1 BATHESALONIKA 5

₁Ge e le tša mabaka ao le tša nako ya gona, bana bešo, ga e sa le tše le swanetšego go ngwalelwa tšona. ₂Gobane lena beng le tseba gabotse gore letšatši leo la Morena le tlo tla boka lehodu ge le tla bošego. ₃Ge go tlo thwe: Go khutšo! Go iketlilwe, ke mo ba tlogo welwa godimo ke tshenyego bjalo ka moima ge a welwa ke lešoko; mme ba ka se ke ba phonyokga. ₄Ge e le lena Bana bešo, ga le leswiswing, mo letšatši leo le kago le wela wa lehodu. ₅Ka moka ga lena le bana ba seetša, le bana ba mosegare; ga re ba bošego, ga re ba leswiswi. ₆Bjale gomme, a re se keng ra robala boka ba bangwe bao. A re phakgameng re fahlogile. ₇Gobane ba ba robalago ba robala bošego; ba ba tagwago ba tagwa bošego. ₈Rena ba re lego ba mosegare, a re phafogeng, re apare sephemasefega sa tumelo le lerato, kuane e be go holofela phološo. ₉Gobane se Modimo a re beetšego sona ga se go tlo galefelwa; o re beetše go fihlela phološo ka Mong wa rena Jesu Kriste. ₁₀Ke yena a hwilego ka baka la rena, gore -- ge re phakgame le ge re robetše -- re phele re na le yena. ₁₁Eletšanang ge, e mongwe a agiše e mongwe ka mokgwa wo le felago le dira ka wona.

₁₂Bana bešo re a le kgopela, tsebang bao ba ba le swaretšego modiro; ba e lego bagolo ba lena Moreneng ba go le eletša. ₁₃Le ba godiše sa ruri ka lerato, ka baka la modiro woo wa bona. Bang ba leago.

₁₄Bana bešo, re a le eletša: Solang ba ba sa thakgego; le tsoše ba dipelo tše di tapilego; le thekgetše bafokodi; le se ke la felela motho pelo. ₁₅Le bone gore go se ke gwa ba le e a lefetšago bobe ka bobe; ka mehla le otlelele go dirana gabotse le go dira bohle gabotse.

₁₆Thabang ka mehla. ₁₇Le se kgaotše go rapela. ₁₈Mo go tšohle le leboge; ke sona se Modimo a se ratago, gore go be bjalo mo go lena ka Kriste Jesu.

₁₉Le se ke la tima mollo wa Moya. ₂₀Le se ke la nyatša diporofeto. ₂₁Lekang tšohle, le šale le swere tše bolo. ₂₂Ilang bobe bofe le bofe.

₂₃Gomme yena Modimo Rakhutšo a le dire bakgethwa ba ruri; gore meoya ya lena, le dipelo tša lena, le mebele ya lena, ka moka di lotege moka, gore Mong wa rena Jesu Kriste ge a etla, a di hwetše di se ne bosodi. ₂₄E a le bitšago ke Mmotegi; go tlo dira yena.

₂₅Bana bešo! Le re rapeleleng.

₂₆Dumedišang bana ba borena ka moka ka katlokgethwa.

₂₇Ke le tlema ka la go re: Lengwalo le le balelwe bana ba borena bohle. Ke realo ka Morena.

₂₈Kgaugelo ya Mong wa rena Jesu Kriste a e be le lena ka moka. Amene.