tlala, ₄le tlala ka mokgwa wo le rena re kgonago go kgantšha lena diphuthegong tša Modimo kga go bona kgotlelelo ya lena, ge le tia tumelong ge ba le tlaiša ba le hlokofatša.

₅Ke bohlatse bja moahlolelo wa go loka wa Modimo, wa gore le hwetšwe le le ba ba swanelwago ke mmušo wa Modimo wo le hlokofaletšwago wona. ₆Se se loketšego Modimo ke ge ba ba le hlokofatšago a tlo ba bušetša thlokofatšo. ₇Mme lena ba le hlokofatšwago le rena o tlo re lapološa mohla wa kutollo ya Morena Jesu ge a etšwa legodimong a na le Barongwa ba gagwe ba maatla. ₈Ba ba sa tsebego Modimo, le ba ba sa kwego Ebangedi ya Mong wa rena Jesu Kriste, o tlo ba lefetša ka dikgabo tša mollo. ₉Bona bao, kotlo e tlogo ba wela ke tshenyego ye e sa felego, ke go tlo senyegela kgole le sefahlago sa Morena, kgole le letago la maatla a gagwe. ₁₀Mohla woo o tlo tla a tagafala ka bakgethwa ba gagwe, o tlo kgotswa ka bohle ba mo dumetšego, gobane bohlatse bja rena bo dumetšwe mo go lena.

₁₁Gomme ke sona se re se nyakago ka go le rapelela ka mehla, gore Modimo wa rena a hwetše go bitšwa go le swantetše, a le tlatše lethabothabo la go kgahlwa ke tše bolo, a le tlatše maatla a go dira tša tumelo. ₁₂Gore leina la Mong wa rena Jesu Kriste le tagafale ka lena, le lena le tagafale ka yena ka kgaugelo ya Modimo wa rena le ya Morena Jesu Kriste.