2 SAMUELE 19

₁Ba tsebiša Joaba ba re: Kgoši šele, e a lla; e hlokofetše ka baka la Abesalomo. ₂Mohlang woo dikati di be di fetogile sello sa setšhaba ka moka; ka gobane se kwile ge kgoši e hlokofetše ka baka la Abesalomo. ₃Gomme setšhaba sa boela motseng ka senya bjalo ka mola setšhaba se itsheneka mohla se nyatšegile se tšhabile tlhabanong. ₄Kgoši yona e be e ipipile sefahlago, e fela e gao e re: Joo Abesalomo! Ngwanake joo!

₅Joaba a ba a tla go kgoši ka ngwakong, a re: Lehono rena bahlanka ba gago ka moka o re leša dihlong, e lego rena ba re go phološitšego lehono, ba ba phološitšego barwa ba gago, le barwedi ba gago, le basadi ba gago, le basadi ba gago ba direthe. ₆Ka gobane o rata ba ba go hloilego; mme o hloya ba ba go ratago. Lehono o lemogilwe o sa re selo ka matona a gago le ka bahlanka ba gago. Le nna bjale ke tseba gore, ge rena ka moka re ka be re hwile, mme gwa phela Abesalomo, o ka be o hwetša e le mo go botse. ₇Fela, bjale tsoga, o tšwe fa ngwakong o bolele le bahlanka ba gago o ba thelediše dipelo; gobane -- ke ena ka Morena -- ge o sa tšwe o tlo lala fa go se ne monna a nago nago bošego bjo; gomme ke mo bošula bjo bo tlogo feta mabošula ka moka a kilego a go wela go tloga bjaneng bja gago go fihla lehono le.

₈Ya ba gona kgoši e tsogago, ya ya ya dula kgorong. Setšhaba sa tsebišwa gore: Kgoši šele, e dutše kgorong! Ke mo setšhaba ka moka sa nago sa tla go kgoši.

Baisiraele ka moka ba be ba tšhabile; e mongwe le e mongwe o be a boetše ga gabo. ₉Gomme batho ka moka ba meloko ka moka ya Isiraele ba thoma go itshola ba re: Kgoši ye e re namoletše diatleng tša manaba a rena; e re hlakodišitše diatleng tša Bafilisita; gomme bjale e tšhabile Abesalomo ya tloga nageng yeno. ₁₀Bjale Abesalomo eo re bego re mmeile kgoši o bolailwe tlhabanong. Bjale le reng le sa itšimeletša go goroša kgoši?

₁₁Kgoši Dafida a roma Tsadoko le Abyathara baperisita, a re: Bolelang le bagolo ba Juda le re: Le tšwafelang go bušetša kgoši ngwakong wa gagwe? (Gobane polelo ya Baisiraele e be e fihlile go kgoši mo ngwakong wa yona). ₁₂Le re: Le lena le bana bešo; re batee ka setswalo. Le tšwafelang go goroša kgoši? ₁₃Amasa le mmotšeng le re: A ga ke re wena o wa moloko wešo? Modimo a a nkotle ge ke sa go dire molaodi wa madira bakeng sa Joaba. ₁₄Ka mokgwa wo a goga dipelo tša banna ba Juda ka moka, ba ba setlemo setee, ba iša lentšu go kgoši ba re: Boa o na le bahlanka ba gago ka moka!

₁₅Gomme kgoši ya boa ya fihla nokeng ya Jorodane. Bajuda ba be ba tlile Giligala go hlakanetša kgoši le go e sediša noka ya Jorodane. ₁₆Gomme le Simei morwa wa Gera monna wa ga Benyamini a akgofa a tla Bahurimi a na le banna ba Juda go hlakanetša kgoši Dafida. ₁₇A tla a na le banna ba sekete ba ga Benyamini; le Tsiba mohlanka wa ga Saulo a tla a na le barwa ba gagwe ba lesome le metšo e mehlano, le bahlanka ba gagwe ba masome a mabedi. Bona bao ba akgofa ba sela noka ya Jorodane, kgoši e sešo ya sela.

₁₈Ya re ge sesediši se sa sediša batho ba mošate, se lebeletše go dira se kgoši e se ratago, ke ge go tla Simei morwa wa Gera, a itahlela fase a lotšha, ge kgoši e sa re ke a sela. ₁₉Simei a bolela a re: Hle Mongaka, o se nthere molato! O se gopole ka mo nna mohlanka wa gago ke šaeditšego ka gona mohla wola ge kgoši mong wa ka a etšwa Jerusalema! O se ke wa ya le tšeo! ₂₀Gobane nna mohlanka wa gago ke tseba gobane ke sentše. Bjale ke nna e! Ke tlile ke le wa pele wa moloko wa Josefa gore ke hlakanetše kgoši mong wa ka.

₂₁Abisai morwa wa Tseruya a napa a re: Afa re ka lesa go bolaya Simei, yena yo wa go rogaka motlotšwa wa Morena!

