Abia o fenya Jerobeama
1Abia o thomile go buša Juda ka ngwaga wa lesome la metšo e seswai wa pušo ya Jerobeama. 2O feditše nywaga e meraro e le kgoši motseng wa Jerusalema. Leina la mmagwe e be e le Mikaya morwedi wa Uriele wa Gibea.
Abia o be a elwa le Jerobeama; 3a tšwa dira a na le bahlabani ba dikete tše makgolo a mane, banna ba masogana. Jerobeama a gahlana nae a na le ba dikete tše makgolo a seswai, banna ba masogana ba ba tiilego.
4Abia a ema godimo ga thaba ya Tsemaraima ya dithabeng tša Efuraimi, a goelela a re: Wena Jerobeama le lena Baisiraele ka moka, le nkweng! 5A ga le tsebe gobane Morena Modimo wa Isiraele o neetše Dafida bogoši bja Isiraele, gore e be bja gagwe le bja bana ba gagwe ka go sa felego, ya ba kgwerano ya letswai? 6Gomme Jerobeama morwa wa Nebata mohlanka wa Salomo morwa wa Dafida, a tsoga a hlanogela mong wa gagwe. 7Banna ba e sego ba selo, ba dihlola, ba phuthegela go yena, ba itiiša ba tsogela Rehabeama morwa wa Salomo. Gomme Rehabeama yena e be e sa le lesogana la pelo e tshesanyane, a hloka maatla ge a lebana nabo. 8Bjale lena le re le ka kgona go fenya mmušo wa Morena o lego diatleng tša bana ba Dafida, ka gobane le le bontši bjo bogolo, le na le mamane ao a gauta a le a diretšwego ke Jerobeama ya ba medimo ya lena. 9A ga se lena ba le rakilego baperisita ba Morena barwa ba Arone le Balefi, la ipeela baperisita bjalo ka ditšhaba tša dinaga tše dingwe? E a tlago a na le powana namane ya kgomo le diphoko tše di šupago, o dirwa moperisita wa dilo tšeo tše e sego Modimo.
10Ge e le rena, Modimo wa rena ke Morena, ga ra ka ra mo tlogela; baperisita ba ba direlago Morena ke barwa ba Arone; o hlankelwa ke Balefi. 11Ba tšhumela Morena dihlabelo ka mehla e sa le ka moswana le ka mantšiboa, le diorelo tša monko o mobose, ba bea dinkgwaponwa mo dithalaneng tše di se nago tšhila, ba gotetša mabone mo go sehlomapone sa gauta ka mehla e le mantšiboa; gobane rena re ba ba hlokomelago mekgwa e swanetšego ya Morena; ge e le lena le mo tlogetše. 12Le tsebe gore rena re etwa pele ke Morena, le baperisita ba gagwe ba go letša diphalafala tša megobo, tša go hlaba mokgoši ge re lwa le lena. Lena Baisiraele, lesang go lwa le Morena Modimo wa botata weno. Le ka se ke la kgona.
13Ke ge Jerobeama a laetše ba dikhung gore ba dike ka nthago; ya re mola ba lebane le Bajuda, ba dikhu ba ba ba dikile ka nthago. 14Bajuda ge ba retologa, ba bona ntwa e ba tlela ka pele le ka morago; ba hlabela Morena mokgoši, mme baperisita ba letša diphalafala. 15Banna ba Juda ba hlaba mokgoši; mme ya re ge ba tšhela legoa, Modimo a otla Jerobeama le Baisiraele ka moka, ge go fihla Abia le Bajuda. 16Baisiraele ba tšhaba, mme Morena a ba gafela diatleng tša Bajuda. 17Abia le batho ba gagwe ba ba bolaya o šoro; Baisiraele ba ba bolailwego ya ba ba dikete tše makgolo a mahlano, banna ba masogana. 18Ya ba gona go notlega ga Baisiraele; Bajuda bona ba ba le maatla gobane ba be ba botile Morena Modimo wa botatabo.
19Abia a hlomarela Jerobeama a mo amoga motse wa Bethele le metsana ya gona, le motse wa Jesana le metsana ya gona, le motse wa Efurone le metsana ya gona. 20Jerobeama yena o hlokile maatla mehleng ya Abia; o be a otlilwe ke Morena, a ba a hwa.
21Abia yena a tia maatla; a tšea basadi ba lesome le metšo e mene, a tswala barwa ba masome a mabedi a metšo e mebedi le barwedi ba lesome le metšo e selelago. 22Ge e le ditaba tše dingwe tša Abia, tša ditsela tša gagwe le mantšu a gagwe, di ngwadilwe mo pukung ya Ido moporofeta.
