2 SAMUELE 13

₁Abesalomo morwa wa Dafida o be a na le kgaetšedi ya gagwe ya sebopego se sebotse; leina la mosetsana eo e be e le Thamara. Gomme Aminone morwa wa Dafida a mo rata. ₂Aminone a hlaka a ba a babja ka baka la Thamara ngwana wa tatagwe; gobane e be e le kgarebe, gomme Aminone a hwetša e le mo go thata go mo dira selo. ₃Bjale Aminone o be a na le mogwera, Jonadaba morwa wa Simea ngwana Bodafida. Jonadaba o be a hlalefile kudu. ₄A botšiša Aminone a re: Wena ngwanakgoši, o dirwa ke eng ka mehla ge o tsoga o otile ka mokgwa wo? A o ka se mpotše?

Aminone a fetola a re: Ke ka gobane ke rata Thamara kgaetšedi ya Abesalomo ngwanešo.

₅Jonadaba a re: Robala malaong a gago, o itire molwetši; ge tatago a tlilo go bona, o mo kgopele o re: A go tle Thamara kgaetšedi ya ka, a mphe bogobe ke je, a nkapeele fa ke mmona, ke tle ke jele seatleng sa gagwe.

₆Aminone a lala a itira molwetši. Ya re ge kgoši e tlile go mmona, a kgopela kgoši a re: A go ke go tle Thamara kgaetšedi ya ka, a ntirele dinkgwana tše pedi fa ke mmona, a nteše ka seatla sa gagwe.

₇Dafida a roma motho, a bitša Thamara ka ngwakong, a re: Hle yaa ngwakong wa Aminone kgaetšedi ya gago, o mo direle dijo.

₈Thamara a ya ngwakong wa Aminone kgaetšedi ya gagwe, a mo hwetša a le dilaong; a tšea bupi a bo duba, a dira dinkgwana gona moo a lebeletšwe ke Aminone, a di bopa. ₉A di gadika a mo solela; gomme a gana go ja. Bjale Aminone a re: Banna bohle a ba tšwe! Ka moka ba tšwa. ₁₀Bjale a bolela le Thamara a re: Ntlišetše dijo ka mona phapošing, o nteše ka seatla sa gago. Thamara a tšea dinkgwana tše a di dirilego, a tsena natšo phapošing go Aminone kgaetšedi ya gagwe. ₁₁Ya re a sa di iša gore a je, Aminone a mo swara a re: Kgaetšedi ya ka, tlaa o robale le nna! ₁₂Thamara a re: Aowa hle, kgaetšedi ya ka, o se ke wa nkata. Tše bjalo mo go Isiraele ga di dirwe; se dire tša bošilo. ₁₃Ke tla ya kae le dihlong tša ka; gomme le wena o tlo ba bjalo ka e mongwe wa mašilo mo go Isiraele. Ako bolele le kgoši; yena a ka se ke a go iletša nna.

₁₄Aminone a gana go kwa se a se bolelago, a mo kata, a mo senya a robetše nae. ₁₅Bjale Aminone a napa a mo hloya ka lehloyo le legolo; lehloyo la gagwe la fetiša lerato le a bego a mo rata ka lona, e le lehloyo le legolo; a mo rera a re: Tsoga, o tloge fa.

₁₆Thamara a re: Bobe bjo bja ge o nthaka, bo feta bja pele bjo o bo dirilego mo go nna.

Aminone a gana go kwa se a se bolelago. ₁₇A ba a bitša lesogana la gagwe le le bego le mo hlankela, a re: Mo tloše fa, o mo ntšhetše kua ntle, o tswalele mojako.

₁₈Gomme Thamara o be a apere seaparo sa mebala; gobane barwedi ba kgoši ba dikgarebe ba be ba apara tše bjalo. Mohlanka eo wa Aminone a mo ntšhetša ntle a tswalela mojako. ₁₉Thamara a napa a itšhela molora hlogong, a gagola seaparo seo sa mebala se a bego a se apere, a ithwala megono, a hlaboša lentšu a lla, a itlogela.