₂₂Gomme Dafida a re: Ditaba tša ka ga se tša lena barwa ba Tseruya; ka gobane bjale le mphetogetše manaba. A lehono le re go ka bolawa motho mo go Isiraele? A le re ga ke tsebe ge lehono kgoši ya Isiraele e le nna? ₂₃Kgoši ya bolela le Simei ya re: O ka se ke wa bolawa! Ya ba ya mo enela keno.

₂₄Mefibosethe morwa wa Saulo le yena o be a tlile go hlakanetša kgoši. O be a sa hlapa maoto, a sa boola maledu, a sa hlatswa diaparo go tloga mola kgoši e tlogile go fihla la ge e boa mme ntwa e fedile. ₂₅Bjale ge a tšwile Jerusalema, a tlile go hlakanetsa, kgoši ya mmotšiša ya re: Mefibosethe, ke ka baka lang o sa ka wa sepela le nna?

₂₆Mefibosethe a re: Kgoši Mongaka! Ke forilwe ke mohlanka wa ka; ka gobane ke be ke sa re ke tlema pokolo ya ka, ke namele ke sepele le kgoši, ka gobane nna mohlanka wa gago ke segole, ₂₇ke ge a eya a mphara go mong wa ka. Fela, wena Kgoši Mongaka o boka morongwa wa Modimo. Dira ka mo o ratago. ₂₈Ka gobane ba leloko la tate e be e se ba selo, ba be ba swanetše go bolawa pele ga gago, Kgoši Mongaka. Wa upša wa bea nna mohlanka wa gago mo go dulago ba ba jago dijo tša gago. Bjale ke sa belang? Ke sa begang go kgoši?

₂₉Kgoši ya re: O reng o sa bolela ditaba tša gago? Nna ke re: Wena le Tsiba arolelanang mašemo ao.

₃₀Mefibosethe a re: Kgoši, a ka no a tšea ka moka. Nna ke leboga ge kgoši e goroga e thabile.

₃₁Le Barasilai a tla a etšwa Rogelima, a felegetša kgoši go fihla nokeng ya Jorodane. ₃₂Barasilai o be a tšofetše gagolo, a na le nywaga e masome a seswai. Ke yena a bego a babalela kgoši mola e le Mahanaime; e be e le monna e a boetšwego gagolo. ₃₃Kgoši ya bolela le Barasilai ya re: Sela le nna ke go babalele kua ga ka Jerusalema.

₃₄Barasilai a fetola a re: Matšatši a bophelo bja ka e sa tlo ba a makae mo nkago rotogela Jerusalema le kgoši? ₃₅Bjale ke na le nywaga e masome a seswai. Tše botse le tše e sego botse ga ke sa di bona. Nna mohlanka wa gago ga ke sa kwa bose bja se ke se jago. Le dikoša baopedi ga ke sa di kwa. Nna mohlanka wa gago ke tlo ba ke direlang ge ke fo go imela, Kgoši Mongaka? ₃₆A mohlanka wa gago a go felegetše go se nene, a go sediše noka ya Jorodane, Kgoši Mongaka; tše kgolo tšeo o tlo ba ntira ka baka lang, kgoši? ₃₇Lesa nna mohlanka wa gago ke boele gae, ke yo hwela motseng wa gešo mo go lego lebitla la tate le la mme. Kimehama mohlanka wa gago šo; a yena a ye le kgoši mong wa ka. Yena o mo dire ka mo o ratago.

₃₈Kgoši ya re: Kimehama a a sele le nna ge; ke tlo mo dira ka mo go go thabišago; gomme wena ke tlo go direla se o kago se nyaka go nna.

₃₉Ya re ge batho ka moka le kgoši ba setše noka ya Jorodane, kgoši ya atla Barasilai ya laelana nae ka ditšhegofatšo. Gomme Barasilai a boela ga gabo.

₄₀Bjale kgoši ya fetela motseng wa Giligala. Kimehama a sepela le kgoši. Ba ba sepetšego le kgoši ke batho ka moka ba Juda le seripa sa Baisiraele. ₄₁Gwa tla banna ba Isiraele ka moka, ba bolela le kgoši ba re: Batho ba ba gešo ba Juda ba reng ba go thopa, ge fa nokeng ya Jorodane e le bona ba ba sedišago kgoši le ba motse wa mošate le banna ka moka ba ba nago le Dafida?

₄₂Gwa fetola banna ba Juda ba re: Ke ka gobane kgoši e le moloko wešo! Le reng le befeletšwe ka taba ye? A le re re phela ka dijo tša kgoši? Goba le re re tla re tšea dimpho go kgoši?

₄₃Banna ba Isiraele ba fetola ba re: Rena re meloko e lesome ye e swanetšego go bušwa ke Dafida; mme lena le moloko o tee fela. Le re nyaletšang? A ga se rena re thomilego go re: Kgoši ya rena e gorošwe?

Fela gwa thatafala le le boletšwego ke banna ba Juda, la fenya le le boletšwego ke banna ba Isiraele.