Saulo o namolela ba Jabese
1Gwa rotoga Nahasi, wa setšhaba sa Baamoni, a rakelela motse wa Jabese wa ga Gileada. Banna ka moka ba Jabese ba tsebiša Nahasi ba re: A ntwa e fele, re be balata ba gago.
2Nahasi, monna wa ga Amoni a re: Go fetša ntwa le lena, e tlo ba ge ka moka ga lena ke le gontše mahlo a le letona, ka nyatšiša Isiraele ka moka.
3Bagolo ba Jabese ba fetola ba re: Re fe matšatši a šupago, re rome batseta ba ye dileteng ka moka tša Isiraele. Ge go ka hlokwa wa go re thuša, gona re tlo loba wena.
4Batseta bao ba tla Gibea go Saulo, ba bolela ditaba tšeo ka moka. Setšhaba sa re go di kwa, sa hlaboša lentšu sa lla. 5E be e le ge Saulo a boa šokeng a na le dikgomo; a botšiša a re: Setšhaba se llelang? Ba mo anegela ditaba tša ba Jabese. 6A re go di kwa a napa a tlelwa ke moya wa Modimo, a tuka bogale ka maatla. 7A hlaola dikgomo tše pedi a di kgabetla, a di romela dileteng tšohle tša Isiraele ka batseta, a re: E a sa tšwego dira le Saulo le Samuele, dikgomo tša gagwe di tlo dirwa ka mokgwa wo. Ke mo setšhaba ka moka se wetšwego ke tšhogo e tšwilego go Morena, ba tšwa e le batee. 8Ba balwa kua Beseka e le ba dikete tše makgolo a mararo a Baisiraele, banna ba Juda e le dikete tše masome a mararo. 9Ba botša batseta bala ba ba tlilego, ba re: Botšang banna ba Jabese le re: Le tlo namolelwa bosasa mosegare sekgalela. Batseta ba boela ga gabo. Batho ba Jabese ge ba tlelwa ke lefoko leo, ba thaba. 10Ba iša lentšu go bala, ba re: Ka moswana re tlo tšwela go lena, la tlo re dira ka mo le ratago.
11Ka la ka moswana Saulo a laya dira, a dira diphohla tše tharo. Ba šwahlela mešaša ya Baamoni ka matlagosa, ba ba bolaya, la ba la hlaba la fiša. Mašaledi a phatlalatšwa, gwa se šale ba babedi ba le mmogo.
12Bjale setšhaba sa bolela le Samuele sa re: Ke bomang bale ba ba bego ba re: Afa Saulo a ka re buša? Re nee banna bao re ba bolaye.
13Saulo a re: Ka tšatši la lehono go se ke gwa bolawa motho, ka gobane la lehono le ke la phenyo ye Morena a e diretšego Isiraele.
14Samuele a botša setšhaba a re: Tlang re yeng Giligala, re yo diga bogoši ntshe.
15Setšhaba ka moka sa ya Giligala; ba bea Saulo a ba kgoši, ba le pele ga Morena gona moo Giligala. Ba tlišetša Morena didimo tša dileboga ba le ntshe. Lethabo la Saulo le la banna ba Isiraele ya ba le legolo.
