Hiskia wa Juda. Jerusalema o rakelelwa ke Sanheribe
1Hiskia morwa wa Ahasi o thomile go buša Juda ka ngwaga wa boraro wa Hosea morwa wa Ela kgoši ya Isiraele. 2O be a na le nywaga e masome a mabedi a metšo e mehlano ge a thoma go buša; a fetša nywaga e masome a mabedi a metšo e senyane a le kgoši motseng wa Jerusalema. Leina la mmagwe e be e le Abi morwedi wa Sakaria. 3Hiskia o dirile tše di kgahlilego Morena, a etša Dafida tatagwe. 4Ke yena a fedišitšego meboto, a pšhatla diswantšho, a thokgaganya dikokwane tša Ašera, a pšhatlaganya noga yela ya mphiri ye Moše a e dirilego, gobane go fihla mehleng yeo Baisiraele ba be ba e thuntšhetša diorelo, ba re ke Nehusitiane. 5O be a botile Morena Modimo wa Isiraele. Mo go magoši ka moka a Juda, go a kgale le go ao a mo latetšego, ga go e a swanago le yena. 6O be a gomarela Morena, a se ke a gomela nthago, a hlokomela ditaelo tše Morena a di laetšego Moše. 7Morena o be a na le yena, a ba le mahlatse go tšohle tše a tšwetšego go di dira. O hlanogetše kgoši ya Asiria, a se hlwe a loba ntshe. 8Bafilisita o ba fentše go iša Gasa, go iša dinakaneng tša motse woo, a goma sebong sa dihlodi le motseng wa dibo.
9Ka ngwaga wa bone wa ge Hiskia a le kgoši, e lego ngwaga wa go šupa wa ge Hosea morwa wa Ela a le kgoši ya Isiraele, ke mo Salamanasere kgoši ya Asiria a rotogetšego Samaria, a o rakelela. 10A ba a o thopa ge go fetile nywaga e meraro. E be e le ka ngwaga wa go selela wa ge Hiskia a le kgoši ya Juda, ke go re ngwaga wa senyane wa Hosea Kgoši ya Isiraele, ge motse wa Samaria o thopša. 11Baisiraele ba išwa bothopša ke kgoši ya Asiria; ya ba iša Asiria ya ba dudiša kwa Hala le Habora nokeng ya kwa Gosana metseng ya Bameda.
12E be e le ka gobane ba sa ka ba kwa se Morena Modimo wa bona a se boletšego, ba senya kgwerano ya gagwe, ba se theetše tšohle tše Moše mohlanka wa Modimo a ba laetšego tšona, ba se di dire.
13Ka ngwaga wa lesome le metšo e mene wa ge Hiskia a le kgoši gwa rotoga Sanheribe kgoši ya Asiria, a lwa le metse ya dibo ya Juda, a e thopa. 14Hiskia kgoši ya Juda a iša lentšu kwa Lakisi go kgoši ya Asiria a re: Ke fošitše; a ko nkgomele. Tše o nthwešago tšona, ke tlo di rwala! Kgoši ya Asiria ya mo ntšhiša Talente tše makgolo a mararo tša silifera, le Talente tše masome a mararo tša gauta. 15Hiskia a ntšha silifera ka moka ya Ngwakong wa Morena le ya mo polokelong tša mošate. 16Mehleng yeo Hiskia a manolotša gauta ya mamati a Ntlokgethwa ya Morena, le gauta ya dijakwaneng tše yena Hiskia kgoši ya Juda a bego a di manegile, a loba kgoši ya Asiria ka gauta yeo. 17Kgoši ya Asiria ya roma Tharatane, le Rabasarisa, le Rabasake, ba tšwa Lakisi ba na le dira tše kgolo, ba ya Jerusalema go kgoši Hiskia; ba rotoga ba tla Jerusalema. Ge ba fihlile, ba ema mokerong wa letshana la tletlolo o šikago le mmila o fetago ka tšhemong ya mohlatswi. 18Ba hlaboša lentšu ba bitša kgoši. Gwa tšwa Eliakima morwa wa Hilikia molaki wa mošate, le Sebena mongwadi, le Joa morwa wa Asafa e bego e le yena letona le legolo; ba tšwela go bona. 19Rabasake a ba rera a re: Botšang Hisikia le re: Kgoši e kgolo, kgoši ya Asiria e re: Ke kholofelo mang ye o e botago? 20A o re maano le bogale thlabanong di dirwa ka molomo fela? Bjale o botile mang ge o ntlhanogela? 21Anthe o holofetše Egipita lehlakanoka leo le le tenegilego, le e rego ge motho a ikokotlela ka lona, le mo thule seatla! Ke tšona tše Farao kgoši ya Egipita a di dirago bohle ba ba mmotago.
