Keletšo ya Ahitofele le ya Husai
1Bjale Ahitofele a bolela le Abesalomo a re: Lesa ke hlaole banna ba dikete tše lesome le metšo e mebedi, ke tšwe ke hlomarele Dafida e sa le bošego bjo; 2ke mo wele godimo a sa lapile a feletšwe ke maatla. Ke tlo mo tšhoša; mme batho ba ba nago nae ba tlo tšhaba, ka bolaya kgoši e šetše e le nnoši. 3Ke mo ke tlogo go tlišetša setšhaba ka moka, bjalo ka ge mosadi a etla go monna wa gagwe. Yo o mo tsomago ke monna o tee fela; ga o lwe le setšhaba ka moka sa Isiraele.
4Gomme lentšu leo la kgahla Abesalomo le bagolo ba Isiraele ka moka.
5Bjale Abesalomo a re: Bitšang le Husai wa Araki, re kwe ganong ga gagwe. 6Husai a tla go Abesalomo; Abesalomo a mo anegela se Ahitofele a se boletšego, a re: Wena o reng? A o re re dire ka mokgwa woo? Ge o gana, gona re botše.
7Husai a fetola a re: Keletšo ya Ahitofele ya lehono ga e botse. 8A re: Tatago, le wena, o a mo tseba; le banna ba gagwe o ba tseba ge e le bagale; le gona ke ba bašoro wa tautshadi ge e hlakotšwe bana. Gomme tatago ke monna wa mohlabani; a ka se ke a ithobalela a le mo setšhabeng. 9Mo a lego gona bjale, mohlomongwe o utame legageng le ge e le mo gongwe. Gomme ge ba bangwe ba banna ba gago ba ka bolawa e sa le mathomong, mme batho ba di kwa, ba tlo tloga ba re: Ba ba emago le Abesalomo ba fentšwe! 10Gona le eo e bego e le mogale, a na le pelo e tiilego boka tau, a ka nolega moko; ka gobane Baisiraele ka moka ba tseba ge tatago e le mogale, le ba ba nago le yena e le dioka. 11Nna ke eletša ka la ka ke re: A Baisiraele ka moka ba rapiwe go goma ka Dani le ka Bereseba, ba ate wa lešabašaba la lewatle; gomme le wena o tšwele nabo tlhabanong. 12Gomme mo re tlogo mo hwetša, re tlo mo wela godimo boka phoka ge e enetše naga, re se šadiše le o tee wa ba ba nago nae. 13Gomme ge ba ka bokana motseng o mongwe, gona Baisiraele ka moka ba tlo tla le dithapo, ra tlema motse woo ra o goganyetša nokeng, gwa se šale le leswikana letee.
14Abesalomo le banna ba Isiraele ka moka ba re: Keletšo ya Husai wa Araki ke e botse, e phala ya Ahitofele.
Ge di eya ka tsela ye, di be di laetšwe ke Morena gore go logollwe maano a magolo a Ahitofele, gore Morena a wetše Abesalomo kotsing.
15Husai a sebela Tsadoko le Abyathara baperisita, a re: Ahitofelo o eleditše Abesalomo ka la go re le ka go re; gomme nna ka eletša ka la ka la go re le la go re. 16Bjale akgofang le rome lentšu le botše Dafida le re: Bošego bjo o se ke wa robala ka mono molaleng wa lešoka; o hlaganele o selele mošola, gore kgoši le batho ba yona ba se ke ba fedišwa.
17Ke ge Jonathane le Ahimaatse ba eme sedibeng sa Rogele. Gwa tla mosetsana wa molata a ba sebela. Bona ba tloga gore ba yo botša kgoši Dafida; ka gobane bona ka noši ba be ba sa kgone go tsena motseng ba bonwa. 18Fela, ba bonwa ke mohlankana e mongwe; yena a yo ba seba go Abesalomo. Bona babedi ba tšea ka lebelo ba ba ba tla Bahurimi lapeng la motho e mongwe e a bego a na le molete wa meetse ka lapeng; mme ba tsena moleteng woo. 19Mosadi a tšea legogwa a khurumetša molete ka lona, a anega lesere, gwa se ke gwa lemogwa selo. 20Bahlanka ba Abesalomo ge ba fihla mo lapeng, ba botšiša mosadi eo ba re: Ba kae Ahimaatse le Jonathane?
Mosadi a re: Ba sa tšo sela nokana yeo.
Bahlanka ba ya go ba tsoma, ba ba hloka, ba ba ba boela Jerusalema. 21Ba mo moleteng ba tsebo tšwa, ba ya ba botša Dafida ba re: Tsogang le akgofeng le sele noka, gobane Ahitofele o le logetše maano a go re le go re.
22Dafida a napa a tsoga a na le batho ba gagwe, ba sela noka ya Jorodane gwa se ke gwa šala le o tee e a sa kago a sela.
23Bjale Ahitofele ge a bona go sa ka gwa dirwa ka maano a gagwe, a tlema pokolo ya gagwe, a tsoga a boela motseng wa gabo, a laelana le ba gabo, a napa a ikgama a hwa; a bolokwa lebitleng la tatagwe.
24Dafida o be a ile Mahanaime. Abesalomo a sela noka ya Jorodane a na le banna ba Isiraele ka moka. 25Legatong la Joaba Abesalomo o be a beile Amasa a ba molaodi wa madira. Amasa e, e be e le morwa wa monna e mongwe wa Moisiraele, yo leina la gagwe e bego e le Jithira, e a bego a tsene go Abigaile morwedi wa Nahasi ngwana boTseruya mmago Joaba. 26Gomme Baisiraele ka moka ba bokana nageng ya Gileada ba na le Abesalomo.
27Dafida mola a fihla Mahanaime, Sobi morwa wa Nahasi wa Raba motse wa Baamoni, le Makiri morwa wa Amiele wa Lodibara, le Barasilai Mogileada wa motse wa Rogelima, 28ba tliša malao, le megopo, le dipitša, le mabele, le leotša, le bupi, le dipabe, le dinawa, le dihlodi, le dijo tše di budulego, 29le dinose, le maswi, le dihuswane, le maswi a a kgahlilego, ba di tliša go Dafida le go setšhaba se se bego se na nae, ka gobane ba re: Setšhaba se swerwe ke tlala le malapi le lenyora lešokeng.
