1 SAMUELE 12

₁Samuele a bolela le Baisiraele bohle a re: Sedio ge! Ke kwile tše le nkgopetšego tšohle, gomme ke le beetše kgoši. ₂Bjale še kgoši ya lena, ketapele ya lena. Ge e le nna ke tšofetše, ke e mopududu. Bana ba ka ke ba le nago nabo. Ke be ke le eta pele go tloga mola ke sa le lesogana, gwa ba gwa tla la lehono le. ₃Bjale ke nna e. Mphetoleng re le fa pele ga Morena le motlotšwa wa gagwe, ge ke re: Ke mang yo nkilego ka mo amoga pholo, le ge e le pokolo ya gagwe, goba ke mang yo nkilego ka mo hlakola goba ka mo pateletša? Ke mang e a kgonnego go foufatša mahlo a ka ka sa tsogolekobong? Ge go ka ba le o bjalo, a a tle ke mmušetše.

₄Bona ba re: Aowa; ga wa ka wa re pateletša, ga wa ka wa re hlakola; ga wa ka wa amogela selo go rena.

₅Samuele a re: Gona hlatse ye le lebanago nayo ke Morena; le motlotšwa wa gagwe ke hlatse lehono ya go re ga la nkhwetša ke le amoga selo.

Setšhaba sa re: A a be hlatse.

₆Samuele a botša setšhaba a re: Hlatse ke Morena e a dirilego Moshe le Arone, e a ntšhitšego botataweno nageng ya Egipita. ₇Batamelang gee re eletšane pele ga Morena ka tše botse ka moka tše Morena a di diretšego botataweno. ₈Mola Jakobo a falaletše Egipita, botataweno ba hlabetše Morena mokgoši. Morena a roma Moshe le Arone ba tla go botataweno, ba ba ntšha Egipita; a ba agiša lefaseng le. ₉Bona ba fela ba lebala Morena Modimo wa bona. A ba gafela diatleng tša Sisera molaodi yola wa dira tša Hatsora. A ba gafela diatleng tša Bafilisita, le diatleng tša kgoši ya Moaba, ba lwa nabo. ₁₀Ba hlabela Morena mokgoši ba re: Re sentše ka gobane re lahlile Morena, ra hlankela Bobaali le Boasiterothe. Ba re: Bjale re namolele diatleng tša manaba a rena, re tle re go direle. ₁₁Morena a roma Jerubaali, le Bedani, le Jefeta, le Samuele; a le namolela diatleng tša manaba a a bego a le dikologile, la ba la dula la iketla. ₁₂Ya ba ya re mola le bona Nahasi kgoši ya Baamoni a le tšwetše dira, la mpotša la re: Aowa, a re be le kgoši e re bušago; mola Kgoši ya lena e le Morena Modimo wa lena.

₁₃Bjale kgoši ya lena ye le ikgethetšego yona, ye le e kgopetšego, še. Ke yona kgoši ye Morena a le beetšego yona. ₁₄A nke le boife Morena le mo hlankele, le kwe se a se bolelago; le se ngangane le molomo wa Morena; lena le kgoši ye e le bušago le latele Morena Modimo wa lena. ₁₅Fela, ge le ka gana go kwa se Morena a se bolelago, la ngangana le molomo wa gagwe, gona seatla sa Morena se tlo lwa le lena le botataweno. ₁₆Le bjale emang, le bone tše kgolo tše Morena a kago di dira la di bona ka mahlo a lena. ₁₇A ga le re bjalo ke lebaka la puno ya mabele! Bjale ke tlo kgopela Morena gore a dumiše maru, a neše pula, gore le tsebe gomme le bone bošaedi bjo bogolo bjo le bo dirilego pele ga Morena, ge le kgopetše go fiwa kgoši.

₁₈Ya re ge Samuele a rapela Morena, Morena a dumiša maru, a neša pula ka lona tšatši leo. Setšhaba ka moka sa tšhoga gagolo sa boifa Morena le Samuele. ₁₉Setšhaba ka moka sa kgopela Samuele sa re: A ko rapelele bahlanka ba gago go Morena Modimo wa gago, gore re se hwe; ka gobane dibe tšohle tše re dirilego re di tladitše ka bošaedi bjo bja go ikgopelela kgoši.

₂₀Samuele a fetola a re: Se boifeng! Dibe tšeo ka moka le di dirile. Fela, le se ke la hlanogela Morena; le hlankele Morena ka dipelo tša lena ka moka. ₂₁Le se ke la hlanoga la latela tša lefela tše di sa thušego selo, tše di sa phološego motho, ka ge e le tša lefela. ₂₂Morena yena a ka se ke a lahla setšhaba sa gagwe ka baka la bogolo bja leina la gagwe; ka gobane ke yena Morena a ratilego go le dira setšhaba sa gagwe. ₂₃Bjale le nna ke re, go senyetša Morena a go be kgole le nna. Nka se lese go le rapelela, le go le ruta tsela e botse e lokilego. ₂₄Tabakgolo ke gore le boife Morena; le mo direle ka go mmotegela ka dipelo tša lena ka moka; ka gobane le bone tše kgolo tše a le diretšego tšona. ₂₅Fela ge le ka upša la senya, gona le tlo senyega gotee le kgoši ya lena.