22Ge le ka nthera la re: Re botile Morena Modimo wa rena! -- naa ga se yena Hiskia e a feditšego meboto ya gagwe, le dialetare tša gagwe, a botša Juda le Jerusalema a re: Aletare le khunamele ye ya fa Jerusalema! 23O ko leke mamphega le mong waka kgoši ya Asiria, nna ke nee dipitsi tše dikete tše pedi, re bone ge o ka kgona go ntšha banamedi ba tšona. 24Le mokgoma o tee wa bahlanka ba banyane ba mong waka o ka kgona bjang go mo raka. Aowii, gale o botile Egipita ka ge go na le makoloi le banamedi ba dipitsi. 25Afa o re ke filo tla go phušola felo fa ka ntle ga Morena? Hleng ke yena Morena a nthomilego a re: Rotoga o senye naga yeo.
26Eliakima morwa wa Hilikia, le Sebena, le Joa, ba bolela le Rabasake ba re: Hle bolela le rena bahlanka ba gago ka Seasiria, gobane re a se kwa; se bolele le rena ka Sejuda; setšhaba se se lego morakong se a go kwa.
27Rabasake a fetola a re: A le re mong waka o nthometše go bolela taba tše le mong wa lena, goba le lena? Nna o nthomile gore ke bolele le banna bao ba dutšego morakong, bao -- e tlogo re ba na le lena -- ba tlo ba ba ja masepa a bona, ba nwa moroto wa bona.
28Bjale ke mo Rabasake a goeleditšego ka lentšu le legolo, a bolela ka Sejuda a re: Kwang lentšu la kgoši e kgolo, kgoši ya Asiria. 29Kgoši e re: Le se ke la forwa ke Hiskia; ga a kgone go le namolela seatleng saka. 30Le gona Hiskia a se ke a le botiša Morena, a re: Morena a ka se ke a lesa go namolela motse wo; a re: Motse wo o ka se ke wa gafelwa diatleng tša kgoši ya Asiria. 31Le se ke la theetša se Hiskia a se bolelago; kgoši ya Asiria a re: Ntobeng, le tšwe le tle go nna; ke mo motho a tlogo ja morara wa gagwe le mogo wa gagwe, a nwa meetse a sediba sa gagwe. 32Ke mo ke tlogo boa ka le iša nageng e swanago le ye ya geno, naga ya mabele le ya dienywa, naga ya bogobe le ya dirapa tša merara, ya makhura a mehlware le ya dinose. Ke mo le tlogo phela, la se ke la hwa. Le se ke la kwa se Hiskia a se bolelago; ke go le fora ge a re: Morena o tlo re namolela! 33A go na le modimo wa setšhaba se sengwe o namoletšego naga ya wona seatleng sa kgoši ya Asiria? 34E kae medimo ya Hamathi le ya Arapadi? E kae medimo ya Sefarafaima le ya Hena le ya Ifa? A e namoletše Samaria seatleng saka? 35Medimo ke efe mo go medimo ka moka ya dinaga, ye e kgonnego go namolela naga ya yona seatleng saka, ge le re: Morena o tlo namolela Jerusalema seatleng saka.
36Gomme setšhaba sa ikhomolela se sa fetole selo, ka gobane taelo ya kgoši e be e itše: Le se mo fetole selo! 37Eliakima morwa wa Hilikia molaki wa mošate, le Sebena mongwadi, le Joa morwa wa Asafa yena letona le legolo, ba tla go Hiskia ba gagotše diaparo, mme ba anegela kgoši tše Rabasake a di boletšego.
