2 BAKORINTHE 3

₁A re ka boela re thoma go ipolela? Goba re sa etša ba bangwe ra hloka lengwalo la bohlatse ge re lebana le lena, le ge e le lengwalo le le tšwago go lena? ₂Lengwalo la rena ke bolena; le ngwadilwe dipelong tša rena, le ka tsebja ke bohle la balwa ke batho bohle. ₃Le bonala le le lengwalo la Kriste ka modiro wa rena; ga la ngwalwa ka pilwana, le ngwadilwe ka Moya wa Modimo e a phelago. Ga la ngwalwa diphaphathing tša mabje, le ngwadilwe diphaphathing tša nama, tša dipelo.

₄Kholofelo ya go holofela Modimo re e hweditše ka Kriste. ₅E sego gore re ka kgona go nagana selo se se kago tšwa go rena; go kgona ga rena go tšwa go Modimo. ₆Ke yena a re kgonišitšego go ba batseta ba Kgwerano e mpsha, e sego ba tlhaka ya lengwalo, e lego ba Moya. Gobane tlhaka ya lengwalo e a bolaya, se se phedišago ke Moya.

₇Gomme ge botseta bja lehu, bja tlhakeng e tloketšwego matlapeng, bo tšweletše ka letago, Baisiraele ba ba ba šitwa go bogela sefahlogo sa Moše ka letago la sefahlogo sa gagwe, e bego e le la go tlo fela. ₈Botseta bja Moya a bo ka se be le letago le le phalago lela? ₉Ge botseta bja kahlolo bo na le letago, botseta bja toko a bo ka se be le letago le le phalago lela? ₁₀Gobane se se bego se na le letago ka mokgwa wola, se hlokišwa letago ka leno letago le le phadišago. ₁₁Gobane ge sa go tlo fela se tšweletše ka letago, sa go tlo dula se le gona a se ka se be le letago le le phadišago?

₁₂Bjalo ge re na le kholofelo e bjalo, re dira re na le mafolofolo a magolo. ₁₃Ga re etše Moshe e a bego a apeša sefahlogo ka seširo gore Baisiraele ba se ke ba bogela pheletšo ya seo sa go tlo fela. ₁₄Mme megopolo ya bona ya thatafala. Le lehono seširo seo se dutše se sa apolwe ge go balwa tša Kgwerano e tala; gobane seširo seo go fedišwa ga sona go mo go Kriste. ₁₅Fela, le lehono ge go balwa mangwalo a Moshe, seširo seo se dutše se apešitše dipelo tša bona. ₁₆Seširo seo se tlošwa ge ba sokologela go Morena. ₁₇Morena ke yena Moya; gomme mo go lego Moya wa Morena, ke mo go lego khunologo. ₁₈Gomme rena ka moka ba re bogelago letago la Morena ra le bona bjalo ka seiponeng mahlo a tlošitšwe seširo, re bopša lefsa ke yena mong wa Moya, ra tla ra swana la yena re fela re tšwelela pele go tagafaleng.