Salomo o kwana le Hirama
1Salomo ge a re ke agela leina la Morena Ngwako, le gona ge a re ke aga ngwako wa mošate, 2a hlaola banna ba dikete tše masome a šupago ya ba ba go rwala dikago, le ba dikete tše masome a seswai ya ba ba go betla maswika dithabeng, le bahlapetši ba bona ba dikete tše tharo le makgolo a selelago.
3Salomo a iša lentšu go kgoši Hirama ya Riro, a re: A ko ntirele tše o kilego wa di direla tate ge o mo romela dikwata tša morokwana a ikagela Ngwako. 4O ko tsebe ge ke nyako agela leina la Morena Modimo waka Ngwako wo o tlogo kgethelwa yena, mo go tlogo thuntšhwa diorelo tša go mo natefela, gwa išwa dibego tša ka mehla tša ka moswana le tša ka mantšiboa, ka disabatha le ka dikgwedi tše mpsha le ka menyanya ya Morena Modimo wa rena, ka mo e lego tlwaelo go Isiraele ka mehla. 5Ngwako wo ke tlogo o agela Modimo wa rena e tlo ba o mogolo, gobane Modimo wa rena ke o mogolo o fetiša medimo yohle. 6Ke mang e a kgonago go mo agela Ngwako, etšwe magodimo le magodimo a godimodimo a sa mo lekane! Mme ke nna mang ge ke re ke mo agela Ngwako! E tlo ba Ngwako wa go mo thuntšhetša diorelo fela. 7Bjale a ko nthomele monna e a hlalefetšego go dira ka digauta le ka disilifera le ka mphiri, e a tsebago go loga purapura ka mebala e mehubedu le ya moretele le e metala; a be e a tsebago go seta diswantšho, a dirišana le bakgoni ba ke nago nabo mono Juda le Jerusalema, ba ba beilwego ke Dafida tate. 8Nthomele le dikwata tša morokwana le tša mogobogobo le tša morekure, tša dithabeng tša Libanoni. Ke tseba ge bahlanka ba gago ba kgona go rema dihlare tša Libanoni; gomme baka bahlanka ba ka thušana le ba gago, 9gore ba ntokišetše dikwata tše ntši; gobane Ngwako wo ke tlogo o aga e tlo ba o mogolo wa matete. 10Ge e le nna, bahlanka ba gago ba go rema dihlare ke tlo ba ntšhetša dikgetsi tše dikete tše masome a mabedi tša mabele, le dikgetsi tše dikete tše masome a mabedi tša leotša, gore e be dijo tša bona, le meeta e dikete tše masome a mabedi ya beine, le meeta e dikete tše masome a mabedi ya makhura.
11Hirama kgoši ya Tiro a fetola ka lengwalo a le romela Salomo, a re: Morena ge a go beile kgoši, o dirile ka gobane a rata setšhaba sa gagwe. 12Hirama a buša a re: Morena Modimo wa Isiraele, e a dirilego legodimo le lefase, a a retwe gobane o neetše kgoši Dafida morwa e bohlale, wa tlhaologanyo le temogo, yo a rego ke agela Morena Ngwako, a re ke ikagela ngwako wa mošate. 13Bjale ke go romela Huramabai monna yo bohlale le tlhaologanyo. 14Ke ngwana wa mosadi wa gaDani; tatagwe ke monna wa kua Tiro; monna e o tseba go dira ka gauta le ka silifera, le ka mphiri le ka tshipi, le ka maswika le ka dikwata, le ka purapura e khubedu le e tala, le ka leokodi la moretele le la mmala o mohubedu; o tseba go seta diswantšho tša mehutahuta, le go akanya mediro ye a laelwago go e dira; o tlo dirišana le bakgoni ba gago le bakgoni ba tatago mong wa ka. 15Bjale wena mongaka, romela bahlanka ba ka mabele le leotša le makhura le beine ka mo o boletšego ka gona. 16Ge e le rena re tlo rema dihlare dithabeng tša Libanoni ka mo go lekanego tše o di nyakago; re tlo e tlemaganya ya tlo tla go wena ka lewatle motseng wa Jafo; mme wena o tlo di rwala moo wa di iša Jerusalema.
17Salomo a bala banna ka moka ba mathoko ba ba bego ba agile nageng ya Isiraele, a ya ka palo ya Dafida tatagwe, ye a kilego a bala ka yona; gwa hwetšwa ba dikete tše lekgolo la masome a mahlano a metšo e meraro le makgolo a selelago. 18Go bona a ntšha ba dikete tše masome a šupago, ya ba barwadi ba dikago; ba dikete tše masome a seswai ya ba babetli ba maswika dithabeng; ba dikete tše tharo le makgolo a selelago ya ba bahlapetši ba go diriša ba bangwe.
