2 DIKGOŠI 17

₁Hosea morwa wa Ela o thomile go buša Isiraele ka ngwaga wa lesome la metšo e mebedi wa Ahasi kgoši ya Juda; a fetša nywaga e senyane a le kgoši, motseng wa Samaria. ₂O dirile tše di befetšego Morena; fela, go senyeng a se lekane le dikgoši tša Isiraele tše di bego di bušitše pele ga gagwe. ₃O tšwetšwe dira ke Salamanasere kgoši ya Asiria, Hosea a loba, a mo ntšhetša dibego. ₄Fela, kgoši ya Asiria ya bona ge Hosea a rera tša go hlanoga, a bile a rometše batseta go Soo kgoši ya Egipita, a šetše a lesitše go ntšhetša kgoši ya Asiria dibego tše a bego a di ntšhitše ngwagola le ngwagolaola, kgoši ya Asiria ya mo swara, ya mo iša kgolegong a tlemilwe.

₅Kgoši ya Asiria ya rotoga ya hlagela naga ka moka, ya tla Samaria, ya fetša nywaga e meraro e rakeletše motse woo. ₆Ka ngwaga wa senyane wa pušo ya Hosea, kgoši ya Asiria ya thopa Samaria, ya iša Baisiraele bothopša kwa nageng ya Asiria, ya ba agiša kwa Hala le Habora nokeng ya kwa Gosana, le mo metseng ya Bameda.

₇Tšona tšeo di tlile ka gobane Baisiraele ba rumotše Morena Modimo wa bona, Yena a ba ntšhitšego Egipita seatleng sa Farao kgoši ya Egipita; mme bona ba hlankela medimo e šele, ₈ba latela mekgwa ya ditšhaba tše Modimo a di rakilego mola ba fihla ba latela mekgwa e beilwego ke dikgoši tša Isiraele. ₉Ba dira bomenetša, ba dira tše di ronago Morena Modimo wa bona, ba itirela meboto metseng ka moka ye ba e agilego go tloga ka meraka go iša dibong. ₁₀Ba itsemela diswantšho le dikokwane mo dithabaneng ka moka le mo dihlareng ka moka tše tala. ₁₁Mebotong ka moka ba iša diorelo, ba etša ditšhaba tše Morena a di rakilego ge ba fihla, ba dira dilo tše mpe tša go tsoša kgalefo ya Morena. ₁₂Ba hlankela medimo ya makgapha ye Morena a e boletšego a re: Le se ke la dira dilo tše bjalo!

₁₃Morena o be a fela a kgothatša Baisiraele ka baporofeta bohle le ka baboni bohle, a re: Lahlang ditsela tše mpe tša lena, le hlokomele ditaelo tšaka, le mekgwa yaka, le melao yaka ka moka, ye ke e filego botata weno, ye ke le rometšego yona ka bahlanka baka baporofeta. ₁₄Bona ba gana go kwa, ba tšhalalatša melala ba etša botatabo, ba ba sa kago ba bota Morena Modimo wa bona. ₁₅Ba nyaditše melao ya gagwe, le kgwerano ya gagwe ye a e dirilego le botatabo, le mabohlatse a gagwe a a ba eleditšego ka ona, ba latela mafela, ba itira mafela; ba latela ditšhaba tše di bego di le kgaufsi le bona, tše Morena a di boletšego a re: Le se ke la etša bona! ₁₆Ba tlogetše diataelo tša Morena Modimo wa bona, ba itirela mamane a mabedi a tšholotšwego, ba dira dikokwane, ba khunamela makoko a legodimo, ba hlankela Baali. ₁₇Barwa ba bona le barwedi ba bona ba ba išitše mollong, ba dira bonoge le boloi, ba itahla ba dira tše di befelago Morena, ba mo rumola. ₁₈Ke mo Morena a tuketšego Isiraele bogale gagolo, a ba raka pele ga gagwe, gwa se šale selo ge e se leloko la Juda le nnoši.

₁₉Bajuda le bona ga ba ka ba hlokomela melao ya Morena Modimo wa bona; ba latetše mekgwa e bego e dirwa ke Baisiraele. ₂₀Morena a ba a lahla ba mohuta wa Baisiraele ka moka, a ba kokobetša, a ba gafela diatleng tša bahlakodi, a fetša ka go ba leleka ba tloga pele ga gagwe.

