Dafida o šetša Mefibosethe
1Dafida o kile a boelela a re: A ga go sa na lešalela la moloko wa Saulo, gore ke mo dire ka kgaugelo ka baka la Jonathane?
2Bjale go be go na le molata wa ga Saulo, leina la gagwe e be e le Tsiba. Yena eo ba mmitša a tla go Dafida. Kgoši ya bolela le yena ya re: A ke wena Tsiba?
Yena a re: Ke nna e, mohlanka wa gago!
3Kgoši ya re: A go sa na le motho wa moloko wa Saulo, ke tle ke mo dire ka kgaugelo ya Modimo?
Tsiba a fetola a re: Go sa le morwa e mongwe wa Jonathane; o golofetše maoto.
4Kgoši ya re: O go kae?
Tsiba a botša kgoši a re: Šolee kua lapeng la Makiri morwa wa Amiele kua motseng wa Lodibara. 5Kgoši ya napa ya roma batseta, ba mo tšea kua lapeng la Makiri morwa wa Amiele motseng wa Lodibara.
6Ya re ge Mefibosethe morwa wa Jonathane a tsena go Dafida, a lotšha a inametše fase. Dafida a mo rera a re: Mefibosethe! Yena a re: Ke nna e, mohlanka wa gago!
7Dafida a bolela le yena a re: Se boife! Ke tlo go dira ka kgaugelo ka baka la Jonathane tatago. Mašemo ka moka a Saulo tatago ke tlo a bušetša go wena; gomme bogobe o tlo ja bja megopo ya ka ka mehla.
8Mefibosethe a lothša a re: Nna mohlanka wa gago ke eng, ge o bile o šetša motho e a kago nna mpša e hwilego?
9Kgoši ya bitša Tsiba mohlanka wa Saulo, a mo rera a re: Tšohle tše e bego e le tša Saulo, le tša ba ga Bosaulo, ke di neetše morwa wa mong wa gago. 10Mo lemele mašemo o na le barwa ba gago, o bune, o goroše, gore morwa wa mong wa gago a be le bogobe le dijo. Ge e le Mefibosethe morwa wa mong wa gago o tlo ja bogobe bja megopo ya ka ka mehla.
Tsiba yena o be a na le barwa ba lesome le metšo e mehlano, le bahlanka ba masome a mabedi.
11Tsiba a fetola a re: Tšohle tše Kgoši Mong wa ka a di laetšego nna mohlanka wa gagwe, ke tlo di dira ke le mohlanka wa gago.
Kgoši ya re: Mefibosethe o tlo ja le nna bjalo ka barwa ba kgoši. 12Mefibosethe o be a na le ngwana wa lesoganyana; leina la gagwe e be e le Mika. Ge e le ba lapeng la Tsiba ka moka e be e le bahlanka ba Mefibosethe. 13Mefibosethe a tla a aga motseng wa Jerusalema, a ja tša megopo ya kgoši ka mehla; gomme o be a golofetše maoto ka mabedi.
