Bolwetši bja Hiskia; boikokobetšo bja gagwe; lehu la gagwe
1Mehleng yeo Hiskia o kile a babja wa go hwa. Jesaya moporofeta morwa wa Amotsi a tla go yena a mo rera a re: Morena o re: Laela ba geno, gobane o tlo hwa, o ka se ke wa phela.
2Hiskia a phekgoga a lebiša sefahloga sa gagwe lebotong, a rapela Morena a re: 3Joo, Morena, gopola ka mo ke sepetšego ka gona pele ga gago ke go botegetše ka pelo ka moka, ke dira se se go kgahlago. Hiskia a lla o bohloko. 4Ya re ge Jesaya a sešo a tšwa lapeng la ka gare, a tlelwa ke lentšu la Morena la re: 5Goma o botše Hiskia moetapele wa setšhaba saka, o re: Morena Modimo wa Dafida tatago o re: Thapelo ya gago ke a kwile; megokgo ya gago ke e bone. Ke tlo go fodiša, wa tlo rotogela Ngwakong wa Morena ka tšatši la boraro. 6Bophelo bja gago ke tlo bo eketša ka nywaga e lesome le metšo e mehlano; le gona ke tlo go namolela seatleng sa kgoši ya Asiria, ka namolela le motse wo ka baka laka, le ka baka la Dafida mohlanka waka.
7Gomme Jesaya a tla a re: Tlišang mamapo a gago! Ba a tliša, ba a bea sešong; mme Hiskia a fola. 8Bjale Hiskia a botšiša Jesaya a re: Ke tlo tseba kang ge Morena a tlo mphediša ka ba ka rotogela Ngwakong wa Morena ka tšatši la boraro?
9Jesaya a re: Seka se se tlogo tšwa go Morena, se o tlogo bona ka sona gore Morena o tlo dira se a se boletšego, sese: Bolela wena ka nnoši: A o rata ge moriti o eya pele ka dikga tše lesome, goba o rata ge o boela nthago ka dikga tše lesome?
10Hiskia a re: Ge moriti o eya ka tekanyo tše lesome, ga se mo gothata; a o boele nthago ka dikga tše lesome.
11Gomme Jesaya a hlaboša lentšu a rapela Morena; mme Morena a gomiša moriti ka dikga tše lesome, mo o bego o šetše o fetile dikga kokwaneng ya Ahasi.
12Mehleng yeo Berodaka-Baladani morwa wa Baladani kgoši ya Babele o rometše Hiskia mangwalo le dineo, gobane o be a kwile ge Hiskia a be a babja. 13Hiskia a theetša se batseta ba se bolelago, a ba bontšha ngwako wa mahumo a gagwe ka moka, disilifera le digauta, le dinoko le ditlolo tše bohlokwa, le ngwako wa dibetša ka moka, le tšohle tše di bego di le gona ngwakong wa gagwe wa mahumo. Mo ngwakong wa gagwe le mo motseng wa mošate gwa se be le selo se a sa kago a ba bontšha sona. 14Jesaya moporofeta a tla go kgoši Hiskia a mmotšiša a re: Banna bao ba reng?
Hiskia a re: Ba tšwa nageng ya kgole, kua Babele.
15Jesaya a re: Ba boneng ngwakong wa gago?
Hiskia a re: Ba bone tšohle tše di lego ngwakong waka; ga go selo mahumong aka, se ke sa kago ka ba bontšha sona.
16Ke mo Jesaya a boditšego Hiskia a re: Kwaa se Morena a se bolelago: 17Tseba gore dilo tše di lego ngwakong wa gago, tše botatago ba di kgobetšego go fihla lehono, go tla matšatši a di tlogo išwa Babele ka ona; go ka se ke gwa šala selo. Morena o realo. 18Le gona mo go barwa ba gago ba ba tšwago go wena, ba o tlo go ba tswala, go tlo tšewa ba bangwe, ba dirwa baloti ba ngwako wa mošate wa kgoši ya Babele.
19Hiskia a fetola a re: Ke le le botse Lentšu leo la Morena le o mpotšago lona. A re: Ke tlo reng? A go ke go be le šebešebe le go botana ge ke sa phela.
20Ge e le ditaba tše dingwe tša Hiskia, le tša ge a dira lethsa le mokero, a tliša meetse motseng, naa ga di a ngwalwa mo pukung ya ditaba tša kgale tša dikgoši tša Juda? 21Hiskia o ithobaletše le botatatgwe, legatong la gagwe gwa buša Manase morwa wa gagwe.
