1 SAMUELE 17

₁Gomme Bafilisita ba rapa dira tša bona tša go hlabana, ba bokana Soko nageng ya Juda mo gare ga Soko le Aseka kua Efese-Damina. ₂Le Saulo a tšwa dira a na le banna ba Isiraele, ba bokana moeding wa merula; ba itlhama gore ba hlabane le Bafilisita. ₃Bafilisita ba be ba eme thabeng ya mošola, Baisiraele ba eme thabeng ya mošono. Mo gare ga bona go be go le moedi.

₄Mo madireng a Bafilisita gwa tšwa monna wa seoka; leina la gagwe e be e le Goliata, monna wa Gathe. Botelele bja gagwe e be e le bja meelo e selelago e nago le bophara bja seatla. ₅O be a rwele kefa ya mphiri mo hlogong ya gagwe; a iphemela sehuba ka makgapetla a mphiri. Sephemo seo boima bja sona e be e le sekele tše dikete tše tlhano tša mphiri. ₆Ka meomong o be a rwele mekgoro ya mphiri, a patile molamo wa mphiri. ₇Theku ya lerumo la gagwe e be e lekana le mpheng wa mogoma; bogale bja lona e be e le tshipi ya sekele tše makgolo a selelago. Morwadi wa kotse ya gagwe o be a mo eta pele. ₈Monna e a ema, a goeletša a lebile mo go lego madira a Isiraele a re: Naa le tšwetšeng dira? Le itlhametšeng? A nna ga ke Mofilisita? A lena ga le balata ba Saulo? Hlaolang monna wa lena, a fologele fa go nna. ₉Ge a ka kgona go hlabana le nna a mpolaya, gona re tlo ba bahlanka ba lena. Ge nna nka mmolaya, gona lena le tlo ba balata ba rena la re hlankela. ₁₀Mofilisita eo a ba a re: Lehono ke sa nyaditše dira tša Isiraele. Ntšhang monna a hlabane le nna. ₁₁Saulo le Baisiraele ka moka ge ba ekwa tše di bolelwago ke Mofilisita eo, ba tšhoga ba boifa gagolo.

₁₂Ga e le Dafida yena e be e le morwa wa monna yola wa Efurata wa Betlehema-Juda, e ba bego ba re ke Isai, e a bego a na le barwa ba seswai, yena e le mokgalabje mo go banna ba mehla ya Saulo. ₁₃Barwa ba bararo ba Isai, ba bagolo ba bona, ba be ba tšwele dira le Saulo. Maina a bona, wa ntlha e be e le Eliaba, a hlatlangwa ke Abinadaba; wa boraro e be e le Sama. ₁₄Dafida e be e le yena e monyane wa bona ka moka. Mehleng yeo ya ge ba bararo bao ba tšwele le Saulo. ₁₅Dafida o be a fela a tloga, a boele go Saulo, a eya go hlola diruiwa tša tatagwe kua Betlehema.

₁₆Gomme Mofilisita yola o be a fela a rotoga e sa le bosasa, le ka mantšiboa, gwa ba gwa fela matšatši a masome a mane a fela a etla a ema moo.

₁₇Isai a botša Dafida morwa wa gagwe a re: Tloga le ntlatla ye ya bokoma le dinkgwa tše tše lesome, o akgofe o di iše go bana beno kua mešašaeng. ₁₈Dikgokolo tše tše lesome tša maswi a kgalilego, o tloge natšo, o di neele molaodi wa sekgao; o bone ge bana beno ba sa thabile, o boe le ditaeledi tša bona. ₁₉Gomme bona ba be ba na le Saulo, le banna ba Isiraele kua moeding wa merula, ba le ntweng le Bafilisita.

