1 SAMUELE 14

₁Ka tšatši le lengwe Jonathane a bolela le lesogana la go mo rwalela marumo, a re: Tlaa, re yo selela kua go lego bahlometši ba Bafilisita.

A lesa go botša tatagwe. ₂Saulo yena o be a le kua mollwaneng wa Gibea, a dutše sehlareng sa morapa se se lego kua Migirone, a na le batho ba makgolo a selelago. ₃Gomme kobo ya boperisita e be e aperwe ke Ahia morwa wa Ahitobo ngwana Boikabodi morwa wa Pinease morwa wa Eli moperisita wa Silo. Batho bona ba be ba sa tsebe ge Jonathane a tšwile.

₄Mo sefateng seo se Jonathane a bego a rata go selela go bahlometši ba Bafilisita ka sona, go be go na le mantswe a mabedi a dintlha, le lengwe le le ka mošono, le lengwe le le ka mošola. Le lengwe ba be ba re ke Botsetse, le lengwe ba re ke Sene. ₅Le lengwe le ukametše Mikimasa ka thoko ya leboa; le lengwe le ukametše Geba ka thoko ya borwa.

₆Jonathane o be a boditše morwadi wa marumo a gagwe, a re: Tlaa, re yo selela fala go lego bahlometši bao ba mašoboro. Mohlomong Morena a ka re diriša selo; ka gobane go Morena ga go se se kago mo šitiša go namolela ka ba bantši goba ka ba sego nene.

₇Morwadi wa marumo a re: Dira se o ratago go se dira. E re yeng! Nna ke ya nago mo o ratago.

₈Jonathane a re: O ko bone! A re seleleng go banna bao; mme a ba re bone. ₉E tlo re ge ba ka re: Emang re tle go lena, gona re tlo ema moo, ra se ke ra rotogela go bona. ₁₀Gomme ge ba ka re: Rotogelang mono, gona re tlo rotoga; gobane Morena o tlo ba a ba gafetše diatleng tša rena. Re tlo bona ka tšona tšeo.

₁₁Bjale ge bahlometši ba Bafilisita ba bona banna ba babedi bao, ba re: Bonang, Bahebere ba tšwile meleteng ye ba utamago go yona. ₁₂Ba biletša Jonathane le morwadi wa marumo a gagwe ba re: Rotogelang mono; le tlo re hwetša.

Ke mo Jonathane a re: Ntšhale nthago, re rotoge. Morena o ba gafetše diatleng tša Baisiraele. ₁₃Jonathane a namela ka go abula; morwadi wa marumo a gagwe a mo šala nthago. Ge Jonathane a fihla, a ba fenya; morwadi wa marumo a latela a fofotša. ₁₄Mo tlhabanong ye ya pele Jonathane le morwadi wa marumo a gagwe ba bolaile banna ba masome a mabedi mo felwaneng go lekanago le tema e tee ya tšhemo. ₁₅Madira ka moka a Bafilisita a a bego a le mošašeng wa kua molaleng, a welwa ke tšhogo e kgolo; ba bahlometši le ba ba bego ba thosanya naga, ba thothomela; naga ya šišinyega, ya ba tšhogo e tšwilego go Modimo.

₁₆Dihlodi tša Saulo tše di bego di le kua Gibea-Benyamini, ge di lebelela, tša bona makoko a ferekane, a eya kua le kua. ₁₇Saulo a laela batho ba ba bego ba na nae, a re: Balang, re bone e a re tšwilego. Ba bala ba hwetša go hlokega Jonathane le morwadi wa marumo a gagwe. ₁₈Saulo a botša Ahia a re: Tliša polokelo ya Morena e tle fa; gobane polokelo ya Morena e be e le moo go Baisiraele mohlang woo. ₁₉Ya re ge Saulo a sa bolela, moferefere wa mešašeng ya Bafilisita wa ba o godile. Saulo a botša moperisita a re: Gomiša letsogo la gago. ₂₀Saulo le batho ba ba bego ba na nae ba hlaba mokgoši, ba tšwa dira, ba hwetša bala ba hlabana seng sa bona, e le moferefere o mogologolo. ₂₁Gomme Bahebere ba ba bego ba rapilwe ke Bafilisita ba tšwa le bona ba tla mešašeng, ba hlanoga ba ema le Baisiraele, ba ba bego ba na le Saulo le Jonathane. ₂₂Gwa phalala, le Baisiraele ba ba bego ba tšhabetše dithabeng tša Efuraimi, ge ba ekwa gore Bafilisita ba a tšhaba, ba ba kwatakwatiša. ₂₃Mohlang woo Morena a namolela Isiraele ka mokgwa woo. Tlhabano ya ba e kgolo, ya fihla Bethe-Abene.

₂₄Ka tšatši leo banna ba Isiraele ba lapa ka gobane Saulo o be a tlemile setšhaba ka keno, mola a re: Monna e a kago ja le sešo la dikela, ke sešo ka otla manaba a ka, o rogilwe! Gomme batho ba ila sejo. ₂₅Ba tla nageng ye e bego e tletše dihlare; ba hwetša go le dinose di le kgakala. ₂₆Batho ge ba tsena sekgweng, ba bona dinose di ela. Fela, gwa se be le e a di tšeago a di iša molomong, ka go boifa keno yela. ₂₇Bjale Jonathane o be a sešo a kwa gore tatagwe o tlemile setšhaba ka keno; a iša ntlha ya molamo wo a bego a o swere, a rafa lemapo la dinose, a iša seatla ganong; ke mo mahlo a gagwe a nago a apoga. ₂₈A bonwa ke e mongwe wa batho bao; yena eo a mo rera a re: Tatago o tlemile setšhaba ka keno, a re: E a kago ja bogobe lehono, o rogilwe! Gomme setšhaba se be se lapile.

