Dafida o rata go aga Ntlokgethwa; Morena o re: o tlo agela Dafida ngwako
1Mehleng ya ge kgoši e šetše e dutše ngwakong wa mošate, mola Morena a mo khutšišitše manaba a gagwe thoko tšohle, 2kgoši ya bolela le Nathane moporofeta ya re: O ko bone; nna ke dutše ngwakong o agilwego ka morokwana, mola polokela ya Modimo e ruletšwe ka mathebo.
3Nathane a fetola a re: Yaa o dire se o se eleletšago, ka gobane Modimo o na nago!
4Fela, bošego bjoo lentšu la Modimo la tlela Nathane la re: 5Yaa o botše Dafida mohlanka wa ka, o re: Morena o re: A o re o ka nkagela ngwako wo nkago dula go wona? 6Etšwe ke sešo ka ka ke dula ngwakong; go tloga mohla wola ke ntšha Baisiraele kua Egipita le nankhono, ke mosepedi wa ngwakwana wa mokutwana. 7E sa le mola ke le mosepedi, ke na le Baisiraele bohle, a fa nkile ka bolela le e mongwe wa babuši, ba ke ba laetšego go diša setšhaba sa ka sa Isiraele, ka re: Ke ka baka lang le sešo la nkagela ngwako ka morokwana?
8Bjale botša Dafida mohlanka wa ka o re: Morena wa mašaba o re: Ke nna ke go tšerego kua merakeng, mola o sa šala dinku morago, gore o tle o be moetapele wa setšhaba sa ka sa Isiraele; 9ka ba nago mo gohle mo o bego o sepela ntshe, ka ba ka fediša manaba ka moka a gago pele ga gago, ka go bopela leina le legolo boka ina la bagolo ba lefase. 10Setšhaba sa ka sa Isiraele ke se file madulo, ke se hlomile sa aga magae, se se ke sa hlwa se šišinywa, se se thubje ke ba borumolane bjalo ka mola ke sa fela ke bea baahlodi ba go buša setšhaba sa ka sa Isiraele. 11Ge e le wene ke go khutšišitše manaba a gago ka moka. Bjale Morena o go botša o re: Ke wene o tlogo agelwa ngwako ke Morena. 12E tlo re ge mabaka a gago a phethegile, ge o šetše o ithobaletše le botatago, ke mo ke tlogo tšoša wa peu ya gago, a tla morago ga gago, a tšwile mmeleng wa gago, ka tiiša bogoši bja gagwe. 13Ke yena a tlogo agele leina la ka ngwako; mme sedulo sa mmušo wa gagwe ke tlo se thekga ka go sa felego. 14Nna ke tlo ba tatagwe, mme yena e tlo ba morwa wa ka. E tlo re ge a šaetša ke mo otle ka kgati ya batho, le ka kotlo ya bana ba batho. 15Fela, kgaugelo ya ka e ka se ke ya mo tloga, boka mola e tloga Saulo, yo ke mo tlošitšego pele ga gago. 16Ngwako wa gago wona o tlo tia, le mmušo wa gago ke wa neng le neng o eya; sedulo sa gago sa bogoši se tlo ba gona ka mehla le mehla.
17Ditaba tše ka moka le dipono tše ka moka Nathane o di anegetše Dafida ka mokgwa woo.
18Kgoši Dafida a ya a dula pele ga Morena, a re: Morena Mongaka, ke nna mang, gomme le moloko wa ka ke eng, ge o bile o mphihlišitše fa? 19Gomme tše o di dirilego o hwetša e sa le tše nyenyane, Morena Mongaka, wa nkokeletša, nna mohlanka wa gago le moloko wa ka, ka go nkholofediša tše di tlogo tla, di sa le kgole ka semotho, Morena Mongaka. 20Bjale nna Dafida ke sa tlo bolelang fa go wena, etšwe mohlanka wa gago o mo tseba, Morena Mongaka? 21Tše kgolo tšeo ka moka o di dira ka gobane o di boletše, o rata ge di eba gona, wa di tsebiša nna mohlanka wa gago. 22O e mogolo ka tšona tše, Morena Mongaka! Mokawena ga a gona; ga go Modimo ge e se wena fela. Ke tšona tše re di kwilego tšohle ka ditsebe tša rena. 23Ke sefe setšhaba seka setšhaba sa gago sa Isiraele? Ke sona se nnoši faseng, se Modimo a tlilego a se namolela, sa ba sa gagwe, a godiša leina la gagwe ka sona, a se direla tše kgolo tše di šiišago mono lefaseng leno, setšhaba sa gago se di bone; o se lopolotše sa ba sa gago, wa se ntšha Egipita mo ditšhabeng le medimong ya tšona. 24O ithlometše setšhaba sa gago sa Isiraele, gore e be setšhaba sa gago neng le neng; gomme wena Morena wa ba Modimo wa bona.
25Bjale Morena Modimo, lentšu le o boletšego nna mohlanka wa gago ka lona le moloko wa gagwe, o eme ka lona ka go sa felego; o dire sona se o se boletšego. 26Ke mo leina la gago le tlogo godišwa ka go sa felego; ke mo go tlogo thwe: Morena wa mašaba ke yena Modimo wa Isiraele. Ke mo ngwako wa Dafida mohlanka wa gago o tlogo ba o tiilego pele ga gago. 27Gobane wena Morena wa mašaba, o thibolotše tsebe tša mohlanka wa gago, wa mmotša wa re: Ke tlogo agela ngwako! Nna mohlanka wa gago ka tlema pelo, ka go rapela ka thapelo ye.
28Bjalo ge, Morena mongaka, Modimo ke wena. Mantšu a gago ke therešo. Gomme nna mohlanka wa gago o mpoditše tše botse tše. 29Napa o thome e sa le bjale, o šegofatše ngwako wa mohlanka wa gago, o be pele ga gago ka go sa felego, ka gobane wena Morena mongaka o nthetše wa realo. Gomme ngwako wa mohlanka wa gago o tlo šegofala ka tšhegofatšo ya gago neng le neng.
