Dafida o hlaolelwa bogoši; o išwa go Saulo
1Morena a bolela le Samuele a re: O tlo kgaotša neng go llela Saulo? Nna ke mo lemogile gobane ga a swanela go ba kgoši ya Isiraele. Bjale tšhela makhura nakeng la gago, o sepele. Ke go roma go Isai wa Betlehema; ka gobane mo go barwa ba gagwe ke ikgethetše eo a tlogo ba kgoši.
2Samuele a re: Ke tlo sepela bjang? Ge Saulo a ka di kwa, o tlo mpolaya.
Morena a re: Gapa kgomo ya sethole, o fihle o re: ke tlile go hlabela Morena sedimo! 3Gomme o laeletše Isai a tle sedimong. Ke moo nna ke tlogo go botša se o tlogo se dira, wa ntloletša ye ke tlogo mmolela.
4Samuele a dira se Morena a mmoditšego sona, a tla Betlehema. Bagolo ba motse ba mo hlakanetša ba tšhogile ba re: A o tla ka khutšo?
5Yena a re: Ke khutšo. Ke tlile go tlišetša Morena sedimo. Ikgetheng le tle le nna sedimong. A kgetha Isai le barwa ba gagwe, a ba laletša a re ba tle sedimong.
6Ya re ge ba tsena, a bona Eliaba, a re, e a kago ba motlošwa wa Morena šo. 7Morena a sebela Samuele a re: O se bone sebopego sa gagwe le botelele bja gagwe; nna ke mo nyaditše. Ka gobane yo batho ba mmogelago, ga se yena. Motho o bona se se lebanago le mahlo a gagwe; Morena yena o bona pelo.
8Isai a bitša Abinadaba, a feta a bonwa ke Samuele. Samuele a re, le yena e ga se eo Morena a mo kgethilego. 9Isai a tliša Sama. Samuele a re, le yena e ga se eo Morena a mo kgethilego. 10Isai a tliša barwa ba gagwe ka moka ba ba šupago, ba feta ba bonwa ke Samuele. Samuele a re, yo Morena a mo kgethilego ga a mo go ba. 11Samuele a botšiša Isai a re: A barwa ba gago ba feletše?
Isai a re: Go šetše e monyane wa bona; yena o sa tšwele le dinku.
Samuele a re: Roma motho a yo mmitša; gobane re ka se dule ra ja a sešo a tla fa. 12Gwa rongwa motho a yo mmitša. Gomme e be e le e mohubedu, wa mahlo a mabotse, wa sebopego sa senatla. Morena a re: Tsoga, o mo tlotše, gobane ke yena eo. 13Samuele a swara lenaka la makhura a mo tlotša bana babo ba le gona. Mohla woo moya wa Modimo wa tlela Dafida wa dula mo go yena. Gomme Samuele a tsoga a boela Rama.
14Go Saulo moya wa Morena o be o tlogile, a hlwa a ferehlwa ke moya o mobe o tšwago go Morena. 15Bahlanka ba gagwe ba mo rera ba re: O a tseba; o ferehlwa ke moya o mobe o tšwago go Morena. 16Hle mong a rena! Roma bahlanka ba gago ba ba go hlankelago, ba yo nyaka monna e a tsebago go letša seletšo; e tle e re ge o tlelwa ke moya o mobe o tšwago go Morena, a letše seletšo ka seatla sa gagwe; ke mo o tlogo kaonega.
17Saulo a laela bahlanka ba gagwe a re: Ntebalebeleng monna wa go letša gamonate, le mo tlišeng fa.
18Gwa fetola e mongwe wa masogana a re: O gona; ke bone morwa wa Isai wa Betlehema. O tseba go letša seletšo; le gona ke seoka, e bile ke mogale tlhabanong, maitse a ditaba, monna wa senatla; gomme Morena o ema le yena.
19Ke mo Saulo a romilego lentšu go Isai a re: Nthomele Dafida morwa wa gago, e a dišago dinku. 20Isai a ntšha pokolo, le magobe, le lekuka la beine, le putšanyana, a di romela Saulo ka Dafida morwa wa gagwe. 21Dafida a tla go Saulo a ba mohlanka wa gagwe. Saulo a mo rata gagolo, a mo rwadiša marumo a gagwe. 22A iša lentšu go Isai a re: Ako lese Dafida e be mohlanka wa ka; ka gobane mahlo a ka a mo lebeletše ka botho. 23Bjalo ge moya wola wa Modimo o tlela Saulo, Dafida o be a tšea seletšo, a se letša ka seatla sa gagwe, ya ba gona Saulo a hunologago a kwa bose, a tlogelwa ke moya o mobe.
