Dafida o sebelwa lehu la Saulo. O llela Jonathane
1Mehleng ya ge Saulo a šetše a hwile, ge Dafida a sa tšo boa polaong ya Baamaleke, a dula Tsikilaga matšatši a mabedi. 2Ka la boraro gwa tla monna a etšwa direng tša Saulo, a itšhetše mmu hlogong; a tla go Dafida a wela fase a lotšha. 3Dafida a mo rera a re: O tšwa kae? Yena a re: Ke tšwa direng tša Isiraele; ke phonyokgile. 4Dafida a re: A ko mpotše; di reng ditaba?
Yola a re: Setšhaba se tšhabile tlhabanong; batho ba fedile; go bolailwe ba bantši. Le Saulo, le Jonathane morwa wa gagwe, ba bolailwe.
5Dafida a botšiša lesogana leo le mmotšago ditaba tšeo, a re: O tseba kang ge Saulo a bolailwe le Jonathane morwa wa gagwe?
6Lesogana la go mmotša ditaba la re: Ka re ge ke etla dithabeng tša Giliboa, ka bona Saulo a itlhotlela ka lerumo, a šetše a kganyelelwa ke ba dikoloi le banamedi ba dipitsi. 7A retologa a mpona, a mpitša; nna ka re: Ke nna e! 8A nthera a re: O mang? Nna ka re: Ke Moamaleke! 9Yena a re: Tlaa mo, o mpolaye. Ke swerwe ke mantiko; gomme bophelo bo sa le go nna ka moka. 10Ke moka ka batamela ka mmolaya, ka gobane ke be ke tseba gore a ka se ke a phela a šetše a wile ka mokgwa woo. Ka tšea mphapahlogo wa bogoši mo hlogong ya gagwe, le maseka mo mabogong a gagwe; mme ke di tlišitše mo go wene, mongaka!
11Dafida a swara diaparo tša gagwe a di gagola; le banna ba ba bego ba na nae ba dira ka mokgwa woo. 12Ba hlokofala ba lla, ba ikona dijo la ba la dikela; ba dira bjalo ka baka la Saulo le Jonathane morwa wa gagwe, le ka baka la setšhaba ka moka sa Morena, le ka baka la meloko ka moka ya Isiraele, ka ge ba fedile ka lerumo.
13Lesogana leo la go mmotša ditaba tše, Dafida a bolela nalo a re: O wa ga kae?
Yola a re: Ke ngwana wa monna wa mofaladi wa Amaleke.
14Dafida a re: O reng o sa ka wa boifa go iša motlotšwa wa Morena seatla, wa mo senya? 15Gomme Dafida a bitša e mongwe wa masogana, a mo laela a re: Tlaa o mo hlabe! Lesogana leo la mo hlaba, la mmolaya a hwa. 16Dafida o be a mmoditše a re: Ge o bolawa, ke molato wa gago; o begilwe ke molomo wa gago ge o re: Ke bolaile motlotšwa wa Morena.
17Gomme Dafida a llela Saulo le Jonathane morwa wa gagwe ka sefela sa dillo. 18A re bana ba Juda ba rutwe sefela se sa bora; ke sona sela se se ngwadilwego pukung ya baloki.
19Joo Isiraele!
Dithakga tša gago di feletše kua thabeng tša gago.
Joo! Go bolailwe ba bagale.
20Se di begeng kua Gathe.
Le se di kwatše mekgobeng ya Asikalone;
gore banenyana ba Bafilisita ba se thabe,
go se hlalale barwedi ba ba go se bolle.
21Joo thaba tša Giliboa!
Mo go lena a go hlokwe phoka le pula,
le mašemo a dithakangwaga;
gobane moo go lahlilwe kotse tša bagale.
Kotse ya Saulo ga e sa tlo tlola setlolo.
22Bora bja Jonathane bo be bo sa boe,
Bo sa tlala mekgeledi le makhura a bagale.
Tšhoša ya Saulo e be e sa boe e le fela.
23Saulo le Jonathane!
Baratwa ba go nkgahla ba sa phela!
Le go hweng ga bona ga ba tlogelana.
Ka lebelo, le be le šia nong!
Ka maatla, le be le phala tau.
24Banenyana ba Isiraele! Llelang Saulo,
wa go le apeša meretele le mathabo,
a le tšhepiša diaparo ka dipheta tša gauta.
25Joo! Bagale ba fedile ba le tlhabanong!
Jonathane o kutlilwe mo thabeng tša gago.
26Jonathane ngwana wešo! Ke nyama ka baka la gago.
O be o nnatefela ruri.
O mmakaditše ka lerato lago
La go phala rato la basadi.
27Joo! Go bolailwe ba bagale!
Marumo a tlhabano a fedile!