₂₉Jonathane a re: Tate o hlolela lefase le bothata. Bonang nna; mahlo a ka a apogile ke lekile nose ye ka gonyane. ₃₀A batho ba ka be ba dumeletšwe lehono go ja tše ba di thopilego, tše ba di bonego di le gona go manaba a bona! Bjale gomme polao go Bafilisita e ka se be e kgolo.

₃₁Mohla woo ba be ba bolaile Bafilisita go tloga Mikimasa ba ba fihliša Ajoloni; fela, setšhaba se be se lapile gagolo. ₃₂Batho ba tla ba wela dithebola godimo, ba tšea dinku le dikgomo le mamane, ba fo di hlabela fase, ba di ja di sa na le madi. ₃₃Ba botša Saulo ba re: Seba batho ba senyetša Morena ka go ja tše di nago le madi.

Saulo a re: Le oba molato. Napang le kgokološe leswika le legolo le tle fa. ₃₄A buša a re: Phatlalalelang bathong le ba botše le re: Bohle tlišang dinku le dipholo tša lena fa go nna, le di hlabele gona mo, gore le sa tlo senyetša Morena ka go ja madi. Batho ka moka ba tliša dipholo tša bona bošego bjoo, ba di hlabela gona moo. ₃₅Saulo a agele Morena aletare; ya ba yona ya pele ye a e agetšego Morena.

₃₆Bjale Saulo a re: A re hlomareleng Bafilisita bošego bjo, re ba hlakole go sešo gwa sa; mme re se ke ra šadiša motho wa bona.

Ba re: Dira ka mo go ratago pelo ya gago.

Moperisita yena a re: A re batameleng Modimo re sa le fa.

₃₇Gomme Saulo a botšiša Modimo a re: A nka hlomarela Bafilisita? A o tlo ba gafela seatleng sa ka? Gomme mohla woo Morena a se ke a fetola. ₃₈Ke moka Saulo a re: Batamelang lena balaodi ba setšhaba, le latišiši le bone gore molato wo wa lehono o go mang. ₃₉Ka bophelo bja Morena Monamolelaisiraele, le ge molato o ka hwetšwa go Jonathane morwa wa ka, o tlo bolawa. Gwa se ke gwa fetola motho. ₄₀A laela Isiraele ka moka a re: Lena emelang mola; nna le Jonathane morwa wa ka re eme mono.

Batho ba re: Dira ka mo o ratago.

₄₁Saulo a rapela Morena a re: Modimo wa Isiraele, ako tšweletše therešo! Gomme gwa tanywa Jonathane le Saulo; batho bona ba tšwa. ₄₂Saulo a re: A go tleke nna le Jonathane morwa wa ka. Gomme tlekane ya tšwa le Jonathane. ₄₃Saulo a re: Jonathane, mpotše se o se dirilego.

Jonathane a mmotša a re: Ke latswitše nosana ka ntlha ya molamo wo ke bego ke o swere. A fa ke tlo bolawa ka baka la yona?

₄₄Saulo a re: Modimo o dira ka mokgwa woo; o tlo ba a boeletša. O a bolawa, Jonathane.

₄₅Ke mo batho ba boletšego le Saulo ba re: Afa o re Jonathane a bolawe, yena e a namoletšego Isiraele ka tše kaakaa? Aowa! Ka bophelo bja Morena! Le ntsa e tee ya moriri wa hlogo ya gagwe e ka se ke ya wela fase; ka gobane se a se dirilego se, o se dirile Modimo a na nae. Setšhaba sa emela Jonathane ka mokgwa woo; mme a se ke a bolawa.

₄₆Saulo a gomela Bafilisita; Bafilisita ba boela ga gabo.

₄₇Saulo ge a tšere bogoši bja Isiraele o hlabane le manaba a gagwe ka moka thoko tše go fela. E be e le: Bamoaba, le Baamoni, le Baedomo, le dikgoši tša Tsoba, le Bafilisita. Gomme mo gohle mo a tšwetšego ntshe, o fentše. ₄₈A tiiša maatla a fenya Baamaleke; a namolela Isiraele mo diatleng tša ba ba bego ba ba hlakola.

₄₉Saulo o be a na le barwa, e le Jonathane, le Jesibi, le Malakisua. Maina a barwedi ba gagwe, la wa pele e be e le Merabe, la e monyenyane e be e le Mikala. ₅₀Leina la mosadi wa Saulo e be e le Ahinoama, morwedi wa Ahimaatse. Leina la molaodi wa madira e be e le Abenere, morwa wa Nere, morwa rangwana Saulo. ₅₁Gobane Kisi tatago Saulo, le Nere tatago Abenere, e be e le barwa ba Abiele.

₅₂Mehla ka moka ya mmušo wa Saulo go be go lwewa ntwa e thata le Bafilisita. Gomme monna ofe le ofe, yo Saulo a mmonego e le seoka le mogale, o be a mo dira wa gagwe.