₂₁Ka gobane mola a kgaogantše Isiraele le leloko la Dafida, mme ba beile Jerobeama morwa wa Nebata a ba kgoši ya bona, yena Jerobeama a ba fulaša ba lahla Morena, a ba ruta go dira sebe se segolo. ₂₂Baisiraele ba tšea ka tsela ya dibe tšohle tša Jerobeama, ba se ke ba tlogela tše a di dirilego. ₂₃Tša fela ka ge Morena a ba leleka pele ga gagwe, a dira se a se boletšego ka baporofeta ka moka batseta ba gagwe; mme Baisiraele ba khudušwa ba išwa bothopša kwa Asiria, le nankhono go sa le bjalo.

₂₄Kgoši ya Asiria o tlišitše batho ba Babele, le ba Khutha, le ba Afa, le ba Sefarafaima, a ba agiša metseng ya Samaria, madulong a Baisiraele; ba tla ba dula metseng ya Samaria ya ba ya bona. ₂₅Ya re ba sa thoma go dula ntshe ba sa boife Morena, Morena a roma ditau tša tla tša bolaya batho. ₂₆Ba iša lentšu go kgoši ya Asiria ba re: Batho ba o ba tlišitšego metseng ya Samaria ga ba tsebe mekgwa ya Modimo wa naga ye; bjale o romile ditau tša tla go bona; gomme šidi, di a ba bolaya; ke ka gobane ba sa tsebe mekgwa ya Modimo wa naga yeno. ₂₇Kgoši ya Asiria ya laela ya re: Išang moperisita e mongwe ntshe: e be e mongwe wa ba ba thopilwego gona; a ye a dule gona kua, a ba rute mokgwa wa Modimo wa naga yeo. ₂₈Gwa boa moperisita e mongwe wa ba ba thopilwego Samaria, a tla a dula Bethele, a ba ruta go boifa Morena.

₂₉Fela, ditšhaba tšeo di be di itirela medimo ya tšona, tša e bea nywakong le mebotong yela e bego e dirilwe ke Basamaria; sethšaba se sengwe le se sengwe sa dira ka mokgwa woo metseng ye se dulago go yona.

₃₀Batho ba ba tšwilego Babele ba dira seswantšho sa Sukhothe-Benothe; ba Khutha ba dira sa Neregala; ba Hamathi ba dira sa Asima; ₃₁ba Afa ba dira sa Nibekasi le sa Tharathake; ba Sefarafaima ba fiša bana ba bona ka mollo e le go direla Adirameleke le Anameleke medimo ya Sefarafaima. ₃₂Le Morena ba be ba mmoifa; ba ipeela baperisita ba meboto, ba ba hlaola go batho fela, ya ba ba go ba išetša didimo mo nywakong ya mebotong. ₃₃Ya ba batho ba go boifa Morena, mola ba sa hlankela medimo ya bona ka mokgwa wa ditšhaba tša mo ba tšwilego ntshe.

₃₄Le nankhono ba sa dira ka mekgwa ya bona ya kgale; ga ba boife Morena, le gona ga ba dire ka mekgwa ya bona; le melao ya Morena ga ba e dire, le ditaelo tše Morena a di laetšego bana ba Jakobo yo a mo reetšego la Isiraele. ₃₅Bona bao Morena o be a dirile kgwerano le bona, a re: Le se ke la boifa medimo e šele; le se ke la e khunamela; le se ke la e hlankela; le se ke la e tlisetša didimo. ₃₆A re: Tša lena e be go boifa Morena e a le ntšhitšego Egipita ka matla a magolo, a emišitše letsogo; Yena le mo khunamele, le mo tlišetše didimo. ₃₇A re: Le hlokomele tsela ya gagwe, le mekgwa ya gagwe, le melao ya gagwe, le ditaelo tše a le ngwaletšego tšona, gore le dire ka tšona ka mehla; gomme le se ke la boifa medimo e šele. ₃₈A re: Le se ke la lebala kgwerano ye ke e dirilego le lena; mme le se boife medimo e šele. ₃₉A re: Le boife Morena Modimo wa lena; ke yena a tlogo le namolela diatleng tša manaba a lena ka moka. ₄₀O itšalo; mme bona ba gana; gomme tše ba bego ba di dira e be e le mekgwa ya bona ya kgale.

₄₁Bjale le ditšhaba tše tša lesa go boifa Morena, tša hlankela medimo ya tšona e betlilwego. Le bana ba bona, le bana ba bana ba bona, ba dira tše di dirilwego ke botatabo le nankhono.