₂₀Abesalomo kgaetšedi ya gagwe a mmotšiša a re: A ke Aminone kgaetšedi ya gago e a bego a na nago? Homola bjale, kgaetšedi ya ka. Ke kgaetšedi ya gago. O se ke wa iša pelo kgole ka taba ye. Gomme Thamara a dula ngwakong wa Abesalomo kgaetšedi ya gagwe a šulafetše.

₂₁Kgoši ge a ekwa ditaba tše ka moka, a tuka bogale gagolo. ₂₂Abesalomo a se ke a hlwa a bolela le Aminone le lentšu letee, e ka ba le le botse goba le lebe, ka ge a mo hloya a sentše Thamara kgaetšedi ya gagwe.

₂₃Gwa fela nywaga e mebedi. Abesalomo a kuta dinku tša gagwe kua Baali-Hatsora, kgauswi le Efuraimi; a laletša bana ba kgoši bohle. ₂₄A ya go kgoši a re: Taba še, nna mohlanka wa gago ke thwetše bakuti ba dinku. A kgoši le bahlanka ba gagwe ba ke ba ye le nna mohlanka wa gago.

₂₅Kgoši ya fetola ya re: Aowa hle, morwa wa ka! Re ka se ke ra ya ka moka, re se tlo go imela. A gana le ge Abesalomo a mo phegelela, a fo re: A di go atlegele!

₂₆Abesalomo a re: Gona Aminone ngwanešo a a ye le rena!

Kgoši ya re: A ka elang nago? ₂₇Abesalomo a fela a phegelela kgoši, ya ba ya dumela ge Aminone e eya le yena, le bana ba kgoši ka moka. ₂₈Gomme Abesalomo a laela bahlanka ba gagwe a re: Le lebeleleng; ge le bona pelo ya Aminone e thabile ka sedila, mme nna ka re: Bolayang Aminone; le mmolaye; le se ke la boifa, ka gobane le tlo ba le laetšwe ke nna, le tiišeng maatla, le beteng dipelo.

₂₉Bahlanka ba Abesalomo ba dira Aminone ka mo ba laetšwego ke mong wa bona. Gomme barwa ba kgoši ba tšhoga ka moka; bohle ba namela makaba a bona ba tšhaba.

₃₀Ge ba sa le tseleng, taba yeo ya fihla go Dafida, gwa thwe: Abesalomo o bolaile barwa ba kgoši ka moka; ga go a šala le o tee wa bona! ₃₁Kgoši a tšhoga, a gagola diaparo tša gagwe, a patlama fase. Bahlanka ba kgoši ka moka ba ema ba gagotše diaparo.

₃₂Gwa bolela Jonadaba morwa wa Simea ngwana Bodafida, a re: O se ke wa re go bolailwe masogana ka moka a barwa ba kgoši. Go bolailwe Aminone fela. Ke taba ye Abesalomo a e rerilego go tloga mola Aminone a sentše Thamara kgaetšedi ya Abesalomo. ₃₃Bjale Kgoši Mongaka! O se ke wa ja pelo ka taba ye, wa re go bolailwe barwa ba kgoši ka moka. Ga go bjalo; go bolailwe Aminone fela.

₃₄Abesalomo yena o be a tšhabile.

Ya re ge moletamotse a iša mahlo kua kgole, a lebeleša a bona go etla batho ba bantši, ba lokologane ka tsela e šikago le thaba. ₃₅Jonadaba a botša kgoši a re: Sebala barwa ba kgoši, ba e tla bjalo ka ge mohlanka wa gago a go boditše. ₃₆A sa tšo realo, ke ge barwa ba kgoši ba fihla, ba hlaboša mantšu ba lla; le kgoši le bahlanka ba yona ba lla; ya ba sello se segolo.

₃₇Abesalomo yena o be a tšhabile, a ile go Thalamai morwa wa Amihudi kgoši ya Gesuri. Gomme Dafida a fela a llela morwa wa gagwe, ka mehla. ₃₈Abesalomo a re go tšhabela Gesuri a fetša nywaga e meraro a dutše ntshe. ₃₉Kgoši Dafida a ba a eleletša go etela Abesalomo, ka gobane o be a se sa llela Aminone ge a hwile.