1 SAMUELE 6

₁Polokelo ya Morena ya dula nageng ya Bafilisita, gwa ba gwa fela dikgwedi tše di šupago. ₂Bafilisita ba bitša bomphamodimo le dingaka, ba re: Re tlo dira bjang ka polokelo ya Morena Modimo wa Isiraele? Re botšeng mokgwa wa go bušetša kua ga gayo.

₃Banna bao ba re: Ge le rata go gomiša polokelo ye ya Modimo wa Isiraele, le se ke la e romela e le fela. Le e gomiše ka seloba; gona le tlo fola, la tlo tseba gore seatla sa gagwe se be se reng se sa le lese.

₄Ba re: E ka ba seloba mang seo re kago loba ka sona?

Bala ba re: Yang ka palo ya dikgošana tša Bafilisita, le bope diswantšho tše tlhano tša dišo, le tše tlhano tša magotlo; ka gobane kotlo e wetšego lena le dikgošana tša lena ke ya mohuta o tee. ₅Dirang diswantšho gee tša dišo tša lena le tša magotlo a sentšego naga ye, le lobe Modimo wa Isiraele ka tšona. Mohlomong a ka gomiša seatla sa gagwe mo go lena le go modimo wa lena le go naga ya lena. ₆Le reng le thatafatša dipelo tša lena la etša Baegipita le Farao, mola ba thatafatša dipelo tša bona? A ga a ka a ba swara ka maatla, ba ba ba lesa Baisiraele ba sepela! ₇Bjale napang le dire koloi e mpsha, le tšee kgomotswetši tše pedi tše di sešogo tša rwešwa joko, le di tleme koloing; ga e le mamane a tšona le a šadiše gae. ₈Le tšee polokelo ya Morena, le e bee koloing yeo; le dilwana tšeo tša gauta, tše le lobago ka tšona, le di tsenye mo polokelwaneng ya tšona; le di lese di ikele. ₉Gomme le lebelele: Ge e ka tšea tsela ya go ya ga gayo, ya rotogela Bethe-Semese, gona e tlo ba e le yena e a re dirilego bošula bjo bokaakaa. Ge e sa boele gona kua, gona re tlo tseba gobane ga se seatla sa gagwe se se re otlilego, di filo re tlela fela.

₁₀Gomme batho ba dira ka mokgwa woo, ba tšea kgomotswetši tše pedi, ba di tlema koloing, ba tswallela mamane a tšona ka šakeng. ₁₁Polokelo ya Morena ba e bea koloing, le polokelwana e swerego diswantšho tša magotlo le tša dišo tša bona, tše ba di dirilego ka gauta. ₁₂Bjale dikgomo tšeo tša swara tsela ye e yago Bethe-Semese; tša tloga ka mmila di tšama di lla, tša se ke tša fapogela thoko. Gomme dikgošana tša Bafilisita tša e felegetša go fihla mollwaneng wa Bethe-Semese.

₁₃Ba Bethe-Semese ba be ba buna mabele moeding. Ge ba gadia ba bona polokelo; gomme ba thaba ge ba e bona. ₁₄Koloi ya tla tšhemong ya Jošua wa Bethe-Semese, ya ema ntshe. Gona fao go be go na le lwala le legolo. Gomme ba phapha diphata tša koloi, ba hlaba dikgomo tšeo, ba direla Morena sehlabelo. ₁₅Balefi ba rwala polokelo ya Morena, le polokelwana e swerego dilwana tšela tša gauta, ba di bea lwaleng le legolo leo. Gomme batho ba Bethe-Semese ba tlišetša Morena dihlabelo, ba tliša didimo ka lona tšatši leo. ₁₆Dikgošana tše tlhano tša Bafilisita tša di bona tša tsebo boela Ekironi ka lona tšatši leo.

₁₇Ge e le dilwana tšela tša gauta tše di bego di swantšha dišo, tše Bafilisita ba lobilego Morena ka tšona, se sengwe e be e le sa Asidodo, se sengwe e le sa Gasa, se sengwe e le sa Asikaloni, se sengwe e le sa Gathe, se sengwe e le sa Ekironi. ₁₈Le diswantšho tšela tša magotlo, tše di dirilwego ka gauta, di be di eya ka palo ya metse ya Bafilisita e bego e bušwa ke dikgošana tše tlhano; e mengwe e be e le metse ya dibo, e mengwe e le metsana ya naga. Lwala le legolo, le go kilego gwa bewa polokelo ya Morena go lona kua tšhemong ya Jošua wa Bethe-Semese, le bjale e sa le hlatse ya taba ye.

₁₉Batho ba bangwe ba Bethe-Semese ba bolailwe ka gobane ba hlola tše di lego polokelong ya Morena; a bolaya banna ba masome a šupago go ba dikete tše masome a mahlano. Batho ba lla ka baka la ge Morena a ba bolaile gakaakaa.

₂₀Batho ba Bethe-Semese ba re: Go ka kgona mang go ema pele ga Morena Modimo yo e mokgethwa? A ka tloga mo a yo gorogela kae? ₂₁Ba roma batseta ba yo botša ba Kiryathe-Jearima ba re: Bafilisita ba bušitše polokelo ya Morena. Theogang, le e rotošetšo go lena.