₂₀Dafida a tsoga e sa le bošego a laelela modiši wa dinku, a rwala mefago yela a ya mo a romilwego ke Isai, a tla mo mošašeng wa dikoloi a hwetša dira di lailwe di hlaba mokgoši. ₂₁Tša Isiraele di be di lailwe; tša Bafilisita le tšona tša laiwa; madira a ema a lebana a lailwe. ₂₂Dafida a rola morwalo wa gagwe, a o laelela moletaphahlo; yena a akgofa a ya direng, a tla go bana babo a ba botšiša maphelo. ₂₃A re a sa bolela le bona, gwa na gwa rotoga mogale ela Goliata, Mofilisita wa Gathe, a tšwa mo madireng a Bafilisita, a bolela ka mokgwa wola wa gagwe; gomme Dafida a mo kwa. ₂₄Banna ba Isiraele ka moka ge ba bona monna eo, ba mo tšhaba ba mmoifa gagolo. ₂₅Monna e mongwe wa Isiraele a tla a re: A le mmone, monna e a tlago fala? O tla go roga Baisiraele. Bjale e a kago mmolaya, kgoši o tlo mo humiša ka kudu, a mo tšeiša morwedi wa gagwe; gomme ba gabo monna eo o tlo ba dira bahunologi mo go Isiraele.

₂₆Dafida a botšiša banna ba ba bego ba eme fao, a re: Monna e a kago bolaya Mofilisita eo, e tloša dihlong go Isiraele, le re o tlo fiwang? Mofilisita eo, lešoboro leo ke mang ge a bile a roga dira tša Modimo yo a phelago? ₂₇Batho bao ba mmotša se se boletšwego, ba re: Monna e a kago mmolaya o tlo dirwa ka go re le ka go re.

₂₈Bjale Eliaba mogolwagwe ge a ekwa Dafida a bolela le banna bao, a mo tukela bogale a re: O tletšeng mono? Dinku tšela tše di sego dikae kua nageng o di laeletše mang? Mahlahlo a gago le lonya la pelo ya gago ke a di tseba. O filo tlela go bona tlhabano.

₂₉Dafida a re: Ke dirileng bjale? A ga se taba e kago botšišwa? ₃₀A realo a mo tlogela, a yo boledišana le e mongwe ka taba tšeo; mme batho ba mmotša tše a bego a di kwele.

₃₁Ya re ge go kwala mantšu a Dafida a a boletšego, le Saulo a di kwa, mme a mmitša. ₃₂Dafida a bolela le Saulo a re: Go se ke gwa ba le e a nolegago moko ka baka la monna eo; nna mohlanka wa gago ke tlo hlabana le Mofilisita eo.

₃₃Saulo a fetola a re: O ka se kgone go gahlana le Mofilisita eo, wa lwa nae; ka gobane wena o sa le lesoganyana, gomme yena ke monna wa mohlabani go tloga bofseng bja gagwe.

₃₄Dafida a re: Nna mohlanka wa gago, e be e re ge ke diša dinku tša tate, gwa fela go etla tau goba tauana, tša swara nku ya mohlape. ₃₅Nna ka fela ke latela sebata seo, ka namolela nku mo leganong la sona. Ge se be se re se a ntsogela, ka se swara ka mariri ka se bolaya. ₃₆Tau le tauana, nna mohlanka wa gago ke be ke di bolaya tšohle ka mokgwa woo. Bjale Mofilisita yo, lešoboro le, le tlo dirwa ka mokgwa woo le lona; gobane le gobošitše dira tša Modimo e a phelago. ₃₇Dafida a re: Morena e a mphemetšego maro a tau le a tauana, o tlo mphemela ge ke lwa le Mofilisita yo.

Ke mo Saulo a itšego: Gona sepela; Morena a eme le wena. ₃₈Bjale Saulo a re Dafida a itlhame ka ditlhamo tša gagwe; a mo rweša kefa ya mphiri, a mo apeša sephemo sa mmele. ₃₉Dafida a apara ditlhamo tšeo, a kgokela tšhoša legetleng, a leka go sepela, gobane o be a sešo a di leka. A tla a botša Saulo a re: Nka se kgone go sepela ke ilalo, ka gobane ga ke a di tlwaela mme a di rola. ₄₀Gomme Dafida a swara molamo wa gagwe ka seatla, a ya a itopela magakabje a mahlano nokeng, a a tsenya mo sekgwameng sa gagwe sa bodiši; a swara seragamabje ka seatla, a tšwela go Mofilisita eo.

