Sereto sa Hanna. Barwa ba Eli, Samuele a sa le lesogana
1Gomme Hanna a rapela a re:
Pelo ya ka e tlotla Morena;
naka la ka le eme ka yena Morena;
molomo wa ka o ahlametše naba la ka,
ka ge ke thaba o nnamotše.
2Ga go na moetša-Morena ka go ba mokgethwa,
mo ka yena o a hlokwa;
ga go na lentswe leka-Modimo wa rena.
3Lesang go bolabola le itheta;
la borumolane le se tšwe ganong;
gobane Morena ke Modimo wa maitse,
Moelatirotšohle.
4Bora bja ba maatla bo robilwe,
mme bonatla bja aparwa ke bahlotši.
5Ba bego ba khora, ba sela ba thwalwa;
ba bego ba lapa ka tlala, ba a lapologa.
Moopa o belega ba šupago,
gwa nyama mma go bana ba bantši.
6Go hwa le go phela di tšwa go Morena;
go kodumetša kua bahung, le go phagamiša motho, di na nae.
7Morena o a diitše, a be a humiše,
o a kokobetše, a be a godiše.
8O tsoša babotlana leroleng;
bahumanegi o ba tloša mo sethobolong,
a ba dudiše le marena,
o ba fa madulo a kgodišo;
gobane metheo ya lefase le e mo atleng tša gagwe.
Lefase le o le thekgile ka metheo yeo.
9O diša nao tša baratiwa ba gagwe;
babe bona ba tlo loba mo swiswing.
Gobane maatla a motho ga a kgone selo.
10Ba go ngangana le Morena ba tlo pšhatlwa;
o tlo ba dumišetša maru a le kua godimo.
Magomo a lefase a tlo bušwa ke Morena.
Kgoši e lego motho wa gagwe o tlo e nea maatla;
motlotšwa wa gagwe lenaka la gagwe le ema ka yena.
11Ya ba gona Elikana a boetšego ga gabo kua Rama; mošimanyana a šala a hlankela Morena a lebeletšwe ke Eli moperisita.
12Ge e le barwa ba Eli, bona e be e le batho ba dihlola, ba sa re selo ka Morena; 13ba sa re selo ka ditshwanelo tša baperisita le tša batho. Ge motho a tlišitše sedimo, ge dinama di apewa, go be go etla mohlanka wa moperisita a swere tlhaba ya ntlha tše tharo; 14a hlabe pitšeng, le ge e le moruswing, le ge e le legopong, le ge e le lebeaneng; gomme se se boago le tlhaba, sa tšewa ke moperisita. Ba dira ka mokgwa woo go Baisiraele ka moka ba ba bego ba etla Silo. 15Mohlanka eo, le ge go sešo gwa tšhungwa sebego sa makhura, o be a etla go motliši wa sedimo a re: Tšiša nama, e bešetšwe moperisita, ka gobane ga a rate ge o mo nea ye e apeilwego; o nyaka e tala.
16Ge motho eo a re: Lesa go tšhungwe pele makhura a sebego, o tsebo tšea se pelo ya gago e se dumago, mohlanka a re: Aowa, tšiša e sa le bjale, ke se tlo e tšea ka maatla.
17Ka mokgwa wo sebe sa masogana a mabedi ao ya ba se segolo ka kudu pele ga Morena, ka gobane batho ba be ba nyatša dibego tša Morena.
18Ge e le Samuele, yena o be a hlankela Morena e le lesogana, a apere kobo ya leokodi. 19Mmagwe o be a mo direla kobjana ka ngwaga o mongwe le o mongwe, a mo tlele nayo ge a rotogela go tliša sedimo sa ngwaga a na le monna wa gagwe. 20Eli ge a laelana le Elikana le mosadi wa gagwe, a fela a re: A Morena a go fe bana ka mosadi e bakeng sa ngwana eo a bego a mo kgopetše go Morena, mme a buša a mo gafela Morena.
Ba kgona ba boela gae.
21Gomme Morena a boela a thabiša Hanna, a ithwala a belega, bana ba gagwe ya ba ba bararo ba bašimanyana, le ba babedi ba basetsana. Mošimanyana yola, Samuele, a gola a le moo pele ga Morena.
22Ge e le Eli, o be a tšofetše gagolo; a kwa tšohle tše barwa ba gagwe ba bego ba di dira mo go Baisiraele bohle, le ka mo ba bego ba senya le basadi ba go swara mediro mojako wa Ngwako wa kgwerano. 23A bolela le bona a re: Le reng le dira dilo tše? Nna ke kwa le bolelwa ka ditaba tše mpe mo setšhabeng ka moka. 24Aowa, bana! Tše ke di kwago ga se tše botse. Le aroša setšhaba sa Morena. 25Ge motho a ka senyetša motho, gona ditaba di ahlolwa ke baahlodi. Ge motho a senyetša Morena, gona o sa tlo rapelelwa ke mang?
Bona ba gana go kwa dikeletšo tša tatabo; gobane Morena o be a šetše a rata go ba bolaya.
26Fela Samuele, lesogana lela a fela a gola a eya a ratwa ke Modimo, a ratwa ke batho.
27Gwa tla monna e mongwe wa Modimo go Eli, a mmotša a re: A ga ke re ke iponaditše go ba leloko la botatago mola ba sa le kua Egipita ngwakong wa Farao. 28Ka na ka kgetha bona go meloko ka moka ya Isiraele; ka ba dira baperisita ba ka ba go iša dihlabelo aletareng ya ka, le ba go tšhuma diorelo, gore ba apare kobokgethwa pele ga ka. Gomme ba leloko la tatago ke ba nile dibego ka moka tša mello tše di tšwago go Baisiraele. 29Gomme le reng le gataka didimo tša ka le dibego tša ka, tše ke laetšego gore e be tša Ntlokgethwa? Wena o reng o godiša bana ba gago wa go nyatša nna, la be la nona ka go hlaola tše botse mo go dibego tša setšhaba sa ka sa Isiraele? 30Morena Modimo wa Isiraele o ra tšona tše ge a re: Ke be ke re ba leloko la gago le la tatago, e tlo ba bona ba go ntlhankela ka mehla le mehla. Fela, bjalo Morena o re: Di kgole le nna tšeo. Ke godiša ba ba nkgodišago; ba ba nnyatšago ba tlo nyadiwa. 31O tsebe gore go tla matšatši ao ke tlogo kgaola letsogo la gago le la leloko la tatago, wa go tlogo hlokwa mokgalabje wa ga bolena. 32O tlo bona tlalelo ya mo Ntlong e kgethwa, mola Baisiraele ba thakgiwa; gomme mo ga geno go ka se ke gwa ba le motšofadi le neng le neng. 33Le ge ke sa tlo fediša bohle mo aletareng ya ka, mahlo a gago a tlo ledišwa, o tlo ja pelo, ge bontši bja ba leloko leno ba ehwa e sa le banna. 34Seka se o tlogo se bona, ke ge o tlo bona tše di welago barwa ba babedi ba gago, Hofini le Pinease, ge bobedi bja bona ba ehwa ka tšatši letee. 35Gomme nna ke tlo ipeela moperisita e a botegago, e a tlogo dira tše ke di ratago ka pelo ya ka le ka moya wa ka. Yena ke tlo mo agela ngwako o tiilego; ke yena e a tlogo sepela le motlotšwa wa ka ka mehla. 36Wa lešaledi la leloko leno, o tlo tla a mo lotšha, a kgopela tšheletenyana le ge e le sephatlo sa bogobe, a re: Ako ntšenye mo modirong wa boperisita, gore ke ngwathe ke je bogobe.