₄₁Mofilisita a tla a batamela mo go bego go eme Dafida, a tla a etilwe pele ke morwadi wa kotse ya gagwe. ₄₂A gadia a bona Dafida, a mo nyatša ka ge e le lesogana, le lehubedu, la senatla. ₄₃Mofilisita a mo rera a re: A o re ke mpša ge o tla o swere diphata? A roga Dafida ka Modimo wa gagwe. ₄₄A rera Dafida a re: Batamela! Nama ya gago ke tlo e lahlela manong a legodimo le dibata tša naga.

₄₅Dafida a fetola a re: Wena Mofilisita, o tla fa ka tšhoša le ka lerumo, le ka kotse. Ge e le nna ke tlile fa ka leina la Morena wa Mašaba, Modimo wa dira tša Isiraele tše o bego o di roga. ₄₆Lehono Morena o tlo go gafela atleng sa ka, ka go bolaya ka go kgaola hlogo. Manong a legodimo le dibata tša naga ke tlo di lahlela toto tša dira tša Bafilisita, gore lefase ka moka le tsebe ge go Isiraele go na le Modimo. ₄₇Le lešaba le ka moka le tlo lemoga gobane Morena ga a thuše ka tšhoša le ka lerumo. Tlhabano ye ke ya Morena. O tlo le gafela diatleng tša rena.

₄₈Bjale Mofilisita ge a šetše a tsogile a batamela, Dafida a kganyela a lebile kua go lego dira tša Bafilisita, a gahlana le Mofilisita eo. ₄₉Ka seatla o be a swere legakabje la mo sekgwameng, a betša ka seragamabje, a thuma phatla ya Mofilisita. Legakabje la mo tsena phatleng, a wa a patlama. ₅₀Ke wona mokgwa wo Dafida a fentšego Mofilisita eo ka wona, ka seragamabje le ka legakabje; a mmolaya a sa swara tšhoša. ₅₁Bjale Dafida a kitimela, a mo gata ka maoto, a kgwamola tšhoša ya Mofilisita ye e bego e le ka segatleng, a mo fofotša a mo kgaola hlogo ka yona.

Bafilisita ge ba bona go bolailwe yena mogale wa bona, ba tšhaba. ₅₂Banna ba Isiraele le ba Juda ba hlahlamologa, ba hlaba mokgoši, ba kwatakwatiša Bafilisita ba ba fihliša magoleng le dikgorong tša Ekironi. Gomme ditoto tša Bafilisita tša rapalala tseleng e tšwago Seraima go fihla Gadi le Ekironi. ₅₃Baisiraele ge ba boa mo ba leleketšego Bafilisita ntshe, ba tla ba rebola mešaša ya bona. ₅₄Gomme Dafida a tloga a rwele hlogo ya Mofilisita ela, a e iša Jerusalema. Marumo a gagwe a a bea ngwakong wa gagwe.

₅₅Mola Saulo a bona ge Dafida a tšwela go gahlana le Mofilisita, ke mo a botšišitšego Abenere molaodi wa dira tša gagwe, a re: Lesogana leo ke morwa wa mang?

Abenere a re: Ka bophelo bja gago, kgoši, nna ga ke tsebe.

₅₆Kgoši ya re: Mpotšišetše ke tsebe gore monna eo ke morwa wa mang.

₅₇Ya re ge Dafida a boa moo, a bolaile Mofilisita ela, Abenere a tloga nae a mo iša go Saulo, a tla a swere hlogo ya Mofilisita ka seatla. ₅₈Saulo a mmotšiša a re: Wena lesogana! O morwa wa mang?

Dafida a re: Ke morwa wa Isai, molata wa gago wa Betlehema.